Mathai 26 - Vaajtswv Txujlug - lug Moob Ntsuab - txhais tshab xyoo 2004

Cov thawj tuav huv txuv Yexu

¹ Thaus Yexu has tej lug nuav huvsw taag lawm nwg txawm has rua nwg cov thwjtim tas,

² “Mej yeej paub lawm tas tshuav ob nub xwb tes txug lub caij ua kevcai Hlaa Dhau, mas Tuabneeg leej Tub yuav raug muab cob rua luas teem rua sau khaublig ntoo.”

³ Thaus ntawd cov pov thawj hlub hab cov kev txwj quas laug tuaj ua ke rua huv tug tuam pov thawj hlub Khayafa lub tsev,

⁴ hab puab sablaaj tuav huv yuav nteg Yexu tuabywv hab muab nwg tua pov tseg.

⁵ Puab has tas, “Tsw xob nteg nwg rua lub swjhawm kws ua kevcai nuav tsaam tes muaj kev kub ntxhuv rua huv cov pejxeem.”

Tug puj laub roj rua Yexu taubhau

⁶ Thaus Yexu nyob huv Ximoo kws mob ruas lub tsev huv lub zog Npethani,

⁷ Yexu tseed pheeb ntawm rooj mov, txawm muaj ib tug puj nqaa ib fwj roj tsw qaab muaj nqes heev tuaj cuag Yexu tes txawm muab laub rua sau Yexu taubhau.

⁸ Thaus cov thwjtim pum le hov puab chim txawm has tas, “Ua caag yuav nkim tej roj nuav?

⁹ Cov roj nuav yog muab muag tau nyaj ntau coj moog pub rua cov tuabneeg pluag kuj tau.”

¹⁰ Yexu kuj paub tes nwg txawm has rua puab tas, “Mej ua rua tug puj nuav ntxhuv sab ua daabtsw? Nwg ua yaam kws zoo heev rua kuv.

¹¹ Yeej yuav muaj cov tuabneeg pluag nrug mej nyob moog le, tassws mej yuav tsw muaj kuv nrug mej nyob moog le.

¹² Qhov kws nwg laub roj rua sau kuv lub cev tub yog nwg tu kuv lub cev ca rua nub kws log kuv.

¹³ Kuv has tseeb rua mej tas, tshaaj tawm txuj xuv zoo nuav tawm moog thoob nplajteb txug hovtwg, qhov kws tug puj nuav ua yuav nrov nchaa moog txug hov ntawd ua lub chaw ncu txug nwg.”

Yutas faav xeeb rua Yexu

¹⁴ Thaus ntawd kaum ob tug thwjtim tug kws npe hu ua Yutas Ikhali‑au txawm moog cuag cov pov thawj hlub,

¹⁵ hab has tas, “Yog kuv muab Yexu cob rua mej, mej yuav muab daabtsw rua kuv?” Puab txawm suav peb caug lub nyaj rua nwg.

¹⁶ Txwj thaus hov lug Yutas nrhav swjhawm yuav muab Yexu cob rua puab.

Yexu npaaj noj kevcai Hlaa Dhau

¹⁷ Thawj nub kws ua kevcai Noj Ncuav tsw Xyaw Keeb cov thwjtim lug has rua Yexu tas, “Yuav ca peb npaaj kevcai Hlaa Dhau rua koj noj hovtwg?”

¹⁸ Nwg has tas, “Ca le moog cuag ib tug yawm huv lub nroog hab has rua nwg tas, ‘Tug xwbfwb has tas, Lub swjhawm kws teem rua kuv lug ze lawm. Kuv yuav nrug kuv cov thwjtim ua kevcai Hlaa Dhau rua huv koj lub tsev.’ ”

¹⁹ Cov thwjtim kuj ua lawv le Yexu has, puab txawm moog npaaj ua kevcai Hlaa Dhau txhwj zog.

²⁰ Thaus tsaus ntuj Yexu nrug kaum ob tug thwjtim nyob pheeb ntawm rooj mov ua ke.

