फिलिप्पियो 4 - Halbiपौलुस चो सला 1 ऐईकाजे हे मचो लाडरा भाईमन, जोनमन थाने मचो जीव लगु रऊ आय, जोन मचो हरिक आउर मुकुट होओ, हे लाडरा भाईमन, परबु ने ऐई परकार थीर राआ। 2 मय यूओदिआ के बिनती करें से आउर सुन्तूखे के बले, कि हुनमन परबु ने गोटक मन रओत। 3 हे सत सहकरमी, मय तुमचो ले बले गुहार करें से कि तुय हुन बायले लेकीमन चो सायता कर, कसनबल्लोने हुनमन मोचो संगे नगतखबर फयलातो ने, क्लेमेंस आउर मचो दुसर सकरमीमन चो संगे मसागत करला से, जोनमन चो नाव जीवन चो किताब ने लिकलोर आसे। हरमेशा हरिक राआ 4 परबु ने हरमेशा हरिक राआ; मय फेर बलेंसें, हरिक ने राआ। 5 तुमचो कोमलता सपाय मानेमन उपरे परकट होओ। परबु लगे आसे। 6 कोनी बले गोठ चो चिन्ता नी करा; मान्तर हरकोनी गोठ ने तुमचो गुहार, पारथना आउर गुहार चो दुआरा धन्यबाद चो संगे माहापुरू चो पुरे हाजिर करा जाओ। 7 तेबे माहापुरू चो शान्ति, जोन पूईतराय समज ले बाहार आय, तुमचो मन आउर तुमचो बिचारमन के मसीह ईशु ने सुरक्षित संगायेदे। ऐ गोठमन उपरे धिआन लगाआ 8 ऐईकाजे हे भाईमन, जोन-जोन गोठमन सत आय, आउर जोन-जोन गोठमन ईजीत चो लायक आय, आउर जोन-जोन गोठमन ठीक आय, आउर जोन-जोन गोठमन पवितर आय, आउर जोन-जोन गोठमन सुन्दर आय, आउर जोन-जोन गोठमन मन के भावतो लायक चो आय, बल्लोने जोन बले अच्छा गुन आउर हरिक चो गोठमन आय हुनमन थाने धिआन लगाया करा। 9 जोन गोठमन तुमी मचो ले सिकलास, आउर गरहन करलास, आउर सुनलास, आउर मचो ने दकलास, हुनीमन चो पालन करा, तेबे माहापुरू चो जोन शान्ति चो झरन आय तुमचो संगे रयदे। दान काजे धन्यबाद 10 मय परबु ने खुबे हरिक आसे कि अदायं इतलो दिनमन चो पाचे तुमचो चिन्ता मचो बारे ने फेर जागरत होली से; पक्का तुमके मुर ने बले ऐचो कारन बिचार रली, मान्तर तुमके मवका नी मिरली। 11 ऐ नाई कि मय आपलो घटी चो लागुन ऐ बलेंसें; कसनबल्लोने मय ऐ सिकले से कि जोन हाल ने आसे; हुनी थाने संतुष्ट करेंदे। 12 मय सीदा होऊक बले जाने आउर बडुक बले जाने; हरकोनी गोठ आउर पुईतराय हालमन ने मय संतुष्ट होतोर, भुके रतोर, आउर बड़तोर-घटतोर सिकले से। 13 जोन मोके सामरत देऊ आय हुन थाने मय सपाय काई करूक सकें। 14 तेबे बले तुमी अच्छा करलास कि मचो कलेश ने शामिल होलास। 15 हे फिलिप्पिमन, तुमी खुद ची बले जानास कि नगतखबर परचार चो मुर ने, जिदलदाय मय मकिदुनिया ले बिदा होले, तेबे तुमके छांडुन आउर कोनी कलीसिया ने लेन-देन चो बारे ने मचो सायता नी करला। 16 ऐई परकार जिदलदाय मय थिस्सलुनीके ने रले, तेबे बले तुमी मचो घाटा पुरा करतो काजे गोटक हार काय मान्तर दुयहार काई पटाऊ रलीस। 17 ऐ नाई कि मय दान चाहायें से मान्तर मय असन फल चाहाऊं आंय जोन तुमचो फायदा चो काजे बड़ते जाओ। 18 मचो लगे सपाय काई आसे, मान्तर खुबे ले खुबे बले आसे; जोन तीजमन तुमी इपफ्रुदीतुस चो हाथ ले पटाऊन रलास हुनमन के पाऊन भाती मय संतुष्ट होऊन गेले से, हुन तो सुख देतो बिती बास, धरतो लायक बलिदान आय, जोन माहापुरू के भाऊ आय। 19 मचो माहापुरू बले आपलो हुन धन चो अनुसार जोन महिमा संगे मसीह ईशु ने आसे, तुमचो हरकोनी कमी के पुरा करेदे। 20 आमचो माहापुरू आउर बुआ चो महिमा जुग-जुग होते रओ। आमीन। जुहार आउर आशिर्बाद 21 हरकोनी पवितर लोग के, जोन ईशु मसीह ने आसोत जुहार बोला। जोन भाई मचो संगे आसोत, तुमके जुहार बले सोत। 22 सपाय पवितर लोग, खास करून जोन राजा चो घरलोगमन आत, तुमके जुहार बले सोत। 23 आमचो परबु ईशु मसीह चो अनुग्रह तुमचो आत्मा चो संगे होते रओ। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation