ኀበ ሰብአ ኤፌሶን 5 - ሐዲስ ኪዳን በልሳነ ግእዝምዕራፍ 5 ተመስሎተ እግዚአብሔር 1 ተመሰሉ በእግዚአብሔር ከመ ውሉድ ፍቁራን። 2 ወሑሩ በተፋቅሮ በከመ አፍቀረክሙ ክርስቶስ ወመጠወ ርእሶ በእንቲኣክሙ መሥዋዕተ ወቍርባነ ለእግዚአብሔር ለመዓዛ ሠናይ። 3 ወዝሙትሰ ወኵሉ ርኵስ ወትዕግልት ኢይሰማዕ በላዕሌክሙ በከመ ይደልዎሙ ለቅዱሳን። 4 ወኢነገረ ኀፍርት ወነገረ እበድ ወነገረ ሥላቅ ዘኢይደሉ ዘእንበለ ዳእሙ አእኵቶ ህየንተ ዝ እኩይ። 5 ወዘንተ አእምሩ ከመ ኵሉ ዘማዊ ወርኩስ ወመስተዐግል ወዘያጣዑ አልቦ መክፈልት ውስተ መንግሥተ ክርስቶስ ዘእግዚአብሔር። 6 ወአልቦ ዘያስሕተክሙ በነገረ ከንቱ እስመ በእንቲኣሁ ይመጽእ መዓተ እግዚአብሔር ላዕለ ውሉደ ዐላውያን። 7 ኢትትመሰልዎሙኬ 8 እስመ ትካት ጽልመት አንትሙ ወይእዜሰ ብርሃነ ኮንክሙ በእግዚእነ። 9 ከመ ውሉደ ብርሃን ሑሩ እንከሰ እስመ ፍሬሁ ለብርሃን ኵሉ ምግባረ ሠናይ ወጽድቅ ወርትዕ። 10 ወአመክሩ ዘያሠምሮ ለእግዚአብሔር። 11 ወኢትኅበሩ ምስለ እለ አልቦሙ ፍሬ ምግባር ዘጽልመት ኵለንታሆሙ አላ ገሥጽዎሙ። 12 እስመ ዘበጽሚት ይገብሩ ኀፍረት ለነጊር። 13 ወዘሰ ክሡት ኵሉ ውስተ ብርሃን ይትዐወቅ እስመ ኵሉ ዘገሃድ ብርሃን ውእቱ። 14 እስመ ይቤ ንቃህ ዘትነውም ወተንሥእ እሙታን ወያበርህ ለከ ክርስቶስ። 15 ዑቁ እንከ ዘከመ ተሐውሩ ከመ ጠቢባን በንጽሕ ወአኮ ከመ አብዳን። 16 እንዘ ታነሐስይዎ ለዝ ዓለም እስመ እኩይ መዋዕሊሁ። 17 በእንተ ዝንቱ ኢትኩኑ አብዳነ አላ ኀልዩ ፈቃደ እግዚአብሔር። 18 ወኢትስክሩ ወይነ እስመ ምርዓት ውእቱ አላ ምልኡ መንፈሰ ቅዱሰ። 19 ወአንበቡ መዝሙረ ወስብሐተ ወማኅሌተ ቅድሳት ሰብሑ ወዘምሩ ለእግዚአብሔር በልብክሙ። 20 ወአእኵቱ ዘልፈ በእንተ ኵሉ በስመ እግዚእነ ኢየሱስ ክርስቶስ ለእግዚአብሔር አብ። በእንተ ትሕትና ወሠሪዐ ቤት 21 አትሕቱ ርእሰክሙ ለቢጽክሙ በፍርሀተ እግዚአብሔር። 22 ወአንስትኒ ይትአዘዛ ለአምታቲሆን ከመ ዘለእግዚእነ። 23 እስመ ብእሲ ርእሳ ለብእሲት ከመ ክርስቶስ ርእሳ ለቤተ ክርስቲያን ወመድኅነ ሥጋሃ። 24 ወከመ ቤተ ክርስቲያን ትትኤዘዞ ለክርስቶስ ከማሁ አንስትኒ ይትአዘዛ ለአምታቲሆን በኵሉ። 25 ዕደውኒ ያፍቅሩ አንስቲያሆሙ ከመ ክርስቶስ አፍቀራ ለቤተ ክርስቲያን ወመጠወ ርእሶ በእንቲኣሃ። 26 ከመ ይቀድሳ ወያንጽሓ በጥምቀተ ማይ ወበቃሉ። 27 ወይረስያ ሎቱ ክብርተ ለቤተ ክርስቲያኑ ከመ ኢይርከብ በላዕሌሃ ርስሐተ ወጥልቀተ ዳእሙ ከመ ትኩን ንጽሕተ ወቅድስተ። 28 ከማሁ ዕደውኒ ያፍቅሩ አንስቲያሆሙ ከመ ነፍሶሙ ዘአፍቀረ ብእሲቶ ርእሶ አፍቀረ። 29 ወአልቦ ዘይክል ጸሊአ ሥጋሁ ግሙራ ሴስዩ ወተማሕፀኑ በከመ ክርስቶስ ለቤተ ክርስቲያኑ። 30 እስመ አባለ ሥጋሁ ይእቲ። 31 ወበእንተዝ የኀድግ ብእሲ አባሁ ወእሞ ወይተልዋ ለብእሲቱ ወይከውኑ ክልኤሆሙ አሐደ ሥጋ። 32 ዐቢይ ውእቱ ዝ ነገር ወአንሰ እብሎ ላዕለ ክርስቶስ ወላዕለ ቤተ ክርስቲያኑ። 33 ወባሕቱ አንትሙኒ ኵልክሙ ከማሁ አንስቲያክሙ አፍቅሩ ከመ ነፍስክሙ ወብእሲትኒ ትፍርሆ ለምታ። |