فیلیپیان 4 - کیتاب مقدّس به گیلکی (رشتی)

¹ پس، اَی می جانٚ دیلٚ برأرأن کی موشتاقم شمرَ بیدینم، اَی شومأن کی می شادی و می سرٚ تاجیدی، اَی عزیزأن، اَطویی در خوداوند قایم بِئسید.

آخری اندرزأن

² اِفُودیه جأ خوأهش کونم و سینتیخی جأ ایلتماس کونم کی در خوداوند ایجور نظر بدأرید.

³ و تی جأیم، اَی وفادارٚ همکار، خوأهش کونم کی اَ دوتأ بانویَ کومک بوکونی، چره کی اَکْلیمِنتُس و الباقی‌یٚ می همکارأنٚ اَمرأ کی اوشأنٚ نام دفترٚ حیاتٚ دورون بینیویشته بوبوسته، می اَمرأ دوش به دوش خوروم خبرٚ کارٚ وأسی بجنگستید.

⁴ همیشه در خوداوند شاد بیبید؛ ایوار دِه گم: شاد بیبید.

⁵ وئلید شیمی مولایمت همه کسٚ رِه آشکارَ به. خوداوند نزدیکه.

⁶ هیچی وأسی دیل نیگران نیبید، بلکی همه چی وأسی دوعا و خوأهش تمنا اَمرأ، هَطویم شکرگزاری مره، شیمی خوأسته‌یأنَ خودایَ بیگید.

⁷ اَطویی خودا آرامش کی تومامٚ عقلٚ جأ بوجورتره، شیمی دیل و فیکرَ در مسیح عیسی حفظَ کونه.

⁸ آخرٚ سر، اَی برأرأن، هر چی کی راسته، هر چی کی سرتره، هر چی کی دوروسته، هر چی کی پاکه، هر چی کی دوس دأشتنی‌یه، هر چی کی شأ اونٚ خُبی‌یَ گفتن و هر چی کی عالی و قابلٚ ستایش کودنه، اوشأنٚ رِه عمیق فیکر بوکونید.

⁹ اونچی کی می جأ بامُختیدی و قوبیل بوکودید و هر چی کی می جأ بشتأوستیدی و یا می جأ بیده‌ییدی، هونَ عمل بوکونید، کی خودایٚ آرامش شیمی اَمرأ ایسِه.

هدیه‌یأنٚ وأسی تشکر کودن

¹⁰ در خوداوند خیلی خوشحالم کی بیلاخره ایوار دِه شیمی فیکر و ذکر کی می ایحتیاجأنٚ وأسی بو، گول بوکوده. اَنم بگم شومأن همشک می فیکر بید، ولی مجال نأشتیدی کی اونَ نیشأن بدید.

¹¹ اَنَ ایحتیاجٚ وأسی نگم، چره کی بامُختم کی هر حالٚ میأن قانع ببم.

¹² فقیرْ بوستنٚ معنی‌یَ دأنم، هَطویم ناز و نعمتٚ میأن زندگی کودنَ. هر وضع و حالٚ دورون، چوطو زندگی کودنٚ رمز و رازَ یاد بیگیفتم، سِئری یا ویشتأیی میأن، دارایی و نداری میأن.

¹³ همه چیزٚ قودرتَ دأرم در اونْ کی مرَ قوّت فأدٚه.

¹⁴ ولی بازم لطف بوکودیدی کی می زحمتأنٚ دورون شیریک بوبوستید.

¹⁵ شومأنم، اَی فیلیپی مردومأن، خُب دأنیدی کی اوّلٚ روزأنی کی خوروم خبرَ ایمأن بأوردیدی، بعدٚ اَنکی مقدونیه جأ بوشوم، هیتّأ کلیسا جز شومأن فأدن فگیرٚ رِه می اَمرأ شیریک نوبوسته.

¹⁶ چره کی حتی او زمأتی کی تَسالونیکی ایسَه‌بوم، چن دفعه می ایحتیاجأنٚ رفع کودنٚ وأسی اوسه کودید.

¹⁷ نه اَنکی هدیه فیگیفتنٚ دونبأل بِئسم، بلکی اونٚ دونبالم کی شیمی حیسابٚ سر سود ایضافَه به.

¹⁸ تومامٚ هدیه‌یأن مرَ فأدَه بوبوستیدی و می ایحتیاجٚ جأ ویشتر دأرم. اَسأ کی شیمی اوسه کوده کومکأنَ اِپافْرودیتوسٚ جأ فیگیفتم، همه چی جأ زیاد دأرم. شیمی هدیه، خوشبو عطر و او قوبیل بوبوسته قوربانی‌یی ایسه کی خودایَ خوشحالَ کونه.

¹⁹ و می خودا تومامٚ شیمی نیازأنَ خو پور جلالٚ ثروتٚ اَمرأ در مسیحْ عیسی، برطرف کونه.

²⁰ خودا کی اَمی پئره، تا اَبدالاباد جلال بیأفه. آمین.

آخری سلام رسأنئنأن

²¹ تومامٚ موقدّسٚ آدمأنی بنامٚ مسیحْ عیسی سلام برسأنید. برأرأنی کی می اَمرأییدی شمرَ سلام رسأنیدی.

²² اَیه تومامٚ موقدّسٚ آدمأن شِمرِه سلام رسأنیدی، بخوصوص اوشأنی کی قیصرٚ دربارٚ شینیدی.

²³ خوداوندْ عیسی مسیحٚ فیض، شیمی روحٚ اَمرأ ببه. آمین.