²¹ Thaus puab saamswm noj, nwg txawm has tas, “Kuv has tseeb rua mej tas, mej cov nuav muaj ib tug yuav faav xeeb rua kuv.”

²² Puab kuj ntxhuv sab heev puab nyag taug nyag chiv nug tas, “Tug Tswv, yog kuv lov?”

²³ Yexu teb tas, “Tug kws cev nwg txhais teg nrug kuv koom ntsw ib lub taig yog tug kws yuav faav xeeb rua kuv.

²⁴ Tuabneeg leej Tub yuav moog lawv le tej kws muaj sau ca has txug nwg, tassws tug kws faav xeeb rua Tuabneeg leej Tub yeej yuav raug txom nyem kawg. Tsw xob yug nwg lug kuj zoo dua.”

²⁵ Yutas kws faav xeeb rua Yexu txawm has tas, “Xwbfwb, yog kuv lov?” Yexu teb nwg tas, “Koj has yog lawm.”

Yexu rooj mov

²⁶ Thaus puab noj mov, Yexu txawm muab ib lub ncuav lug foom koob moov rua mas muab ndais cev rua cov thwjtim hab has tas, “Ca le txais moog noj, nuav yog kuv lub cev.”

²⁷ Hab nwg muab ib lub khob lug ua Vaajtswv tsaug taag muab cev rua puab has tas, “Mej txhua tug ca le haus lub khob nuav.

²⁸ Nuav yog kuv cov ntshaav kws nas hom thawj rua tej lug cog tseg, kws raug muab nchuav daws tuabneeg coob coob lub txem.

²⁹ Kuv has rua mej tas kuv yuav tsw haus cawv txwv maab nuav dua le moog txug nub kws kuv nrug mej haus cawv txwv maab tshab huv kuv leej Txwv lub tebchaws.”

³⁰ Thaus puab hu ib zaaj nkauj taag puab tawm moog rua peg roob Txwv Aulib.

Petu yuav tsw leeg paub Yexu

³¹ Thaus ntawd Yexu has rua puab tas, “Mo nuav mej txhua tug yuav tso kuv tseg, vem muaj lug sau ca has tas, “ ‘Kuv yuav tua tug yug yaaj, mas paab yaaj yuav tawg ua saab ua sua moog.’

³² Tassws thaus kuv raug muab tsaa caj sawv rov lug lawm, kuv yuav ua mej ntej moog rua Kalilai.”

³³ Petu txawm has rua Yexu tas, “Txawm yog puab suavdawg tso koj tseg los kuv yuav tsw tso koj tseg hlo le.”

³⁴ Yexu has rua nwg tas, “Kuv has tseeb rua koj tas, mo nuav ntaag thaus qab tsw tau qua koj yuav tsw leeg paub kuv peb zag.”

³⁵ Petu has rua nwg tas, “Txawm yog kuv yuav tsum nrug koj tuag, los kuv yuav tsw has tas kuv tsw paub koj.” Cov thwjtim suavdawg puavleej has le ntawd.

Yexu thov Vaajtswv huv Kexemane

³⁶ Tes Yexu txawm nrug nwg cov thwjtim moog rua ib qho chaw kws hu ua Kexemane, mas nwg has rua puab tas, “Ca le nyob tsawg ntawm nuav rua thaus kuv moog thov Vaajtswv lawm tod.”

³⁷ Nwg coj Petu hab Xenpenti ob tug tub nrug nwg moog. Yexu chiv txhawj hab ntxhuv sab kawg.

³⁸ Yexu has rua puab tas, “Kuv lub sab ntxhuv kawg tub yuav tuag. Mej ca le nyob ntawm nuav hab nrug kuv zuv tog.”

³⁹ Yexu txawm moog rua tom ntej mivntswv mas nwg khwb nkaus rua huv peg teb thov has tas, “Au kuv leej Txwv, yog ua tau, thov ca lub khob nuav dhau ntawm kuv moog. Txawm le caag kuj xwj, thov tsw xob ca ua lawv le kuv lub sab tassws ca ua lawv le koj lub sab.”

