ኀበ ሰብአ ኤፌሶን 4 - ሐዲስ ኪዳን በልሳነ ግእዝ

ምዕራፍ 4 በእንተ ጽዋዔ ምእመናን

¹ አስተብቍዐክሙ አነ ሙቁሕ በክርስቶስ ከመ ትሑሩ በዘይደልዋ ለጽዋዔክሙ ዘተጸዋዕክሙ።

² እንዘ ታቴሕቱ ርእሰክሙ በኵሉ የውሀት ወትትዔገሡ ወኦሆ ትብሉ ለቢጽክሙ ወትጽሕቁ ለተፋቅሮ ወተኀብሩ።

³ ወትትዐቀቡ በአሐዱ መንፈስ ወበማዕሠረ ሰላም።

⁴ ከመ ትኩኑ አሐደ ሥጋ ወአሐደ መንፈሰ በከመ ተጸዋዕክሙ ለአሐዱ ተስፋክሙ።

⁵ አሐዱ እግዚአብሔር ወአሐቲ ሃይማኖት ወአሐቲ ጥምቀት።

⁶ ወአሐዱ እግዚአብሔር አብ ለኵሉ ዘላዕለ ኵሉ ወእምኔሁ ኵሉ ወውእቱ ውስተ ኵሉ።

⁷ ወለለ አሐዱ እምኔነ ተውህበ ጸጋሁ በመስፈርተ ሀብቱ ለክርስቶስ።

⁸ እስመ ይቤ «ዐረገ ውስተ አርያም ፄዊወከ ፄዋ ወወሀብከ ጸጋከ ለዕጓለ እመሕያው።»

⁹ ወምንትኑ እንከ ዕርገቱ ሶበ ኢወረደ መትሕተ ምድር።

¹⁰ ዘወረደሂ ውእቱ ወዘዐርገሂ ውእቱ ወዘሀሎ መልዕልተ ሰማያት ከመ ይፈጽም ኵሎ።

¹¹ ወውእቱ ወሀበ ጸጋ ወከፈለ ወረሰየ እምሰብአ ዚኣሁ ሐዋርያተ ወእምኔሆሙ ነቢያተ ወመምህራነ ወእምኔሆሙ ኖሎተ ወእምኔሆሙ ሊቃውንተ።

¹² በዘይጸንዑ ቅዱሳን ለግብረ መልእክቱ ወለሕንጻ ሥጋሁ ለክርስቶስ።

¹³ እስከ ንከውን ኵልነ አሐደ በሃይማኖት ወበአእምሮቱ ለወልደ እግዚአብሔር ወንኩን ከመ ዘአሐዱ ብእሲ ፍጹም ብጹሐ አምጣን በዐቅመ ፍጻሜሁ ለክርስቶስ።

¹⁴ ከመ ኢንኩን እንከ ደቂቀ ዘይተነትን ወይትሐወስ ምስለ ኵሉ ነፋስ ኀበ ትምይንተ ትምህርተ ዕጓለ እመሕያው እለ ይትመነገኑ በጕሕልቶሙ ከመ ያስሕቱ።

¹⁵ አላ ንጽደቅ እንከ በተፋቅሮ ወንብዛኅ በኵሉ ዘብነ በክርስቶስ ዘውእቱ ርእስ።

¹⁶ ዘቦቱ የኀድር ኵሉ ሥጋ ወይትዋደድ በኵሉ ሥርው በበ መስፈርተ ሀብቱ ዘይትወሀብ ለለ አሐዱ መሌሊት እምነ መለያልይ በዘይልህቅ ሥጋ ወይትፌጸም ከመ ይትፈጸም ሕንጻሁ በተፋቅሮ።

ተፈልጦ እምአሕዛብ

¹⁷ ዘንተ እብል ወአሰምዕ ለእግዚአብሔር በእንቲኣክሙ ከመ ኢትሑሩ እንከ ከመ አሕዛብ እለ የሐውሩ በኅሊና ልቦሙ።

¹⁸ ወጽሉም ኅሊናሆሙ ወነኪራን እምሕይወተ እግዚአብሔር በእበዶሙ ወበጽላሌ ልቦሙ።

¹⁹ እለ ቅቡጻን ተስፋሆሙ ወመጠዉ ርእሶሙ ለሕርትምና ወለርኵስ ወለምርዓት።

²⁰ ወአንትሙሰ አኮ ከማሁ ዘተመሀርክምዎ ለክርስቶስ።

²¹ ወእመሰ አማን ትሰምዕዎ ወትትሜሀሩ በኀቤሁ ጽድቀ እስመ ጽድቅ በኢየሱስ ክርስቶስ ውእቱ።

²² አእትቱ እምላዕሌክሙ ግዕዘክሙ ዘትካት እብል በእንተ ብሉይ ብእሲ ዘይማስን በፍትወተ ስሒት።

²³ ሐድሱ መንፈሰ ልብክሙ።

²⁴ ወልበስዎ ለሐዲስ ብእሲ ዘሐደሶ እግዚአብሔር በጽድቅ ወበርትዕ ወበንጽሕ።

²⁵ ወበእንተዝ ኅድግዋ ለሐሰት ወተናገሩ ጽድቀ ኵልክሙ ምስለ ቢጽክሙ እስመ አሐዱ አባል ንሕነ።

²⁶ ተምዑ ወኢተአብሱ ወዘእንበለ ይዕርብ ፀሐይ አቍርሩ መዓተክሙ።

²⁷ ወኢተሀብዎ ፍኖተ ለሰይጣን።

²⁸ ዘይሰርቅኒ ኢይስርቅ እንከ ለይትግበር ወይጻሙ እንከ በእደዊሁ ለሠናይ በዘይረድኦ ለነዳይ።

²⁹ ወኵሉ ነገር ሕሡም ኢይፃእ እምአፉክሙ ዘእንበለ ሠናይ በዘይትሐነጽ ትካዝክሙ ከመ ይርከቡ ሞገሰ እለ ይሰምዑክሙ።

³⁰ ወኢታምዕዕዎ ለመንፈስ ቅዱስ ዘቦቱ ዐተቡክሙ አመ ድኅንክሙ።

³¹ ኵሎ መሪረ ወመዓተ ወቍጥዓ ወመርገመ ወመንሱተ ወፅርፈተ አእትቱ እምላዕሌክሙ ምስለ ኵሉ እኩይ።

³² ወኩኑ መሓርያነ ቢጽክሙ ወተጻገዉ በበይናቲክሙ በከመ ጸገወክሙ እግዚአብሔር በክርስቶስ።