መልእክተ ጴጥሮስ 2 2 - ሐዲስ ኪዳን በልሳነ ግእዝ

ምዕራፍ 2 በእንተ ሐሳውያነ ነቢያት

¹ ወቦ ባሕቱ ሐሳውያነ ነቢያት ማእከለ ሕዝብ ከመ እለ ሀለዉ ማእከሌክሙ ወውስቴትክሙ እለ ሐሰተ ይሜህሩ ወእለ ካሕደ ያበውኡ ለሕርትምና ወይክሕድዎ ለእግዚኦሙ ዘተሣየጦሙ በደሙ ወያመጽእዎ ላዕሌሆሙ ፍጡነ ለሙስና ወለተሠርዎ።

² ወብዙኃን ሰብእ ይተልውዎሙ ለእሉ በእንተ ፍትወተ ዝሙቶሙ ወይፀርፉ ላዕለ ፍኖተ ጽድቅ።

³ ወይትካሐዱ በቃል ዘለሊሆሙ ፈጠሩ ወቦቱ የሐውሩ ወደይኖሙሰ እምፍጥረተ ዓለም ዘኢተዐርፍ ወሕርምትናሆሙ እንተ ኢትዴቅስ።

⁴ ወእግዚአብሔርሰ ለመላእክቲሁ ጥቀ አቢሶሙ ኢመሐኮሙ አላ ወደዮሙ ውስተ ጻዕረ ደይን ዘርሱን ወመጠዎሙ ይትኰነኑ ወይንበሩ ውስተ ጻዕረ ደይን።

⁵ ወለዓለምሰ ቀደምት ኢመሐኮሙ አላ አትረፈ ሰማኒተ ነፍሰ ምስለ ኖኅ ዘዐቀባ ለጽድቅ ከመ ይኩን ዜናዌ በጽድቅ ወለባዕዳንሰ ሰብእ ረሲዓን ፈነወ አይኀ ላዕሌሆሙ።

⁶ ወለአህጉረ ሰዶምኒ ወገሞራ አውዐዮን ወገፍትዖን ወከመዝ ኰነኖሙ ወአርኣያ ረሰዮሙ ለእለ በደኃሪ መዋዕል ለኃጥኣን።

⁷ ወለጻድቅሰ ሎጥ ዘይትገፋዕ እምእለ ይኤብሱ በምግባረ ዝሙቶሙ አድኀኖ።

⁸ ወእንዘ ይሬኢ ወይሰምዕ ጻድቅ ወኅዱር ምስሌሆሙ ወዕለተ እምዕለት ያጼዕርዋ ለነፍሱ ጻድቅት በእከየ ምግባሮሙ።

⁹ ናሁኬ አእመርነ ከመ እግዚአብሔር ይክል አድኅኖቶሙ እምነ መንሱት ለጻድቃን ወለኃጥኣንሰ ዕለተ ደይን ትጸንሖሙ ለተጽዕሮ።

¹⁰ ወፈድፋደሰ ለእለ ይተልውዋ ድኅሬሃ ለፍትወቶሙ ወያጌምንዎ ለሥጋሆሙ ወያስተሐቅርዎ ለፈጣሪሆሙ ኅቡላን ወዝሉፋን እለ ኢይደነግፁ ከመ ይፅርፉ ላዕለ ስብሐቲሁ።

¹¹ ዘውእቱ ኀበ መላእክት እለ ልዑላን እሙንቱ እምኔሆሙ በኀይል ወበጽንዕ ወኢይክሉ ተዐግሦ ከመ ያብጽሑ ላዕሌሆሙ ደይነ ፅርፈቶሙ።

¹² ውእቶሙኬ ከመ እንስሳ ዘአልቦ ቃል ዘይትወለድ ለሙስና ወለተሠርዎ እስመ ይፀርፉ ላዕለ ዘኢየአምሩ ለሕርትምናሆሙ ወሎሙ በሙስናሆሙ ዐስበ ዐመፃ።

¹³ ወአስተሐወዝዋ ለተደልዎ ስታየ ዕለቶሙ ወይበልዑ እንዘ ሕብቁቃን ወርኩሳን እለ ኢይጸግቡ ወይትጓሐለዉ በፍቅሮሙ ወይትሜክሑ ለቢጾሙ ከመ ዘሠናይ ምግባሮሙ።

¹⁴ ወምሉእ ውስተ አዕይንቲሆሙ ዝሙት ወኀጢአት እንተ አልባቲ ዘይገሀግሃ ወያደነግፁ ነፍሰ ሰብእ እለ ስጡሕ ልቦሙ ወትዕግልት ምግባሮሙ ወየኀድጉ መርገመ ለውሉዶሙ።

¹⁵ ወስሕትዋ ለፍኖተ ጽድቅ ወተለውዋ ለፍኖተ በለዓም ወልደ ባሶር ዘአፍቀራ ለዐስበ ዐመፃ።

¹⁶ ወተዛለፎ ለበለዓም በኀጢአቱ ዘኢይነብብ አድግ በቃለ ዕጓለ እመሕያው ተናገረ ወከልኦ ለነቢይ እበዲሁ።

¹⁷ እሉ እሙንቱ ዐዘቅት ንጽፍት ወጊሜ ዘነፋስ ይዘርዎ እለ ለደይነ ጽልመት ዘለዓለም የዐቅብዎሙ።

¹⁸ እስመ ዐበይተ ጌጋይ ነበቡ ወያደነግፁ ነፍሰ ሰብእ በእንተ ፍትወተ ዝሙቶሙ ዘሥጋሆሙ ሰብእ እለ ኅዳጠ አምሰጡ ወገብኡ ውስተ ጌጋይ።

¹⁹ እለ ሕገ ግዕዛን ተምህሩ ወለሊሆሙኒ ቅኑያን ለሕርትምና እስመ ኵሉ ለዘተአዘዘ ውእቱ ይትቀነይ።

²⁰ እስመ ጐዩ እምኀጢአቱ ለዝንቱ ዓለም በአእምሮቱ ለእግዚእነ ወመድኀኒነ ኢየሱስ ክርስቶስ ወገብኡ ዳግመ ወተፀፍሩ ወተቀንዩ ሎቱ ወይከውኖሙ ደኃሪ ጌጋዮሙ እምነ ቀዲሙ ዘየአክዮሙ።

²¹ እምኀየሶሙ ሶበ ኢያእመርዋ ለፍኖተ ጽድቅ እምያእምርዋ ወይግብኡ ድኅሬሆሙ እምእንተ ተውህበት ሎሙ ትእዛዝ ቅድስት።

²² ወበጽሐቶሙ አምሳል እንተ መሰሉ በጽድቅ እንተ ይቤ ከልብ ገብአ ዲበ ቅያኡ ወሐራውያኒ ተኀፂባ ገብአት ዲበ ጸብር።