ወንጌል ዘሉቃስ 17 - ሐዲስ ኪዳን በልሳነ ግእዝ

ምዕራፍ 17 ዘከመ ይመጽእ መንሱት በግብር

¹ ወይቤሎሙ እግዚእ ኢየሱስ ለአርዳኢሁ ግብር ይመጽእ መንሱት ወባሕቱ አሌ ሎቱ ለዘያመጽኣ ለመንሱት።

² እምኀየሶ ይእስሩ በክሣዱ ማኅረጸ አድግ ወያሥጥምዎ ውስተ ቀላየ ባሕር እምያስሕቶ ለአሐዱ እምእሉ ንኡሳን።

³ ዑቁ ርእሰክሙ ለእመ አበሰ ለከ እኁከ ገሥጾ በባሕቲትከ ወለእመሰ ነስሐ ኅድግ ሎቱ።

⁴ ወእመኒ ስብዐ ለለዕለቱ አበሰ ወስብዐ ለለዕለቱ ተጋነየ ኅድግ ሎቱ።

በእንተ ኀይል ዘሃይማኖት

⁵ ወይቤልዎ ሐዋርያት ለእግዚእነ ወስከነ ሃይማኖተ።

⁶ ወይቤሎሙ እግዚእ ኢየሱስ እመ ብክሙ ሃይማኖት መጠነ ኅጠተ ሰናፔ ወትብልዋ ለዛቲ ሰግላ ተመልሒ እምሥርውኪ ወተተከሊ ውስተ ባሕር ትትኤዘዝ ለክሙ።

⁷ መኑ እምኔክሙ ዘቦ ገብር ሐረሳዊ ወእመኒ ኖላዊ አቲዎ እምወፍሩ ይብሎኑ እግዚኡ ዕርግ ፍጡነ ወነዓ ርፍቅ ምስሌየ።

⁸ አኮኑ ይብሎ አስተዳሉ ሊተ ዘእዴረር ወቅንት ወመጥወኒ እስከ እበልዕ ወእሰቲ ወእምዝ ብላዕ ወስተይ አንተሂ።

⁹ ቦኑ እንጋ ምዝጋና ለውእቱ ገብር ለእመ ገብረ ግብሮ ዘአዘዞ እግዚኡ።

¹⁰ ከማሁኬ አንትሙኒ ገቢረክሙ ኵሎ ዘአዘዝኩክሙ በሉ አግብርት ፅሩዓን ንሕነ ወዘይደልወነ ለገቢር ገበርነ።

በእንተ ዐሠርቱ እለ ለምጽ

¹¹ ወእምዝ እንዘ የሐውር ኢየሩሳሌም ኀለፈ ማእከለ ሰማርያ ወገሊላ።

¹² ወእንዘ ይበውእ አሐተ ሀገረ ተቀበልዎ ዐሠርቱ ዕደው እለ ለምጽ ወቆሙ እምርኁቅ።

¹³ ወዐውየዉ ወይቤሉ ኢየሱስ ሊቅ ተሣሀለነ።

¹⁴ ወርእዮሙ ወይቤሎሙ ሑሩ ኀበ ካህን ወአፍትኑ ርእሰክሙ ወእንዘ የሐውሩ ነጽሑ።

¹⁵ ወርእዮ አሐዱ እምኔሆሙ ከመ ነጽሐ ተመይጠ እንዘ የአኵቶ ለእግዚአብሔር በዐቢይ ቃል።

¹⁶ ወሰገደ ታሕተ እገሪሁ ለእግዚእ ኢየሱስ በገጹ ወአእኰቶ ወሳምራዊ ውእቱ ብእሲሁ።

¹⁷ ወአውሥአ እግዚእ ኢየሱስ ወይቤሎ አኮኑ ዐሠርቱ እሙንቱ አንትሙ እለ ነጻሕክሙ አይቴኑ እንከ ተስዐቱ።

¹⁸ ሎሙሰ ተስእኖሙኑ ተመይጦ ወአእኵቶቶ ለእግዚአብሔር ዘእንበለ ዝንቱ ዘካልእ ሕዝቡ።

¹⁹ ወይቤሎ ተንሥእ ወሑር ሃይማኖትከ አሕየወተከ።

በእንተ ምጽአተ መንግሥተ እግዚአብሔር

²⁰ ወተስእልዎ ፈሪሳውያን ወይቤልዎ ማእዜ ትመጽእ መንግሥተ እግዚአብሔር ወአውሥአ ወይቤሎሙ ኢትመጽእ መንግሥተ እግዚአብሔር በተዐቅቦ።

²¹ ወኢይብልዋ ነያ ዝየ ወነያ ከሃክ መንግሥተ እግዚአብሔርሰ ነያ ማእከሌክሙ ይእቲ።

²² ወይቤሎሙ ለአርዳኢሁ ይመጽእ መዋዕል አመ ትፈትዉ ትርአዩ አሐተ እምነ መዋዕሊሁ ለወልደ ዕጓለ እመሕያው ወኢትሬእዩ።

²³ ወለእመ ይብሉክሙ ነዋ ዝየ ወነዋ ከሃክ ኢትፃኡ ወኢትዴግኑ።

²⁴ እስመ ከመ መብረቅ ዘይበርቅ ወያበርህ እምአጽናፈ ሰማይ እስከ አጽናፈ ሰማይ ከማሁ ውእቱ ምጽአቱ ለወልደ ዕጓለ እመሕያው።

²⁵ ወባሕቱ እምቅድመ ዝንቱ ኵሉ ብዙኀ የሐምም ወታሜክሮ ዛቲ ትውልድ።

²⁶ ወበከመ ኮነ በመዋዕሊሁ ለኖኅ ከማሁ ይከውን በምጽአቱ ለወልደ ዕጓለ እመሕያው።

²⁷ እንዘ ይበልዑ ወይሰትዩ ወያወስቡ ወይትዋሰቡ እስከ አመ ቦአ ኖኅ ውስተ ንፍቀ ታቦት ወመጽአ ማየ አይኅ ወአጥፍአ ኵሎ ኅቡረ።

²⁸ ወበከመ ኮነ በመዋዕሊሁ ለሎጥ እንዘ ይበልዑ ወይሰትዩ ወየሐንጹ ወይተክሉ ወይሠይጡ ወይሣየጡ።

²⁹ እስከ አመ ዕለተ ወፅአ ሎጥ እምሰዶም ወአዝነመ እግዚአብሔር እሳተ ወተየ እምሰማይ ወአጥፍአ ኵሎ።

³⁰ ከማሁ ውእቱ ምጽአቱ ለወልደ ዕጓለ እመሕያው ወኢይትዐወቅ።

³¹ ይእተ አሚረ ዘሀሎ ውስተ ናሕስ ወንዋዩ ውስተ ቤት ኢይረድ ይንሣእ ወዘሂ ገዳመ ሀሎ ኢይግባእ ድኅሬሁ።

³² ተዘከርዋ ለብእሲተ ሎጥ።

³³ እስመ ዘይፈቅድ ያድኅና ለነፍሱ ይገድፋ ወዘሰ ገደፋ ለነፍሱ በእንቲኣየ ያሐይዋ።

³⁴ እብለክሙ በይእቲ ሌሊት ክልኤቱ ይሰክቡ ውስተ አሐዱ ዐራት አሐደ ይነሥኡ ወካልኦ የኀድጉ።

³⁵ ወክልኤቲ የሐርጻ በአሐቲ ማሕረጽ አሐተ ይነሥኡ ወካልእታ የኀድጉ።

³⁶ ወክልኤቱ ይሄልዉ ውስተ አሐዱ ገራህት አሐደ ይነሥኡ ወካልኦ የኀድጉ።

³⁷ ወአውሥኡ ወይቤልዎኀ በአይቴኑ እግዚኦ ወይቤሎሙ ኀበ ሀሎ ገደላ ህየ ይትጋብኡ አንስርት።