ግብረ ሐዋርያት 2 - ሐዲስ ኪዳን በልሳነ ግእዝምዕራፍ 2 በእንተ ርደተ መንፈስ ቅዱስ 1 ወአመ ተፈጸመ መዋዕለ ጰንጠቈስጤ እንዘ ሀለዉ ኵሎሙ ኅቡረ አሐተኔ። 2 መጽአ ግብተ እምሰማይ ድምፅ ከመ ድምፀ ነፋሰ ዐውሎ ወመልአ ኵሎ ቤተ ኀበ ሀለዉ ይነብሩ። 3 ወአስተርአይዎሙ ልሳናተ እሳት ክፉላት ከመ እሳት ዘይትከፈል ወነበረ ዲበ ኵሎሙ። 4 ወተመልኡ ኵሎሙ መንፈሰ ኀይል ወአኀዙ ይንብቡ ዘዘዚኣሆሙ በነገረ ኵሉ በሐውርት በከመ ወሀቦሙ መንፈስ ቅዱስ ይንብቡ። በእንተ አሕዛብ እለ መጽኡ ለበዓል 5 ወሀለዉ በኢየሩሳሌም ሰብእ ኄራን አይሁድ ይነብሩ እምኵሉ አሕዛብ ዘመትሕተ ሰማይ። 6 ወሰሚዖሙ ዘንተ ቃለ ተጋብኡ ኵሎሙ ድንጉፃኒሆሙ ወኀጥኡ ዘይብሉ እስመ ሰምዕዎሙ ይነብቡ ኵሎሙ በነገረ በሐውርቲሆሙ። 7 ወደንገፁ ወአንከሩ ወይቤሉ አኮኑ ሰብአ ገሊላ እሉ ኵሎሙ። 8 እፎኑ እንከ ንሰምዖሙ ይነብቡ በነገረ ኵሉ በሐውርቲነ እንዘ ፍጥረትነ ጳርቴ ወሜድ ወኢላሜጤ። 9 ወእለሂ ይነብሩ ማእከለ አፍላግ ይሁዳ ወቀጶዶቅያ ወፋንጦስ። 10 ወእስያ ወፍርግያ ወጵንፍልያ ወግብጽ ወደወለ ልብያ ወእለሂ እምቀርኔን ወእለሂ መጽኡ እምሮሜ አይሁድ ፈላስያን። 11 ወእለሂ እምቀርጤስ ወዐረብ ወናሁ ንሰምዖሙ ይነብቡ በነገረ በሐውርቲነ ዕበያቲሁ ለእግዚአብሔር። 12 ወደንገፁ ኵሎሙ ወኀጥኡ ዘይብሉ ወተባሀሉ በበይናቲሆሙ ምንትኑ እንጋ ዝ። 13 ወመንፈቆሙሰ ሰሐቅዎሙ ወይቤሉ እሉሰ ጻዕፈ ጸግቡ ወሰክሩ። በእንተ ስብከተ ጴጥሮስ ቀዳሚት 14 ወቆመ ጴጥሮስ ምስለ ዐሠርቱ ወአሐዱ ወከልሐ በቃሉ ወይቤ አንትሙ ሰብአ ይሁዳ ወእለሂ ትነብሩ ኢየሩሳሌም ኵልክሙ አእምሩ ዘንተ ወስምዑኒ ቃልየ። 15 አኮ ከመ ትትሔዘብዎሙ አንትሙ ስኩራን እሙንቱ እንዘ ትብሉ እስመ ነግህ ብሔሩ ወሶቤሁ ሠለስቱ ሰዓት። 16 አላ ዝ ውእቱ ዘይቤ ኢዩኤል ነቢይ። 17 «ወይከውን እምድኅረዝ መዋዕል ይቤ እግዚአብሔር እሰውጥ እምነ መንፈስየ ዲበ ኵሉ ዘሥጋ ወይትኔበዩ ደቂቅክሙ ወአዋልዲክሙ ወወራዙቲክሙ ራእየ ይሬእዩ ወሊቃውንቲክሙ ሕልመ የሐልሙ። 18 ወላዕለ አግብርትየ ወአእማትየ እክዑ እምነ መንፈስየ ወይእተ አሚረ ይትኔበዩ። 19 ወእሁብ ትእምርተ በሰማይ በላዕሉ ወመንክረ በምድር በታሕቱ ደመ ወእሳተ ወጢሰ። 20 ፀሓይኒ ይጸልም ወወርኅኒ ደመ ይከውን ዘእንበለ ትብጻሕ ዕለተ እግዚአብሔር ዐባይ ወግርምት። 21 ወኵሉ ዘጸውዐ ስመ እግዚአብሔር ይድኅን።» በእንተ ዘአርአየ እግዚአብሔር ለሕዝቡ 22 ስምዑ ሰብአ እስራኤል ዘንተ ነገረ ኢየሱስሃ ናዝራዌ ብእሴ ዘአርአየክሙ እግዚአብሔር በኀይል ወበተአምር ወበመንክር ዘገብረ እግዚአብሔር በእደዊሁ በማእከሌክሙ ዘከመ ርኢክምዎ። 23 በሥርዐተ ምክሩ ወበአእምሮቱ ለእግዚአብሔር ወመጠውክምዎ ውስተ እደ ኃጥኣን ወሰቀልክምዎ ወቀተልክምዎ። 