ኀበ ሰብአ ገላትያ 2 - ሐዲስ ኪዳን በልሳነ ግእዝምዕራፍ 2 በእንተ ካልእት ዕርገቱ ውስተ ኢየሩሳሌም 1 ወእምድኅረ ዐሠርቱ ወአርባዕቱ ዓመት ዐረጉ ካዕበ ኢየሩሳሌም ምስለ በርናባስ ወነሣእክዎ ለቲቶ። 2 ወዐረጉ በዘአስተርአየኒ ወነገርክዎሙ ዘከመ መሀርኩ ወሰበኩ ለአሕዛብ ባሕቲትየ ለእለ ይትሔዘቡኒ ከመ ለከንቱ እረውጽ ወእትባደር። 3 ወቲቶሰ ዘምስሌየ እንዘ አረማዊ ውእቱ ኢያገበርክዎ ይትገዘር። 4 በእንተ ቢጽ ሐሳውያን እለ ተባውኡነ ከመ ያስተሐይጽዋ ለግዕዛንነ ዘረከብነ በኢየሱስ ክርስቶስ ከመ ይቅንዩነ። 5 እለ ኢነሐስቦሙ ወኢከመ ምንትኒ ኢተቀነይነ ሎሙ አሐተሂ ሰዓተ ከመ ይጽናዕ በኀቤክሙ ጽድቀ ትምህርት። 6 ወእለሰ ይብሉ መኑ ከማነ እፎ ኮኑ እሙንቱ ትካት ኢያጽሕቀኒ እንግር እስመ እግዚአብሔር ኢያደሉ ለገጸ ሰብእ ወእሉሰ በርእሶሙ አልቦ ዘወሰኩኒ ምንተኒ። 7 ዘእንበለ ዳእሙ አእሚሮሙ ከመ ተአመነኒ ትምህርትየ በኀበ አሕዛብ እለ ኢተገዝሩ በከመ ትምህርቱ ለጴጥሮስ በኀበ አይሁድ እለ ተገዝሩ። 8 ወውእቱ ዘአርድኦ ለጴጥሮስ በመልእክቱ ዘመንገለ ግዝረተ አይሁድ አርድአኒ ሊተኒ ውስተ ቍልፈተ አሕዛብ። 9 ወአእሚሮሙ ጸጋሁ ዘወሀበኒ ያዕቆብ ወኬፋ ወዮሐንስ እለ ይብልዎሙ አዕማድ እሙንቱ የማኖሙ መጠዉኒ ምስለ በርናባስ ከመ ንሳተፍ ምህሮ አሕዛብ ወእሙንቱ ይሑሩ ኀበ አይሁድ ወንሕነኒ ኀበ አረሚ። 10 ዳእሙ ከመ ንዘከሮሙ ለነዳያን ወበእንተዝ ጽሕቁ እግበሮ ለዝንቱ። በእንተ ተቃውሞቱ ኬፋሃ 11 ወአመ መጽአ ኬፋ አንጾኪያ ተቃወምክዎ ቅድመ ገጹ እስመ ግእዝዎ። 12 እስመ ዘእንበለ ይምጽኡ ዕደው እምኀበ ያዕቆብ በልዐ ምስለ አረሚ ወአመ መጽኡ ተግኅሦሙ እስመ ፈርሆሙ ለእለ እምአይሁድ። 13 ወበዝኁ እለ ገብኡ ኀበ ዝንቱ ግብር እምአይሁድ ወበርናባስኒ ኀብረ ምስሌሆሙ ወአድለወ ሎሙ። 14 ወሶበ ርኢኩ ከመ ኢያርትዑ እግሮሙ ኀበ ጽድቀ ትምህርት እቤሎ ለኬፋ በቅድመ ኵሎሙ ሶበ አንተ እንዘ አይሁዳዊ አንተ በሕገ አረሚ ትነብር ወአኮ በሕገ አይሁድ እፎ እንከ ታጌብሮሙ ለአረሚ ይትየሀዱ። 15 ወእንዘ ንሕነ እለ እምፍጥረትነ አይሁድ ወአኮ እምአሕዛብ ኃጥኣን። 16 እስመ ነአምር ከመ ኢይጸድቅ ሰብእ በገቢረ ሕገገ ኦሪት ዘእንበለ ዳእሙ በአሚን በኢየሱስ ክርስቶስ ወንሕነኒ አመነ በኢየሱስ ክርስቶስ ወበሃይማኖትነ ቦቱ ንጸድቅ ወአኮ በገቢረ ሕገገ ኦሪት እስመ በገቢረ ሕገገ ኦሪት ኢይጸድቅ ኵሉ ዘነፍስ። 17 ወእመሰ እለ ንፈቅድ ንጽደቅ በክርስቶስ ኮነ ከመ ኃጥኣን ክርስቶስ እንከ ላእከ ኀጢአትኑ እንጋ ሐሰ። 18 ወእመሰኬ ዝኰ ዘነሠትኩ ኪያሁ ክመ አሐንጽ ዐላዌ ረሰይኩ ርእስየ። 19 አንሰኬ እምሕግ ዘቀዳሚ ሞትኩ ከመ እሕየው በካልእ ሕግ ለእግዚአብሔር። 20 ወተሰቀልኩ ምስለ ክርስቶስ ሕይወትየሰ ኀልቀት ወበሕይወተ ክርስቶስ ሀለውኩ ወዘኒ ዘአሐዩ ይእዜ በሥጋየ በአሚን በወልደ እግዚአብሔር አሐዩ ዘአፍቀረኒ ወመጠወ ርእሶ በእንቲኣየ። 21 ወኢይክሕድ ጸጋ እግዚአብሔር እመሰኬ በገቢረ ሕገገ ኦሪት ይጸድቁ ለከንቱኬ ሞተ ክርስቶስ። |