ኀበ ሰብአ ቆሮንቶስ 1 2 - ሐዲስ ኪዳን በልሳነ ግእዝ

ምዕራፍ 2 በእንተ አርእዮ መንፈስ ቅዱስ ወኀይል

¹ ወአነሂ ሶበ መጻእኩ ኀቤክሙ አኀዊነ አኮ በኂጣን ወበተጥባበ ነገር ዘመጻእኩ እምሀርክሙ ትምህርተ እግዚአብሔር።

² ወኢሐዘብኩ እስማዕ በላዕሌክሙ ካልአ ነገረ ዘእንበለ ኢየሱስ ክርስቶስ ዘተሰቅለ።

³ ወአነሂ በድካም ወበፍርሃት ወበረዓድ መጻእኩ።

⁴ ወቃልየኒ ወትምህርትየኒ ኢኮነ በተየውሆ ወበኂጣነ ተጥባበ ነገረ ሰብእ ዳእሙ በአርእዮ መንፈስ ቅዱስ ወኀይል።

⁵ ከመ ኢይኩን ሃይማኖትክሙ በጥበበ ሰብእ ዘእንበለ በኀይለ እግዚአብሔር።

በእንተ ጥበብ ዘበአማን

⁶ ጥበበ ንነግሮሙ ለጠቢባን ወአኮ ጥበበ ዝ ዓለም ወኢጥበበ መላእክተ ዝንቱ ዓለም ዘሀለዎሙ ይሰዐሩ ዘንነግሮሙ።

⁷ ዘእንበለ ጥበበ እግዚአብሔር ዘንነግር ዘኅቡእ ወክቡት ጥበብ ዘበአማን ዘአቅደመ እግዚአብሔር ሐድሶቶ ወአጽንዖቶ እምቅድመ ይትፈጠር ዓለም ዘሠርዐ እግዚአብሔር ለክብረ ዚኣነ።

⁸ ዘኢየአምርዎ መላእክተ ዝ ዓለም ወሶበሰኬ አእመሩ እምኢሰቀልዎ ለእግዚአ ስብሐት።

⁹ ወባሕቱ አኮኑ ከመዝ ይቤ መጽሐፍ «ዘዐይን ኢርእየ ወእዝን ኢሰምዐ ወውስተ ልብ ሰብእ ዘኢተኀለየ ዘአስተዳለወ እግዚአብሔር ለእለ ያፈቅርዎ።»

¹⁰ ወለነሰ ከሠተ ለነ እግዚአብሔር በመንፈሱ እስመ መንፈስ ቅዱስ የኀሥሥ ኵሎ ማዕምቅቲሁ ለእግዚአብሔር።

¹¹ መኑ ብእሲ ዘየአምር ዘውስተ ልበ ሰብእ ዘእንበለ መንፈሱ ለሰብእ ዘላዕሌሁ ወከማሁኬ ለእግዚአብሔርኒ አልቦ ዘየአምር ኅሊናሁ ዘእንበለ መንፈሱ ለእግዚአብሔር።

¹² ወንሕነሰኬ ኢኮነ ዘነሣእነ መንፈሰ ዝ ዓለም ወባሕቱ ነሣእነ መንፈሰ ዘእምኀበ እግዚአብሔር ከመ ናእምር ዘወሀበነ እግዚአብሔር ጸጋ።

¹³ ወዝንቱኒ ነገርነ ኢኮነ ትምህርተ ዕጓለ እመሕያው ወኢኮነ ጥበበ ነገር ዘእንበለ ትምህርተ መንፈስ ቅዱስ ወጥበብ መንፈሳዊ ለመንፈሳውያን እለ ይፌክሩ ዘመንፈስ።

¹⁴ ወለሰብእሰ ዘነፍስ ኢይኤድሞ ዘመንፈስ ወኢይትዌከፎ እስመ እበደ ይመስሎ ወኢይክል ያእምር ከመ በመንፈስ ቅዱስ ይትሐተት።

¹⁵ ወዘሰ ቦ መንፈስ ቅዱስ ኵሎ ይትኃሠሥ ወሎቱሰ አልቦ ዘይትኃሠሦ።

¹⁶ መኑ የአምር ኅሊናሁ ለእግዚአብሔር ወመኑ መማክርቲሁ ንሕነሰኬ ኅሊናሁ ለክርስቶስ ብነ።