ግብረ ሐዋርያት 26 - ሐዲስ ኪዳን በልሳነ ግእዝምዕራፍ 26 ዘከመ ነገረ ጳውሎስ ቅድመ አግሪጳ 1 ወይቤሎ አግሪጳ ለጳውሎስ አባሕናከ ንግር በእንተ ርእስከ ወእምዝ አንሥአ እዴሁ ጳውሎስ ወአኀዘ ይንግሮሙ። 2 ወይቤ በእንተ ኵሉ ዘይትኀሠሡኒ አይሁድ ኦ አግሪጳ ንጉሥ ብፁዕ አነ ዮም ዘበኀቤከ እትዋቀሥ። 3 እስመ ተአምር ግዕዞሙ ወተኃሥሦቶሙ ለአይሁድ ብቍዐኒ ወተዐጊሠከ አጽምዐኒ። 4 ንብረትየሰ ዘበንእስየ በውስተ ሕዝብየ ልህቁ በኢየሩሳሌም ወየአምሩኒ ኵሎሙ አይሁድ እምትካት። 5 ወየአምሩ ኵሎሙ አይሁድ እምትካት እመሰ ፈቀዱ ይኩኑ ስምዐ ከመ በሕገ አበውየ እገብር እንዘ ፈሪሳዊ አነ። 6 ወይእዜኒ በትውክልተ ተስፋ እንተ ኮነት ቀዲሙ እምኀበ እግዚአብሔር ለአበዊነ እቀውም ግሩረ ለኵነኔ። 7 እንተ ባቲ ዐሠርቱ ወክልኤቱ ሕዝበ ዚኣነ መዓልተ ወሌሊተ እንዘ ይትቀነዩ ሎቱ ተሰፈዉ በጺሖታ ወበእንተ ውእቱ ተስፋ ይትኀሠሡኒ አይሁድ ኦ ንጉሥ አግሪጳ ምንተ እንከ ትፈትሕ። 8 አኮኑ ይደሉ ንእመን ከመ እግዚአብሔር ያሐይዎሙ ለሙታን። 9 ወአነሂ አጥባዕኩ እግበር እኩየ ዲበ ስሙ ለኢየሱስ ናዝራዊ ብዙኀ። 10 ወገበርኩሂ ዘንተ በኢየሩሳሌም ወሞቃሕክዎሙ ለብዙኃን ጻድቃን አስተበዊሕየ በኀበ ሊቃነ ካህናት ከመ እቅትሎሙ። 11 ወአምጻእኩ መጽሐፈ መባሕት ለኵሉ መኳርብት ወዘልፈ አሐምሞሙ ከመ በግብር ይፅርፉ ላዕለ ስሙ ለኢየሱስ ወፈድፋደሰ አበድኩ ላዕሌሆሙ እንዘ እዴግኖሙ ውስተ አህጉር። 12 ወእንዘ አሐውር ሀገረ ደማስቆ አስተበዊሕየ በኀበ ሊቃነ ካህናት በእንተ ዝንቱ። 13 ወሶበ ይከውን ጊዜ ቀትር እንዘ ሀሎኩ ውስተ ፍኖት ኦ ንጉሥ ርኢኩ እምሰማይ በረቀ መብረቅ ዘይበርህ እምፀሐይ ወኵሉ ሰብእ ዘየሐውሩ ምስሌየ ወለልየኒ ምስሌሆሙ ወደቅነ ውስተ ምድር ኵልነ። 14 ወሰማዕኩ ቃለ ዘይብለኒ በነገረ ዕብራይስጥ ሳውል ሳውል ለምንት ትሰድደኒ ይብእሰከ ረጊጽ ውስተ ቀኖት በሊኅ። 15 ወእቤ አነ መኑ አንተ እግዚኦ ወይቤለኒ አነ ውእቱ ኢየሱስ ዘአንተ ትሰድደኒ። 16 ወባሕቱ ተንሥእ ወቁም በእገሪከ እስመ በእንተዝ አስተርአይኩከ እሢምከ ላእከ ወሰማዕተ በዘርኢከኒ ወበዘሀለወከ ትርአየኒ። 