⁴⁰ Nwg rov lug rua ntawm cov thwjtim pum puab pw tsaug zug taag. Nwg txhad has rua Petu tas, “Mej nrug kuv zuv tog ib nyuas teev tsw taug le lov?

⁴¹ Mej yuav tsum zuv tog hab thov Vaajtswv sub mej txhad tsw raug kev swm sab. Lub sab npaaj txhwj lawm tassws lub cev tsw muaj zug.”

⁴² Yexu txawm rov moog thov Vaajtswv zag ob has tas, “Au kuv leej Txwv, yog lub khob nuav dhau ntawm kuv moog tsw tau, yog kuv yuav tsum haus xwb, mas thov ca ua lawv le koj lub sab.”

⁴³ Yexu rov lug pum puab pw tsaug zug dua ib zag vem puab qheb tsw taug qhov muag.

⁴⁴ Nwg txawm ncaim puab rov moog thov Vaajtswv zag peb ib yaam le thov thawj ob zag.

⁴⁵ Nwg txawm rov lug rua ntawm cov thwjtim hab has rua puab tas, “Mej tseed pw tsaug zug hab su lug sav lov? Lub swjhawm tub lug txug lawm, mas Tuabneeg leej Tub tub raug muab cob rua huv cov tuabneeg txhum txhais teg lawm.

⁴⁶ Ca le sawv tseeg, peb moog. Saib maj, tug kws faav xeeb rua kuv tuaj ze lawm.”

Nteg Yexu

⁴⁷ Thaus Yexu tseed saamswm has lug, tes Yutas kws yog ib tug thwjtim huv kaum ob leeg ntawd txawm tuaj txug, hab muaj tuabneeg coob coob coj ntaaj coj qws nrug nwg tuaj, yog cov pov thawj hlub hab cov kev txwj quas laug khaiv tuaj.

⁴⁸ Tug kws faav xeeb hov tub qha rua puab ua ntej tas, “Kuv nwj tug twg mas yog tug hov ntaag. Ca le nteg kag nwg.”

⁴⁹ Taamswm ntawd Yutas txawm lug rua ntawm Yexu hab has tas, “Nyob zoo, xwbfwb,” hab nwj Yexu.

⁵⁰ Yexu has rua nwg tas, “Kwvluag, ca le ua lawv le koj xaav tseg lawm.” Tes cov tuabneeg hov txawm lug ntsab nkaus Yexu muab nwg nteg.

⁵¹ Thaus hov muaj ib tug kws nrug nraim Yexu txawm cev teg rhu hlo ntaaj lug tuab ntaug tug tuam pov thawj hlub tug tub qhe txav nwg ib saab nplooj ntseg tu nrho.

⁵² Yexu has rua nwg tas, “Ca le muab koj raab ntaaj ntxwg rua huv lub naab, vem tas txhua tug kws swv ntaaj yeej yuav tuag rua nav ntaaj.

⁵³ Mej xaav tas kuv yuav thov kuv leej Txwv tsw tau lov? Mas nwg yuav tso tubkhai ntuj coob dua kaum ob paab tub rog lug paab kuv taamswm ntawd.

⁵⁴ Yog ua le ntawd mas tej lug kws has tas yuav tsum muaj le nuav, yuav tav tau le caag?”

⁵⁵ Thaus ntawd Yexu has rua cov tuabneeg tas, “Mej coj ntaaj coj qws tuaj nteg kuv ib yaam le tawm moog nteg tub saab lov? Kuv naj nub nyob tsawg huv lub tuam tsev qhuab qha, los mej tsua tsw nteg kuv.

⁵⁶ Tassws tej xwm txheej nuav huvsw tshwm lug txhad tav lawv le tej lug kws cov xwbfwb cev lug sau ca.” Tes cov thwjtim suavdawg txawm tso Yexu tseg tswv taag lawm.

Yexu nyob ntawm cov thawj lub rooj sablaaj

⁵⁷ Cov kws nteg Yexu txawm coj nwg moog rua ntawm tug tuam pov thawj hlub Khayafa. Cov xwbfwb qha Vaajtswv kevcai hab cov kev txwj quas laug tub tuaj txoos ua ke rua hov ntawd lawm.

