फिलिप्पियो 2 - Halbiमसीही सोज 1 आउर अगर मसीह ने खिन्डिक शान्ति, आउर मया ले हिम्मत, आउर आत्मा चो शामिल, आउर खिन्डिक करूना आउर दया आसे, 2 तो मोचो ऐ हरिक पुरा करा कि गोटक मन राआ, आउर गोटक ची मया, गोटक ची चित, गोटक ची मनसा संगाआ। 3 बिरूद नाहले झूठा बड़ाई चो काजे काई नी करा, मान्तर दिनता ले गोटक दुसर के आपलो ले अच्छा समजा। 4 हरकोनी आपलो ची हित ची नाई, मान्तर दुसरमन चो हित चो बले चिन्ता करा। 5 जसन मसीह ईशु चो बेवहार रली असने ची तुमचो बले बेवहार होओ; 6 जोन माहापुरू चो रंगरूप ने होऊन भाती बले माहापुरू चो बराबरी होतो काजे आपलो बस ने संगातोर तीज नी समझलो। 7 मान्तर आपन खुद के असन सुन करून दिलो, आउर दास चो रंगरूप धरना धरलो, आउर माने चो समान ने होऊन गेलो। 8 आउर माने चो रूप ने परकट होऊन भाती आपन खुद के दिन करलो, आउर ऐथा ले हुकुम मानु रलो कि मरना, हव, कुरूस चो मरना बले सहलो। 9 ऐई कारन माहापुरू हुनके खुबे बड़पन बले करलो, आउर हुनके हुन नाव दिलो जोन सपाय नावमन ने बड़ीया आय, 10 कि जोन सरग ने आउर धरतनी थाने आउर धरतनी चो खाले आसे, हुनमन सपाय ईशु चो नाव थाने मांडी टेक दे; 11 आउर माहापुरू बुआ चो महिमा चो काजे हरकोनी जीब अंगीकार करोत कि ईशु मसीह ची परबु आय। उजर असन बरा 12 ऐईकाजे हे मोचो लाडरामन, जोन परकार तुमी सदा ले हुकुम मानते ईलासास, असने ची ऐबे बले ना मात्र मोचो संगे रते-रते मान्तर खास करून अदायं मोचो लापी रलो थानले बले डरते आउर थर-थरते आपलो-आपलो मुक्ति चो काम पुरा करते जाआ; 13 कसनबल्लोने माहापुरू ची आय जोन आपलो अच्छा इच्छा संगे तुमचो मन ने इच्छा आउर काम, दुनो गोठमन चो करतोर असर डाललो से। 14 सपाय काम बिना घुरमुरून आउर बिना झगड़ा चो करा, 15 बल्ले तुमी बेकसूर आउर सीदा होऊन भाती टेड़ा आउर ऐड़जा लोगमन चो मंजी माहापुरू चो निसकलंक पिला बनुन राआ, जोनमन चो मंजी ने तुमी जीवना चो बचन धरून भाती जगत ने जरतो दियामन चो असन दका देऊ आहास 16 कि मसीह चो दिने मोके घमण्ड करतोर चो कारन होओ कि ना मोचो परातोर आउर मचो मसागत करतोर फकाहा होली। 17 अगर मोके तुमचो बिश्वास रूपी बलिदान आउर सेवा चो संगे आपलो लऊ बले बोहड़ाऊक पड़ो, तेबे बले मय हरिक आसे आउर तुमी सपाय चो संगे हरिक करूं आंय। 18 असने ची तुमी बले हरिक हुआ आउर मचो संगे हरिक करा। तीमुथियुस के सहरातोर 19 मोके परबु ईशु ने आशा आसे कि मय तीमुथियुस के तुमचो लगे तुरते पटायेंदें; बल्ले तुमचो हाल सुनुन भाती मोके शान्ति मिरो। 20 कसनबल्लोने मोचो लगे असन बेवहार चो कोनी निआत जोन शुद्धमन ले तुमचो चिन्ता करोत। 21 कसनबल्लोने सपाय आपलो मतलब चो डगर ने रऊ आत, ना कि ईशु मसीह चो। 22 मान्तर हुनमन के तो तुमी परकलास आउर जानुन बले गेलासास कि जसन बेटा बुआ चो संगे करू आय, असने ची हुन नगतखबर चो फयलातो ने मोचो संगे मसागत करला। 23 ऐईकाजे मोके आशा आसे कि जसन ची मोके जान पढ़े दे कि मोचो काय हाल होये दे, तेबे ची मय हुनके तुरते पटाऊन देयेंदे। 24 आउर मोके परबु ने भरसा आसे कि मय खुद बले झटके ऐयेंदें। इपफ्रुदीतुस के सहरातोर 25 मान्तर मय इपफ्रुदीतुस के जोन मोचो भाई आउर सकरमी आउर संगे लडु आउर तुमचो दूत, आउर जरूरी गोठमन ने मोचो सेवा शासन करतो बिता आय, तुमचो लगे पटातोर जरूरी समज ले। 26 कसनबल्लोने हुनचो मन तुमी सपाय ने लगु रली, ऐ लागुन हुन बाय बिकाल रते रलो कसनबल्लोने तुमी हुनचो बेमार चो हाल सुनुन रलास। 27 पक्का हुन बेमार तो होऊन जाऊ रलो ऐथा ले कि मरतो थाने रलो, मान्तर माहापुरू हुनचो थाने दया करलो, आउर मात्र हुनचेई उपरे नाई मान्तर मोचो उपरे बले करलो कि मोचो दुक उपरे दुक नी होओ। 28 ऐईकाजे मय हुनके पटातो काजे आउर बले कोशिश करले कि तुमी हुनचो ले फेर भेट करा हरिक होऊन जाआ आउर मचो बले दुक कम होऊन जाओ। 29 ऐईकाजे तुमी परबु ने हुनचो ले खुबे हरिक चो संगे भेट करा, आउर असनमन चो ईजीत करा, 30 कसनबल्लोने हुन मसीह चो काम काजे आपलो जीवमन थाने खतरा उठाऊन भाती मरना चो लगे ऐऊन जाऊ रलो बल्ले जोन कमी तुमचो बाटले मोचो सेवा ने होली हुनके पुरा करा। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation