ኀበ ሰብእ ዕብራውያን 2 - ሐዲስ ኪዳን በልሳነ ግእዝምዕራፍ 2 በእንተ ዘይመጽእ ዓለም 1 ወበእንተ ዝንቱ ርቱዕ ንትዐቀብ ፈድፋደ እለ ሰማዕነ ወኢንትሀየይ ከመ ኢንደቅ። 2 ወሶበኒ ኮነ ቃል ዘይቤ በእንተ መላእክት እምጸንዐ ወእምተጠየቀ ወኵሉ ዘሰምዐ ወዘዐለወ ወአበየ እምተኰነነ በርቱዕ። 3 እፎ እንከ ናመሥጥ ንሕነ ዘመጠነዝ ሕይወተ አስቲተነ እንተ ቀደመት ተነግሮ በኀበ እግዚእነ ወተጠየቀት በኀቤነ እምኀበ እለ ሰምዑ እምኔሁ። 4 እንዘ እግዚአብሔር ያርኢ ስምዖ ሎሙ ወያጸድቅ ነገሮሙ በትእምርት ወበመንክር ወዘዘዚኣሁ ኀይል ብዙኅ ላዕለ እደዊሆሙ ዘከመ ከፈሎሙ መንፈስ ቅዱስ በዘውእቱ ፈቀደ። 5 ወአኮ ለመላእክት ዘአግረረ ዓለመ ዘይመጽእ ዘበእንቲኣሁ ንነግር። 6 ወባሕቱ በከመ ስምዐ ኮነ መጽሐፍ ወይቤ «ምንትኑ ውእቱ ሰብእ ከመ ትዝክሮ ወምንትኑ ዕጓለ እመሕያው ከመ ተሐውጾ። 7 ሕቀ አሕጸጽኮ እመላእክቲከ ክብረ ወስብሐተ ከለልኮ ወሤምኮ ውስተ ኵሉ ግብረ እደዊከ። 8 ወኵሎ አግረርከ ሎቱ ታሕተ እገሪሁ» ወብሂለ ቃሉሰ አግረረ ሎቱ ኵሎ እስመ አልቦ ዘኀደገ ዘኢያግረረ ሎቱ ወይእዜሰ ኢንሬኢ ከመ ኵሎ አግረረ ሎቱ። 9 ወዘአሕጸጾሰ ሕቀ እመላእክቲሁ ናሁ ንሬኢ ከመ ኢየሱስ ውእቱ በእንተ ሕማመ ሞቱ ክብረ ወስብሐተ ዘተከለለ እስመ በጸጋ እግዚአብሔር በእንተ ኵሉ ጥዕሞ ለሞት። 10 ወይደልዎ ለውእቱ ዘበእዴሁ ኵሉ ወዘእምኔሁ ኵሉ ወብዙኃነ ውሉደ አብአ ውስተ ስብሐት መልአከ ሕይወቶሙ ከመ ይፈጽም በሕማማት። 11 እስመ ውእቱ ዘቀደሶሙ ለእሙንቱ ወእለሂ ተቀደሱ ኅቡረ እምአሐዱ ወበእንተዝ ኢየኀፍር አኀውየ ብሂሎቶሙ። 12 ወይቤ «አየድዖሙ ስመከ ለአኀውየ ወበማእከለ ማኅበር እሴብሐከ።» 13 ወካዕበ ይቤ «ነየ አነ ወደቂቅ ዘወሀበኒ እግዚአብሔር።» 14 ወካዕበ ይቤ አንሰ እትዌከል ቦቱ እስመ ደቂቅ ተሳተፉ በሥጋ ወደም ውእቱኒ ተሳተፎሙ በዝንቱ ወከመ ቢጾሙ ኮነ ሎሙ ከመ በሞቱ ይስዐሮ ለመልአከ ሞት ዘውእቱ ሰይጣን። 15 ወያዕርፎሙ ለኵሎሙ እለ በፍርሀተ ሞት ተኰነኑ በኵሉ መዋዕለ ሕይወቶሙ ወተቀንዩ ለግብርናት። 16 እስመ አኮ እመላእክት ዘነሥኦ ለዘነሥኦ ዘእንበለ ዳእሙ እምዘርዐ አብርሃም። 17 ወእንበይነ ዝንቱ ርቱዕ ይትመሰሎሙ ለአኀዊሁ በኵሉ ከመ ይኩኖሙ መሓሬ ወሊቀ ካህናት ምእመነ ዘመንገለ እግዚአብሔር ከመ ይስረይ ኀጢአተ ሕዝብ። 18 እስመ በዘአመከርዎ ወአሕመምዎ ክህለ ረዲኦቶሙ ለሕሙማን። |