17 ወአድኅነከ እምሕዝብ ወአሕዛብ እለ እፌንወከ አነ ኀቤሆሙ። 18 ከመ ትክሥት አዕይንቲሆሙ ወትሚጦሙ እምጽልመት ውስተ ብርሃን ወእምጣዖተ ሰይጣን ኀበ እግዚአብሔር ከመ ይትኀደግ ሎሙ ኀጢአቶሙ ወይርከቡ መክፈልተ ምስለ ቅዱሳን በአሚን በስምየ። በእንተ ነገረ ትምህርቱ 19 ወይእዜኒ ኦ ንጉሥ አግሪጳ ኢክሕድኩ ዘአስተርአየኒ ሊተ እምሰማይ። 20 ወቀደምኩ ወነገርክዎሙ ለእለ በደማስቆ ወለእለ በኢየሩሳሌም ወለኵሉ በሐውርተ ይሁዳ ወለአሕዛብኒ ወመሀርክዎሙ ይነስሑ ወይትመየጡ ኀበ እግዚአብሔር ወይግበሩ ዘይደሉ ለንስሓሆሙ። 21 በእንተ ዝኬ አኀዙኒ አይሁድ በምኵራብ ወፈቀዱ ይቅትሉኒ። 22 ወአድኀነኒ እግዚአብሔር ወበጻሕኩ እስከ ዮም ወቆምኩ እንዘ እነግር ለንኡስ ወለዐቢይ ወአልቦ ባዕድ ዘመሀርኩ ዘእንበለ ዘይብሉ ነቢያት ዘሀለዎ ይኩን ወሙሴሂ ዘይቤ። 23 ከመ ይትቀተል ክርስቶስ ወያቀድም ተንሥኦ እምዉታን ወያበርህ ለሕዝብ ወለኵሉ አሕዛብ ወበሐውርት። በእንተ አውሥኦተ ፊስጦስ 24 ወዘንተ ብሂሎ ተሰጥወ መኰንን ፊስጦስ ወጸርሐ በዐቢይ ቃል ወይቤሎ ተአብድኑ ጳውሎስ አብዝኆ መጻሕፍትኬ ያዘነግዕ ልበ። 25 ወይቤሎ ጳውሎስ እበድሰ አልብየ ኦ ፊስጦስ መኰንን ዳእሙ እነግር ጽድቀ ወንጽሐ። 26 ወየአምር ሊተ ለሊሁ ንጉሥ አግሪጳ ዘበኀቤሁ ክሡተ እነግር ወይመስለኒሂ አልቦ ዘይስሕት እምዝንቱ እስመ ኢኮነ ኅቡአ በማዕዘንት። 27 ናሁ ትትአመን በቃለ ነቢያት ኦ ንጉሥ አግሪጳ! ወአአምር ከመሰ ተአምን። 28 ወይቤሎ አግሪጳ ለጳውሎስ ተኀይጠኒኑ ታብአኒ ውስተ ዐቢይ ክርስቲያን ሕቀ ክመ ዘእምአባእከኒ ውስተ ክርስቲያን ይእዜ። 29 ወይቤሎ ጳውሎስ አንሰ እጼሊ ኀበ እግዚአብሔር እመሂ በኅዳጥ ወእመሂ በብዙኅ አኮ ባሕቲትከ አላ ዓዲ ኵሎሙ እለ ይሰምዑኒ ዮም ይኩኑ ከማየ ዘእንበለ ዝ መዋቅሕት። 30 ወእምዝ ተንሥአ ንጉሥ ወመኰንን ወበርኒቄ ወዐበይቶሙ። 31 ወተግኂሦሙ በባሕቲቶሙ ተናገሩ በበይናቲሆሙ ወይቤሉ አልቦ ዘአበሰ ዝ ብእሲ በዘይመውት ወኢበዘይትሞቃሕ። 32 ወይቤሎ አግሪጳ ለፊስጦስ መፍትው እመ ፈታሕክሙ ዘንተ ብእሴ ወኀደግምዎ ይሕየው ወእመ አኮሰ ተማሐፀነ በቄሣር ወኀበ ቄሣር የሐውር ወኀበ ቄሣር ፈንዎ። |