Nahus 2 - Vaajtswv Txujlug - lug Moob Ntsuab - txhais tshab xyoo 2004

Ninave yuav puam tsuaj

¹ Lub nroog Ninave, cov kws tsoo koj tub tuaj ua rog rua koj lawm. Kawgkag moog zuv rooj loog, zuv ncauj kev, ca le sa hlaab khov kho npaaj tog, sau tub rog txhwj zog.

² (Yawmsaub saamswm ua kuas Yakhauj tebchaws rov muaj fwjchim meej mom le qub ib yaam le Yixayee tebchaws yuav vaam meej nto moo, vem yog tub saab lws puab hab muab puab tej ceg ua lamswm taag.)

³ Cov tub rog kws sab tuab mas puab daim hlau thaiv lab ploog, cov tub rog tej tsoog lab tsaus nti. Nub kws npaaj txhwj mas tej tsheb ua rog ci nplaag cuag le nplaim tawg, cov neeg ua rog kuj txauj teg peem quas qeeg yuav moog.

⁴ Cov tsheb ua rog mas dha raag quas ntwg taug kev, moog tawg quas leeg tej tshaav puam huv nroog, ci nplaag le taws tsau, laim quas lag le tsag lig xub.

⁵ Cov thawj rog raug hu, puab dha dawm taw pis poog moog, puab dha ncaaj nraim rua ntawm ntsaa loog, puab tsaa hlo daim hlau thaiv hauv ntaaj hauv muv.

⁶ Lub qhov rooj dej qheb hlo lawm, cov huv vaajntxwv tsev poob sab taag.

⁷ Puab muab tug puj vaaj tej tsoog tsho hle, puab nteg puj vaaj coj moog. Cov nkauj qhev kuj quaj ntsuag zum quas zawg yaam nkaus le nquab quaj hab puab ntaus hauv sab.

⁸ Ninave zoo nkaus le lub paag dej kws ndwg quas zug moog lawm. Puab qw has tas, “Xob moog, xob moog,” tassws tsw muaj leejtwg tig rov lug le.

⁹ Ca le moog lws nyaj lws kub. Muaj nyaj txag ntau kawg tsw paub taag le, muaj ib puas tsaav yaam hov txhua chaw muaj nqes.

¹⁰ Ninave txom nyem lauj, puam tsuaj taag du quas lug lauj! Lub sab yaaj quas ntshws, hauv caug tshee nduas quas txag, ib ce tsaug quas tshua, ntsej muag thum xem taag.

¹¹ Tsuv ntxhuav lub chaw nyob dua twg lawm? Yog lub qhov tsua kws cov tsuv ntxhuav mog nyob hab kwv nqaj moog noj tsw muaj leejtwg nkaag moog taab kaum tau. Qhov chaw kws tsw muaj leejtwg nkaag moog zwg cov mivnyuas tsuv ntxhuav dua twg lawm?

¹² Tug tsuv ntxhuav dua nqaj txaus cov mivnyuas noj hab ntxo nkaus nqaj cej daab lug rua cov maum tsuv ntxhuav. Nwg nrhav nqaj coj lug puv nkaus qhov tsua hab dua nqaj lug tso puv nkaus lub chaw nyob.

¹³ Yawmsaub kws muaj fwjchim luj kawg nkaus, has tas, “Saib maj, kuv tawm tsaam koj. Kuv yuav hlawv koj tej tsheb ua rog kuas nchu paa quas lug, hab nav ntaaj yuav tua koj cov tsuv ntxhuav mog. Kuv yuav muab cov nqaj kws koj noj rhu tawm huv lub nplajteb moog, hab yuav tsw nov koj cov tub tshaaj xu lub suab le lawm.”