ራእዩ ለዮሐንስ 10 - ሐዲስ ኪዳን በልሳነ ግእዝ

ምዕራፍ 10 በእንተ መልአክ አኃዜ መጽሐፍ

¹ ወእምዝ ወረደ ካልእ መልአክ ዐቢይ እምሰማይ ወይትዐጸፍ ደመና ውስተ ርእሱ ወብሩህ ገጹ ከመ ፀሓይ ወእገሪሁ ከመ አዕማደ እሳት።

² ወውስተ እዴሁ ያጸንዕ መጽሐፈ ክሥተ ወኬደ በእግሩ እንተ የማን ውስተ ባሕር ወእንተ ፀጋም ላዕለ ምድር።

³ ወጸርሐ በቃል ዐቢይ ከመ አንበሳ ዘይጥሕር ወሶበ ጸርሐ ተናገሩ ሰብዐቱ ነጐድጓድ በበ ቃላቲሆሙ በበይነ ዘሀለዎ ይጸሐፍ።

⁴ ወሰማዕኩ ቃለ ዘይቤሉ ሰብዐቱ ነጐድጓድ ወፈቀድኩ እጽሐፎ ወእምዝ መጽአ ቃል እምሰማይ ዘይብል ኅትም ዘነበቡ ሰብዐቱ ነጐድጓድ ወኢትጽሐፍ።

⁵ ወውእቱሰ መልአክ ዘርኢኩ ዘኬደ ውስተ ባሕር ወውስተ ምድር አልዐለ እዴሁ እንተ የማን ውስተ ሰማይ።

⁶ ወመሐለ በዘሕያው ለዓለመ ዓለም ዘፈጠረ ሰማየ ወኵሎ ዘውስቴቱ ወምድረ ወኵሎ ዘውስቴታ ወባሕረ ወኵሎ ዘውስቴቱ ወአልቦ እንከ መዋዕል።

⁷ ዘእንበለ መዋዕለ ቃሉ ለሳብዕ መልአክ ዘሀለዎ ይጥቃዕ ወቦቱ የኀልቅ ምስጢሩ ለእግዚአብሔር ዘአሰፈዎሙ ለአግብርቲሁ ወለነቢያቲሁ።

⁸ ወውእቱ ቃል ዘሰማዕኩ እምሰማይ ተናገረ ካዕበ ምስሌየ ወይቤለኒ ሑር ንሥኣ ለእንታክቲ መጽሐፍ ክሥት እንተ ውስተ እዴሁ ለዝክቱ መልአክ ዘኬደ ውስተ ባሕር ወውስተ ምድር።

⁹ ወሖርኩ ኀበ ውእቱ መልአክ ወእቤሎ ከመ የሀበንያ ለይእቲ መጽሐፍ ወይቤለኒ ንሥኣ ወብልዓ ወለትምረራ ለከርሥከ ወበውስተ አፉከሰ ጥምዕተ ለትኩንከ ከመ መዓር።

¹⁰ ወነሣእክዋ ለይእቲ መጽሐፍ እምነ እዴሁ ለውእቱ መልአክ ወበላዕክዋ ወኮነተኒ ጥዕምተ በውስተ አፉየ ወሶበ ውኅጥክዋ አምረረታ ለከርሥየ።

¹¹ ወይቤለኒ ሀለወከ ካዕበ ትትነበይ ለአሕዛብ ወለሕዝብ ወለበሐውርት ወለነገሥት ብዙኃን።