⁵⁸ Petu lawv Yexu qaab deb deb moog txug lub tshaav puam ntawm tug tuam pov thawj hlub lub tsev. Nwg nkaag moog nrug cov tub rog kws zuv lub tuam tsev nyob ua ke rua huv xauj, saib thaus kawg yuav zoo le caag.

⁵⁹ Cov pov thawj hlub hab taag nrho cov thawj lub rooj sablaaj txawm nrhav cuav timkhawv nkaug Yexu sub txhad tua tau nwg pov tseg.

⁶⁰ Txawm yog muaj ntau leej lug ua cuav timkhawv tum los nrhav tsw tau keeb puam. Thaus kawg muaj ob leeg lug,

⁶¹ hab has tas, “Tug nuav has tas, ‘Kuv yuav rhuav Vaajtswv lub tuam tsev pov tseg mas peb nub xwb yuav ua tau dua tshab.’ ”

⁶² Tug tuam pov thawj hlub txawm sawv tseeg has tas, “Koj tsw muaj ib lu lug teb lov? Puab kom koj txug daabtsw?”

⁶³ Yexu nyob tuabywv. Tug tuam pov thawj hlub txawm has tas, “Kuv ca koj tuav Vaajtswv kws muaj txujsa nyob lub npe twv has rua peb tas koj yog tug Kheto kws yog Vaajtswv tug Tub los tsw yog.”

⁶⁴ Yexu has rua nwg tas, “Yog le koj has. Tassws kuv has rua mej tas, tom hauv ntej mej yuav pum Tuabneeg leej Tub nyob tsawg ntawm tug kws muaj fwjchim luj kawg saab xws, hab nrug fuab sau ntuj lug.”

⁶⁵ Tes tug tuam pov thawj hlub txawm dua rhe nwg lub tsho hab has tas, “Nwg has lug tuam mom Vaajtswv lawm. Peb tseed yuav timkhawv ntxwv le caag hab? Mej tub nov nwg has tuam mom Vaajtswv lawm.

⁶⁶ Mej pum zoo le caag?” Puab teb tas, “Tswm nyog muab teem txem tuag.”

⁶⁷ Puab txawm ntu qub ncaug rua Yexu ntsej muag hab ntaus nwg hab muaj qee leej xuas tawg ncuav rua Yexu,

⁶⁸ hab has tas, “Tug Kheto, ca le cev Vaajtswv lug rua peb. Saib leejtwg ntaus koj?”

Petu tsw leeg Yexu

⁶⁹ Petu nyob tsawg nrau lub tshaav puam. Muaj ib tug nkauj qhev lug has rua nwg tas, “Koj tub nrug Yexu kws yog tuabneeg Kalilai ua ke los sas.”

⁷⁰ Tassws Petu tsw leeg taab meeg suavdawg, nwg has tas, “Qhov kws koj has kod kuv tsw paub le.”

⁷¹ Thaus Petu tawm moog rua ntawm rooj vaag muaj dua ib tug nkauj qhev txawm pum nwg tes txawm has rua cov tuabneeg kws nyob ib ncig ntawd tas, “Tug nuav yeej nrug Yexu kws yog tuabneeg Naxale nyob ua ke.”

⁷² Petu rov tsw leeg hab twv has tas, “Kuv yeej tsw paub tug hov le.”

⁷³ Tom qaab ntawd mivntswv cov tuabneeg kws nyob ib ncig txawm lug has rua Petu tas, “Koj yeej yog puab cov hov ib tug tag tag le, tsua qhov koj lub suab seebchim yeej qha rua peb paub lawm.”

⁷⁴ Petu txawm chiv twv tsawm tawv tawv has tas, “Kuv tsw paub tug hov hlo le.” Taamswm ntawd qab txawm qua.

⁷⁵ Petu txhad ncu dheev txug tej lug kws Yexu tau has tas, “Thaus qab tsw tau qua koj yuav tsw leeg paub kuv peb zag.” Tes Petu txawm moog rua saab nrau quaj nyuaj sab heev.