ኀበ ሰብአ ተሰሎንቄ 2 3 - ሐዲስ ኪዳን በልሳነ ግእዝ

ምዕራፍ 3

¹ ወይእዜኒ አኀዊነ ጸልዩ ለነ ከመ ይሩጽ ቃለ እግዚአብሔር ወይሰባሕ በከመ በኀቤክሙ።

² ወከመ ንድኀን እምሰብእ እኩያን ወዐላውያን እስመ አኮ ኵሉ ዘየአምን።

³ ወእግዚአብሔርሰ ምእመን ወጻድቅ ዘያጸንዐክሙ ወየዐቅበክሙ እምኵሉ እኩይ።

⁴ ንትአመነክሙ ምስለ እግዚአብሔር ከመ ትግበሩ ዘአዘዝናክሙ ወገበርክሙሂ።

⁵ ወእግዚእነ ያርትዕ ልበክሙ ውስተ ፍቅረ እግዚአብሔር ወውስተ ተስፋሁ ለክርስቶስ።

በእንተ ረዲአ ርእስ

⁶ አኀዊነ ንኤዝዘክሙ በስመ እግዚእነ ኢየሱስ ክርስቶስ ተገኀሥዎሙ ለኵሎሙ ቢጽ እለ የሐውሩ በትምይንት ወአኮ በሥርዐት ዘሠራዕናሆሙ።

⁷ ለሊክሙ ተአምሩ ከመ ርቱዕ ትትመሰሉነ ከመ ኢሠሣዕነ ላዕሌክሙ።

⁸ ወኢበላዕነ እክለ ባዕድ በከንቱ ዘእንበለ ዳእሙ ዘንጻሙ ወንሰርሕ መዓልተ ወሌሊተ ወንትጌበር ከመ ኢናክብድ ላዕሌክሙ።

⁹ ወአኮሰ ዘኢኮነ ብዉሓነ ዳእሙ አርኣያ ከመ ንኩንክሙ ከመ አንትሙ ትትመሰሉነ።

¹⁰ ወአመሂ ሀለውኩ ኀቤክሙ ዘንተ አዘዝኩክሙ ዘኢይፈቅድ ይትቀነይ ኢይሴሰይ።

¹¹ ሰማዕነ ከመ ቦ እምውስቴትክሙ እለ የሐውሩ በሁከት ወአልቦ ዘይትቀነዩ ዓዲ መስተሓውራን።

¹² ወለእለ ከመዝ ንኤዝዞሙ ወንጌሥጾሙ በስመ እግዚእነ ኢየሱስ ክርስቶስ ከመ በየውሀት ወበጽምው ይትገበሩ ተግባሮሙ ወይሴሰዩ ሲሳዮሙ።

¹³ ወአንትሙሂ አኀዊነ ኢትትሀከዩ ገቢረ ሠናይ ኵሎ ጊዜ።

¹⁴ ወእመ ቦ ዘኢይትኤዘዝ ለቃልክሙ ወለመጽሐፍክሙ ይትፈለጥ ወኢትትሀወልዎ ከመ ይትኀፈር።

¹⁵ ወከመሰ ጸላኢ ኢትረስይዎ አላ ገሥጽዎ ከመ እኁክሙ።

¹⁶ ወውእቱ አምላከ ሰላም የሀብክሙ ሰላመ በኵሉ ጊዜ ወበኵሉ ግብር።

¹⁷ ወእግዚእነ የሀሉ ምስለ ኵልክሙ ዘንተ አምኃ ጸሐፍኩ ለክሙ በእዴየ አነ ጳውሎስ ወዝንቱ ትእምርትየ ውስተ ኵሉ መጻሕፍትየ ከመዝ እጽሕፍ።

¹⁸ ጸጋሁ ለእግዚእነ ኢየሱስ ክርስቶስ የሀሉ ምስለ ኵልክሙ፤ አሜን። ተፈጸመት ካልእት መልእክት ኀበ ሰብአ ተሰሎንቄ። ወተጽሕፈት በሎዶቅያ ወተፈነወት በእደ ጢኪቆስ። ወስብሐት ለእግዚአብሔር አሜን።