ወንጌል ዘማቴዎስ 9 - ሐዲስ ኪዳን በልሳነ ግእዝ

ምዕራፍ 9 በእንተ መፃጕዕ

¹ ወዐሪጎ ውስተ ሐመር ዐደወ ወበጽሐ ሀገሮ።

² ወአምጽኡ ኀቤሁ ድዉየ መፃጕዐ እንዘ ይጸውርዎ በዐራት ወርእዮ እግዚእ ኢየሱስ ሃይማኖቶሙ ይቤሎ ለውእቱ መፃጕዕ ተአመን ወልድየ ተኀድገ ለከ ኀጢአትከ።

³ ወሰሚዖሙ ጸሐፍት ወፈሪሳውያን ይቤሉ በበይናቲሆሙ ዝንቱሰ ይፀርፍ።

⁴ ወአእሚሮ እግዚእ ኢየሱስ ኅሊናሆሙ ይቤሎሙ ለምንት ትኄልዩ እኩየ በአልባቢክሙ።

⁵ ምንት ይቀልል እምብሂለ ተኀድገ ለከ ኀጢአትከ ወእምብሂለ ተንሥእ ወንሣእ ዐራተከ ወሑር ቤተከ።

⁶ ከመ ታእምሩ ከመ ብዉሕ ሎቱ ለወልደ ዕጓለ እመሕያው ይኅድግ ኀጢአተ በዲበ ምድር ወእምዝ ይቤሎ ለውእቱ መፃጕዕ ተንሥእ ወንሣእ ዐራተከ ወእቱ ቤተከ።

⁷ ወተንሢኦ ነሥአ ዐራቶ ወሖረ ቤቶ።

⁸ ወርእዮሙ ሕዝብ አንከሩ ወአእኰትዎ ለእግዚአብሔር ዘወሀበ ዘከመዝ ሥልጣነ ለሰብእ።

ዘከመ ተጸውዐ ማቴዎስ

⁹ ወኀሊፎ እግዚእ ኢየሱስ እምህየ ረከበ ብእሴ ዘስሙ ማቴዎስ እንዘ ይነብር ውስተ ምጽባሕ ወይቤሎ ትልወኒ ወተንሢኦ ተለዎ።

¹⁰ ወእንዘ ይረፍቅ ውስተ ቤት ናሁ መጽኡ ብዙኃን መጸብሓን ወኃጥኣን ወረፈቁ ምስለ እግዚእ ኢየሱስ ወአርዳኢሁ።

¹¹ ወርእዮሙ ፈሪሳውያን ይቤልዎሙ ለአርዳኢሁ ለምንት ይበልዕ ሊቅክሙ ምስለ መጸብሓን ወኃጥኣን።

¹² ወሰሚዖ እግዚእ ኢየሱስ ይቤሎሙ ሕሙማን ይፈቅድዎ ለዐቃቤ ሥራይ ወአኮ ጥዑያን።

¹³ ሑሩ ወአእምሩ ምንት ውእቱ ዘይቤ «ምጽዋተ አበድር እመሥዋዕት» እስመ ኢመጻእኩ እጸውዕ ጻድቃነ አላ ኃጥኣነ ለንስሓ።

በእንተ ጾም

¹⁴ ወእምዝ መጽኡ ኀቤሁ አርዳኢሁ ለዮሐንስ ወይቤልዎ ንሕነ ወፈሪሳውያን ንጸውም ብዙኀ ወአርዳኢከሰ በእፎ ኢይጸውሙ።

¹⁵ ወይቤሎሙ እግዚእ ኢየሱስ ኢይክሉ ደቂቁ ለመርዓዊ ጸዊመ ወላሕዎ አምጣነ ሀሎ መርዓዊ ምስሌሆሙ ወባሕቱ ይመጽእ መዋዕል አመ ይነሥእዎ ለመርዓዊ እምኔሆሙ አሜሃ ይጸውሙ።

¹⁶ ወአልቦ ዘይጠቅብ ግምደ ድርግሐ ልብስ ውስተ ስጠተ ልብስ ብሉይ እስመ ይትማላእ ሕያዎ ለልብስ፥ ወያዐብዮ ለስጠቱ።

¹⁷ ወኢይወድዩ ወይነ ሐዲሰ ውስተ ዝቅ ብሉይ ወእመአኮሰ ዝቁሂ ይነቅዕ ወወይኑሂ ይትከዐው ወዝቁሂ ይትኀጐል ወባሕቱ ለወይንሰ ሐዲስ ውስተ ዝቅ ሐዲስ ይወድይዎ ወይትዓቀቡ ክልኤሆሙ በበይናቲሆሙ።

