फिलिप्पियो 3 - Halbiजीव चो चिना 1 ऐईकाजे हे मचो भाईमन, परबु ने हरिक राआ। हुनी ची गोठमन तुमके घन-घन लिकतोर ने मोके तो काई तकलीस नी होये, आउर ऐ थाने तुमचो उदुम आसे, 2 कुकूरमन ले चलाक राआ, हुन घिन-घिना काम करतो बितामन ले चलाक राआ, हुन काट कोट करतो बिता ले बाचुन राहा। 3 कसनबल्लोने खतना बितामन चो आमी ची आंव जोन माहापुरू चो आत्मा चो चलाये ले उपास करू आत, आउर मसीह ईशु उपरे घमण्ड करू आत, आउर देंह थाने भरसा नी संगाओत। 4 मान्तर मय तो देंह थाने बले भरसा संगाक सकें। अगर कोनी आउर के देंह थाने भरसा संगातोर बिचार आसे, तो मय हुनचो ले बले बडुन भाती संगाऊक सकें। 5 आंटवा दिन मोचो खतना होली, इस्राएल चो बंश, आउर बिन्यामीन चो बोस चो आंय; इब्रानिमन चो इब्रानी आय; नियम चो बारे ने अगर बोला तो फरीसी आंय। 6 हरिक चो बारे ने अगर बोला तो कलीसिया चो कन्दरातो बिता; आउर नियम चो धारमिकता चो बारे ने अगर बोला तो बेकसूर रलो। 7 मान्तर जोन-जोन गोठमन मोचो फायदा चो रली, हुनीमन के मय मसीह चो कारन घाटा समज ले से। 8 मान्तर मय आपलो परबु मसीह ईशु चो पयचान चो उत्तम जो लागुन मय सपाय तीजमन के घाटा उठाले, आउर हुनमन के कचरा समजु आय, जेचो ले मय मसीह के पाऊक सके। 9 आउर हुन थाने मिरूक होओ; ना कि आपलो हुन धारमिकता चो संगे, जोन नियम ले आसे, मान्तर हुन धारमिकता चो संगे जोन मसीह उपरे बिश्वास करतोर कारन आय आउर माहापुरू चो बाटले बिश्वास करलो ने मिरू आय; 10 बल्ले मय हुनमन के आउर हुनचो मरून जीव उठतोर जय चो सामरत के, आउर हुनचो संगे दुकमन ने शामिल होतोर भेद के जाने, आउर हुनचो मरना चो बराबरी के पाऊक सकें 11 कि मय कोनी बले रीति ले मरलो बितामन थानले जीव उठतोर पद लगले अमरेंदें। चिना बाटे बड़ते जाआ 12 ऐ मतलब नुआय कि मय मिराऊन चुकले से, नाहले सिद्ध होऊन चुकले से; मान्तर हुन तीज के धरतो काजे पराते जाऊँ आंय, जेचो काजे मसीह ईशु मोके धरू रलो। 13 हे भाईमन, मोचो भावना ऐ नुआय कि मय धरून चुकले से; मान्तर मात्र ऐ गोटक काम करें से कि जोन गोठमन पाटकुती रऊन गेली से हुनमन के भुलकुन भाती, पयले चो गोठमन चो बाटे बाड़ते-बाड़ते, 14 चिना चो बाटे पराते जाऊँ आंय, बल्ले हुन पुरूसकार मिरो जेचो काजे माहापुरू मोके मसीह ईशु ने उपरे हाग दिलो से। 15 आमचो ने जितरो सिद्ध आत, ऐई बिचार संगाआ, आउर अगर कोनी गोठ ने तुमचो आउर ची बिचार होओ तेबे माहापुरू हुनके बले तुमचो उपरे परकट करून देयेदे। 16 ऐईकाजे जोन लगले आमी अमरलु से, हुनचेई अनुसार चलु। सरग ने आमचो रतोर 17 हे भाईमन, तुमी सपाय मिसुन भाती मचो असन चाल-चला, आउर हुनमन के चिताऊन संगाआ जोन ऐ रीति थाने चलु आत जेचो नमूना तुमी आमचो ने पाऊ आहास; 18 कसनबल्लोने खुबे ची असने चाल-चलु आत, जेचो गोठ बात मय तुमचो ले घन-घन करले से, आउर ऐबे बले गागुन-गागुन भाती बलेंसें कि हुनमन आपलो चाल चलन ले मसीह चो कुरूस चो बयरी आत। 19 हुनमन चो आखरी बिनाश आय, हुनमन चो ईश्पर पेट आय, हुनमन आपलो लाज चो गोठमन थाने घमण्ड करू आत आउर धरतनी चो तीजमन थाने मन लगाऊ रऊ आत। 20 मान्तर आमचो खुद चो देश सरग उपरे आसे; आउर आमी गोटक मुक्ति करता परबु ईशु मसीह चो हुता ले ऐतोर बाट टाकलु से। 21 हुनमन आपलो ताकत चो हुन असर चो अनुसार जेचो बाटले हुन सपाय तीजमन के आपलो बस ने करूक सके, आमचो दिन-हीन देंह चो रूप बदलुन भाती, आपलो महिमा चो देंह चो समान बनान देयेंदे। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation