ወንጌል ዘማቴዎስ 2 - ሐዲስ ኪዳን በልሳነ ግእዝምዕራፍ 2 በእንተ ምጽአተ ሰብአ ሰገል 1 ወተወሊዶ እግዚእ ኢየሱስ በቤተ ልሔም ዘይሁዳ በመዋዕለ ሄሮድስ ንጉሥ ናሁ መጽኡ መሰግላን እምብሔረ ጽባሕ ወበጽሑ ውስተ ኢየሩሳሌም። 2 እንዘ ይብሉ አይቴ ሀሎ ዘተወልደ ንጉሠ አይሁድ እስመ ርኢነ ኮከበ ዚኣሁ በምሥራቅ ወመጻእነ ከመ ንስግድ ሎቱ። 3 ወሰሚዖ ሄሮድስ ንጉሥ ደንገፀ ወተሀውከ ወኵላ ኢየሩሳሌም ምስሌሁ። 4 ወአስተጋብኦሙ ሄሮድስ ለኵሎሙ ሊቃነ ካህናት ወጸሐፍተ ሕዝብ ወተስእሎሙ ወይቤሎሙ በአይቴ ይትወለድ ክርስቶስ። 5 ወይቤልዎ በቤተ ልሔም ዘይሁዳ እስመ ከማሁ ጽሑፍ በነቢይ። 6 «ወአንቲኒ ቤተ ልሔም ምድረ ኤፍራታ ኢትቴሐቲ እምነገሥተ ይሁዳ እስመ እምኔኪ ይወፅእ ንጉሥ ዘይርዕዮሙ ለሕዝብየ እስራኤል።» 7 ወእምዝ ጸውዖሙ ሄሮድስ ለሰብአ ሰገል ጽሚተ ወተጠየቀ እምኀቤሆሙ መዋዕሊሁ በዘአስተርአዮሙ ኮከብ። 8 ወፈነዎሙ ኀበ ቤተ ልሔም ወይቤሎሙ ሐዊረክሙ ተሰአሉ ጥዩቀ በእንተ ውእቱ ሕፃን ወእምከመ ረከብክምዎ ግብኡ ኀቤየ ወዜንዉኒ ከመ እምጻእ አነሂ ወእስግድ ሎቱ። 9 ወሰሚዖሙ እምኀበ ንጉሥ ሖሩ ወናሁ ኮከብ ዘርእዩ እምሥራቅ ይመርሖሙ እስከ ሶበ አብጽሖሙ ቤተ ልሔም ወቆመ መልዕልተ በኣት ኀበ ሀሎ ሕፃን። 10 ወርእዮሙ ኮከበ ተፈሥሑ ዐቢየ ፍሥሓ። 11 ወበዊኦሙ ውስተ ቤት ረከብዎ ለሕፃን ምስለ ማርያም እሙ ወወድቁ ወሰገዱ ሎቱ ወአርኀዉ መዛግብቲሆሙ ወአብኡ ሎቱ አምኃ ወርቀ ከርቤ ወስኂነ። 12 ወነገሮሙ በሕልም ከመ ኢይግብኡ ኀበ ሄሮድስ ወእንተ ካልእት ፍኖት ገብኡ ወአተዉ ብሔሮሙ። በእንተ በአተ ሕፃን ወእሙ ውስተ ምድረ ግብፅ 13 ወእምድኅረ ኀለፉ እሉ ናሁ መልአከ እግዚአብሔር አስተርአዮ በሕልም ለዮሴፍ እንዘ ይብል ተንሥእ ወንሣእ ሕፃነ ወእሞ ወጕየይ ውስተ ብሔረ ግብፅ ወሀሉ ህየ እስከ አመ እነግረከ። 14 እስመ ሀለዎ ለሄሮድስ ይኅሥሦ ለሕፃን ከመ ይቅትሎ ወተንሢኦ ነሥአ ሕፃነ ወእሞ በሌሊት ወሖረ ብሔረ ግብፅ። 15 ወነበረ ህየ እስከ አመ ሞቱ ለሄሮድስ ከመ ይትፈጸም ዘተብህለ እምኀበ እግዚአብሔር በነቢይ እንዘ ይብል «እምግብፅ ጸዋዕክዎ ለወልድየ።» በእንተ እለ ተቀትሉ ሕፃናት 16 ወሶበ ርእየ ሄሮድስ ከመ ተሣለቁ ላዕሌሁ ሰብአ ሰገል ተምዕዐ ጥቀ ወፈነወ ሐራሁ ወአዘዘ ይቅትሉ ኵሎ ሕፃናተ ዘቤተ ልሔም ወዘውስተ ኵሉ አድያሚሃ ዘክልኤ ዓመት ወዘይንእስሂ እምኔሁ በሐሳበ መዋዕል ዘተጠየቀ እምኀበ ሰብአ ሰገል። 17 አሜሃ ተፈጸመ ዘተብህለ በኤርምያስ ነቢይ እንዘ ይብል። 18 «ቃል በራማ ተሰምዐ ብካይ ወገዐር ወሰቆቃው ራሄል እንዘ ትበኪ በእንተ ውሉዳ ወአበየት ተናዝዞ ወነጊፈ ላህ እስመ ኢኮንዋ ውሉዳ ውሉደ ወኢሀለዉ።» 19 ወመዊቶ ሄሮድስ ናሁ መልአከ እግዚአብሔር አስተርአዮ በሕልም ለዮሴፍ በብሔረ ግብፅ። 20 እንዘ ይብል ተንሥእ ወንሣእ ሕፃነ ወእሞ ወሑር ውስተ ምድረ እስራኤል እስመ ሞቱ እለ የኀሥሥዋ ለነፍሰ ዝ ሕፃን። 21 ወተንሢኦ ነሥአ ሕፃነ ወእሞ ወቦአ ውስተ ምድረ እስራኤል። 22 ወሰሚዖ ከመ አርኬላኦስ ነግሠ ለይሁዳ ህየንተ አቡሁ ሄሮድስ ፈርሀ ሐዊረ ህየ ወአስተርአዮ በሕልም ወተግኅሠ ውስተ ደወለ ገሊላ። 23 ወበጺሖ ኀደረ ውስተ ብሔር እንተ ስማ ናዝሬት ከመ ይብጻሕ ወይትፈጸም ዘተብህለ እምኀበ እግዚአብሔር በነቢይ «ከመ ናዝራዊ ይሰመይ ወልድየ።» |