ኀበ ሰብአ ቆሮንቶስ 2 9 - ሐዲስ ኪዳን በልሳነ ግእዝ

ምዕራፍ 9 በእንተ መልእክተ ቅዱሳን

¹ ወበእንተሰ መልእክተ ቅዱሳን ብዙኅ ብየ ዘእጽሕፍ ለክሙ።

² እስመ አእመርኩ ከመ ትጽሕቁ አንትሙ ወበእንተዝ ንእድኩክሙ በኀበ ሰብአ መቄዶንያ ወእቤሎሙ እስመ ሰብአ አካይያ አስተዳለዉ እምቀዳሚ ዓም ወናሁ አጽሐቆሙ ተቃሕዎተ ዚኣክሙ ለብዙኃን ሰብእ።

³ ወፈነውናሆሙ ለአኀው ከመ ኢይኩነነ ሐሰተ በኀቤሆሙ ዘንእድናክሙ በዝንቱ ወከመ ይርከቡክሙ ድልዋኒክሙ በከመ ንቤሎሙ።

⁴ ወእመቦ ከመ መጽኡ ምስሌየ ሰብአ መቄዶንያ ወረከቡክሙ ዘእንበለ ታስተዳልዉ ንትኀፈር ንሕነኒ ወለክሙኒ ከመ ኢይበሉክሙ አስተትክሙ።

⁵ አስተበቍዐክሙ አኀዊነ ግብረ ረስይዎ ወአስተዳልዉ ውእተ በረከተክሙ ወሥርዑ ዘነገርኩክሙ እንተ ባቲ ድልዋን አንትሙ ወከመዝ ረስይዎ ከመ ዘበረከት ወአኮ ከመ ዘበትዕግልት።

⁶ ወዘሰ ጠዊዖ ይዘርዖ ለዝንቱ ከማሁ ይጠውዖ ሎቱኒ ማእረሩ ወዘሰ በበረከት ይዘርዕ በበረከት የአርር።

⁷ ወኵሉ በከመ አደሞ ልቡ ይግበር እስመ ኢኮነ በአገብሮ ዳእሙ በፍሥሓ ለየሀቡ እስመ ከማሁ ያፈቅር እግዚአብሔር።

⁸ ወይክል እግዚአብሔር አፈድፍዶ ለክሙ ኵሎ በረከቶ ከመ ያብዝኅ ለዝሉፉ ወታተርፍዎ ለኵሉ ወታፈደፍዱ በገቢረ ሠናይ።

⁹ በከመ ይቤ መጽሐፍ «ዘረወ ወወሀበ ለነዳይ ወጽድቁኒ ይነብር ለዓለም።»

¹⁰ ወውእቱ ይሁብ ዘርዐ ለዘራዒ ወእክለ ለሲሳይ ወያሠምር ወያበዝኅ ለክሙ ማእረረ ጽድቅክሙ።

¹¹ ከመ ትብዐሉ በኵሉ ትፍሥሕት እንተ ትገብር ለክሙ አኰቴተ እግዚአብሔር በእንተ ብዙኃን።

¹² እስመ ዛቲ መልእክተ ዝንቱ ግብር አኮ ለዝንቱ ባሕቲቱ ዘታሰልጥ እስመ ትፌጽም ሎሙ ተጽናሶሙ ለቅዱሳን ዓዲ ታፈደፍድ አኰቴተ እግዚአብሔር በላዕለ ቅዱሳን።

¹³ ወየአኵትዎ ለእግዚአብሔር በመከራሃ ለዛቲ ሃይማኖትክሙ እስመ ተአዘዝክሙ ለመልእክተ ክርስቶስ ወኀበርክሙ ተፈሢሐክሙ ወአስተዋፃእክሙ ኵልክሙ።

¹⁴ ወእሙንቱኒ ይጼልዩ በእንቲኣክሙ ወይፈትዉ ይርአዩክሙ በእንተ ጸጋ እግዚአብሔር ዘላዕሌክሙ።

¹⁵ እኩት እግዚአብሔር በእንተ ጸጋሁ እንተ ኢትተረጐም ወትመጽእ አመ ኢተሐዘብዋ።