ወንጌል ዘማቴዎስ 28 - ሐዲስ ኪዳን በልሳነ ግእዝ

ምዕራፍ 28 በእንተ ትንሣኤሁ ለእግዚእነ

¹ ወሠርከ ሰንበት ለጸቢሐ እሑድ መጽአት ማርያም መግደላዊት ወካልእታኒ ማርያም ይርአያ መቃብሮ።

² ወናሁ ኮነ ድልቅልቅ ዐቢይ እስመ መልአከ እግዚአብሔር ወረደ እምሰማይ ወቀርበ ወአንኰርኰራ ለይእቲ እብን እምአፈ መቃብር ወነበረ ዲቤሃ።

³ ወርእየቱ ከመ ዘመብረቅ ወአልባሲሁኒ ጸዓዳ ከመ ዘበረድ።

⁴ ወእምግርማሁ ተሀውኩ ወኮኑ ከመ አብድንት እለ የዐቅቡ መቃብረ።

⁵ ወአውሥአ ውእቱ መልአክ ወይቤሎን ለአንስት ኢትፍርሃ አንትንሰ እስመ አአምር ከመ ኢየሱስሃ ዘተሰቅለ ተኀሥሣ።

⁶ ኢሀሎ ዝየሰ ተንሥአ በከመ ይቤ ወባሕቱ ንዓ ትርአያ መካኖ ኀበ ተቀብረ።

⁷ ወፍጡነ ሑራ ንግራሆሙ ለአርዳኢሁ ከመ ተንሥአ እምዉታን ወናሁ ይቀድመክሙ ገሊላ ወበህየ ትሬእይዎ ናሁ አይዳዕኩክን።

⁸ ወኀለፋ ፍጡነ እምኀበ መቃብር በፍርሀት ወበፍሥሓ ዐቢይ ወሮጻ ይንግራሆሙ ለአርዳኢሁ።

⁹ ወእንዘ የሐውራ ይንግራሆሙ ለአርዳኢሁ ተራክቦን እግዚእ ኢየሱስ በፍኖት ወይቤሎን በሓክን ወቀርባ ወአኀዛ እገሪሁ ወሰገዳ ሎቱ።

¹⁰ ወእምዝ ይቤሎን እግዚእ ኢየሱስ ኢትፍርሃ ሑራ ንግራሆሙ ለአኀውየ ከመ ይሑሩ ገሊላ ወበህየ ይሬእዩኒ።

¹¹ ወኀሊፎን እማንቱ አተዉ ሠገራት ሀገረ ወነገሩ ለሊቃነ ካህናት ኵሎ ዘኮነ።

¹² ወተጋብኡ ወተማከሩ ምስለ ሊቃውንት ወወሀብዎሙ ብዙኀ ወርቀ ለሠገራት።

¹³ ወይቤልዎሙ በሉ አርዳኢሁ ሌሊተ መጽኡ ወሰረቅዎ እንዘ ንነውም ንሕነ።

¹⁴ ወእምከመ ተሰምዐ ዝንቱ ነገር በኀበ መልአከ አሕዛብ ንሕነ ናአምኖ ወለክሙኒ ናድኅነክሙ ወናጸድቅ ነገረክሙ ወዘእንበለ ኀዘን ንሬስየክሙ።

¹⁵ ወነሢኦሙ ሠገራት ውእተ ብሩረ ኀለፉ ወገብሩ በከመ መሀርዎሙ ወወፅአ ዝንቱ ነገር በኀበ አይሁድ እስከ ዮም።

¹⁶ ወአርዳኢሁሰ ዐሠርቱ ወአሐዱ ሖሩ ውስተ ገሊላ ኀበ ደብር ዘአዘዞሙ እግዚእ ኢየሱስ።

¹⁷ ወሶበ ርእይዎ ሰገዱ ሎቱ ወመንፈቆሙሰ ናፈቁ።

¹⁸ ወቀርበ እግዚእ ኢየሱስ ወተናገሮሙ እንዘ ይብል ተውህበ ሊተ ኵሉ ኵነኔ ሰማይ ወምድር።

¹⁹ ሑሩ ወመሀሩ ኵሎ አሕዛበ ወእንዘ ታጠምቅዎሙ በሉ በስመ አብ ወወልድ ወመንፈስ ቅዱስ።

²⁰ ወመሀርዎሙ ይዕቀቡ ኵሎ ዘአዘዝኩክሙ ወናሁ አነ እሄሉ ምስሌክሙ በኵሉ መዋዕል እስከ ኅልቀተ ዓለም። መልአ ጽሕፈተ ብሥራቱ ለማቴዎስ ሐዋርያ አሐዱ እምዐሠርቱ ወክልኤቱ ሐዋርያት ወኮነ ዘጸሐፎ በምድረ ፍልስጥኤም በአስተሐምሞ መንፈስ ቅዱስ እምድኅረ ዕርገቱ ለእግዚእነ ኢየሱስ ክርስቶስ በአጵሮግዮን ውስተ ሰማይ በሰመንቱ ዓመት ወበቀዳሚት ዓመተ መንግሥቱ ለቀላውዴዎስ ቄሣር። ወስብሐት ለእግዚአብሔር አሜን።