በእንተ ወለተ መጋቤ ምኵራብ

¹⁸ ወእንዘ ዘንተ ይነግሮሙ ናሁ መጽአ አሐዱ መኰንን ወሰገደ ሎቱ እንዘ ይብል ወለትየ ይእዜ ሞተት ወባሕቱ ነዓ አንብር እዴከ ላዕሌሃ ወተሐዩ።

¹⁹ ወተንሥአ እግዚእ ኢየሱስ ወተለዎ ወአርዳኢሁኒ።

በእንተ እንተ ደም ይውኅዛ

²⁰ ወናሁ ብእሲት እንተ ደም ይውኅዛ እም ዐሠርቱ ወክልኤቱ ክረምት መጽአት ወቆመት እንተ ድኅሬሁ ወገሠሠት ጽንፈ ልብሱ።

²¹ እንዘ ትብል በልባ እምከመ ገሠሥኩ ጽንፈ ልብሱ አሐዩ።

²² ወተመይጠ እግዚእ ኢየሱስ ወርእያ ወይቤላ ተአመኒ ወለትየ ሃይማኖትኪ አሕየወተኪ ወሐይወት ይእቲ ብእሲት በይእቲ ሰዓት።

²³ ወበዊኦ እግዚእ ኢየሱስ ቤቶ ለውእቱ መኰንን ርእየ መብክያነ ወሰብአ እንዘ ይትሀወኩ ወያስቈቅዉ።

²⁴ ወይቤሎሙ ተገኀሡ እስመ አኮ ዘሞተት ሕፃን አላ ትነውም ወሰሐቅዎ።

²⁵ ወእምዘወፅኡ ሰብእ ቦአ ወአኀዛ እዴሃ ወተንሥአት ሕፃን።

²⁶ ወወፅአ ስሙዓተ ነገሩ ውስተ ኵላ ምድር።

በእንተ ክልኤቱ ዕዉራን

²⁷ ወኀሊፎ እግዚእ ኢየሱስ እምህየ ተለውዎ ክልኤቱ ዕዉራን እንዘ ይጸርሑ ወይብሉ ተሣሀለነ ወልደ ዳዊት።

²⁸ ወበዊኦ ቤተ መጽኡ ኀቤሁ እሙንቱ ዕዉራን ወይቤሎሙ እግዚእ ኢየሱስ ተአምኑሁ ከመ እክል ዘንተ ገቢረ ወይቤልዎ እወ እግዚኦ።

²⁹ ወገሠሦሙ አዕይንቲሆሙ እንዘ ይብል በከመ ሃይማኖትክሙ ይኩንክሙ።

³⁰ ወሶቤሃ ተከሥታ አዕይንቲሆሙ ወገሠጾሙ እግዚእ ኢየሱስ ወይቤሎሙ ዑቁ ኢትንግሩ ወኢ ለመኑሂ።

³¹ ወወፂኦሙ ነገሩ ለኵሉ በሓውርት።

በእንተ ዘጋኔን ጽሙም

³² ወእምዘወፅኡ እሙንቱ አምጽኡ ኀቤሁ ብእሴ ዘጋኔን ጽሙመ ወበሃመ።

³³ ወወፂኦ ጋኔኑ ነበበ ውእቱ በሃም ወሰምዐ ውእቱ ጽሙም ወአንከሩ ሰብእ እንዘ ይብሉ ግሙራ ኢያስተርአየ ዘከመ ዝ በውስተ እስራኤል።

³⁴ ወፈሪሳውያንሰ ይቤሉ በመልአኮሙ ለአጋንንት ያወፅኦሙ ለአጋንንት።

ዘከመ አንሶሰወ ውስተ ገሊላ

³⁵ ወአንሶሰወ እግዚእ ኢየሱስ ውስተ ኵሉ አህጉር ወበሓውርት እንዘ ይሜህር በምኵራባቲሆሙ ወይሰብክ ወንጌለ መንግሥት ወይፌውስ ኵሎ ድዉያነ ወኵሎ ሕሙማነ ዘውስተ ሕዝብ።

³⁶ ወርእዮ ብዙኃነ ሰብአ አምሐርዎ ወተሣሀሎሙ እስመ ስሩሓን እሙንቱ ወግዱፋን ከመ አባግዕ ዘአልቦ ኖላዊ።

³⁷ ወይቤሎሙ ለአርዳኢሁ ማእረሩሰ ብዙኅ ወገባሩ ኅዳጥ።

³⁸ ሰአልዎ እንከ ለበዓለ ማእረር ከመ ይወስክ ገባረ ለማእረሩ።