24 ወእግዚአብሔር አንሥኦ እምዉታን ፈቲሖ ማእሰሪሁ ለሞት እስመ ኢይክል እኂዞቶ ሞት። 25 ወዳዊትኒ ይቤ በእንቲኣሁ «ዘልፈ እሬእዮ ለእግዚአብሔር ቅድሜየ ውእቱ በኵሉ ጊዜ እስመ በየማንየ ውእቱ ከመ ኢይትሀወክ። 26 ወበእንተዝ ተፈሥሐ ልብየ ወተኀሥየ ልሳንየ። 27 ወዓዲ በተስፋሁ ኀደረ ሥጋየ እስመ ኢተኀድጋ ውስተ ሲኦል ለነፍስየ ወኢትሁቦ ለጻድቅከ ይርአይ ሙስና። 28 ወመራሕከኒ ፍኖተ ሕይወት ወአጽገብከኒ ሐሤተ ምስለ ገጽከ ወትፍሥሕት ውስተ የማንከ ለዝሉፉ።» በእንተ ዳዊት ርእሰ አበው 29 ታበውሑኒሁ እንከ ኦ ሰብእ እንግርክሙ ክሡተ በእንተ ዳዊት ርእሰ አበው ከመሂ ሞተ ወተቀብረ ወኀቤነ ሀሎ መቃብሪሁ እስከ ዮም። 30 እስመ ነቢይ ውእቱ ወአእመረ ከመ በመሐላ መሐለ ሎቱ እግዚአብሔር ከመ እምፍሬ ከርሡ ያነብር ዲበ መንበሩ። 31 አቅዲሙ አእሚሮ ነገረ ከመ ይትነሣእ ክርስቶስ እምዉታን ወከመ ኢትትኀደግ ውስተ ሲኦል ነፍስቱ ወከመሂ ኢይሬእያ ለሙስና። 32 ሎቱ ለኢየሱስ አንሥኦ እግዚአብሔር ወንሕነ ኵልነ ሰማዕቱ። 33 ወይእዜሰ ከመ በየማነ እግዚአብሔር ተለዐለ ነሢኦ እምኀበ አቡሁ ዘአሰፈወ መንፈሰ ቅዱሰ ሶጦ ለዝ ዘትሬእዩ ወዘትሰምዑ። 34 ቦኑ ዳዊት ዐርገ ሰማየ ኢይቤኑ ለሊሁ ዳዊት በመንፈስ ቅዱስ። 35 «ይቤሎ እግዚእ ለእግዚእየ ንበር በየማንየ እስከ አገብኦሙ ለጸላእትከ ታሕተ መከየደ እገሪከ።» 36 ጥዩቀ እንከ ያእምሩ ኵሉ ቤተ እስራኤል ከመ እግዚአኒ ወመሲሐኒ ረሰዮ እግዚአብሔር ለውእቱ ኢየሱስ ክርስቶስ ዘአንትሙ ሰቀልክምዎ። 37 ወሰሚዖሙ ተከሥተ ልቦሙ ወይቤልዎሙ ለጴጥሮስ ወለቢጹ ሐዋርያት ምንተ ንግበር አኀዊነ። 38 ወይቤሎሙ ጴጥሮስ ነስሑ ወተጠመቁ ኵልክሙ በስሙ ለኢየሱስ ክርስቶስ ወይትኀደግ ለክሙ ኀጢአትክሙ ወትነሥኡ ጸጋሁ ለመንፈስ ቅዱስ። 39 እስመ ለክሙ ውእቱ ተስፋሁ ወለውሉድክሙ ወለኵሎሙ እለ ርኁቃን እለ ይጼውዖሙ እግዚአብሔር አምላክነ። 40 ወባዕደኒ ብዙኀ ነገረ ነገሮሙ ወገሠጾሙ ወይቤሎሙ አድኅኑ ነፍሰክሙ እምዝ ዓለም እኩይ። በእንተ ልህቀተ ማኅበረ ክርስቲያን 41 ወተወክፉ ቃሎ ወተጠምቁ ወተወሰኩ በይእቲ ዕለት መጠነ ሠላሳ ምእት ነፍስ። 42 ወነበሩ ይፀመዱ ትምህርተ ሐዋርያት ወኅቡረ ይባርኩ ማእደ በውስተ ጸሎት። 43 ወፈርሆሙ ኵሉ ዘነፍስ ወብዙኅ ተኣምር ወመንክር ይከውን በእደዊሆሙ ለሐዋርያት። 44 ወኵሎሙ እለ አምኑ ኅቡረ ይነብሩ ወድሙር ኵሉ ንዋዮሙ። 45 ወጥሪቶሙ ይሠይጡ ወይሁቡ ለነዳያን በከመ መፍቅዱ ለለአሐዱ። 46 ወኵሎ አሚረ ይፀመዱ በአሐዱ ነፍስ ወበአሐዱ ኅሊና ውስተ ቤተ መቅደስ ወይባርኩ ማእደ በውስተ አብያት ወይሴሰዩ ሲሳዮሙ በትፍሥሕት ወበየዋሃተ ልብ ወየአኵቱ እግዚአብሔርሃ። 47 ወቦሙ ሞገስ በኀበ ኵሉ ሕዝብ ወእንተ ጸብሐት ይዌስክ እግዚአብሔር ዲቤሆሙ ለእለ የሐይዉ። |