فیلیپیان 3 - کیتاب مقدّس به گیلکی (رشتی)

اینسأنی ایفتخارأنَ تکیه کودن دوروست نی‌یه

¹ دِه می برأرأنٚ رِه بگم، در خوداوند شاد بیبید! اَ گبأنَ دوواره نیویشنْ مِره سخت نی‌یه بلکی شیمی ایطمینأنٚ وأسی‌یه:

² شیمی حواس به او سکأن بمأنه! کسأنی جأ کی اوشأنٚ کارْ شرارته، فاصله بیگیرید! اوشأنی جأ کی ختنه کودنٚ رِه هَچین تأکید کونیدی، دوری بوکونید!

³ چره کی رأس رأسی ختنه بوبوسته‌یأن اَمأنیم کی خودا روحٚ اَمرأ عیبادت کونیمی، و اَمی ایفتخار عیسی مسیح ایسه و اَمی اینسأنی کارأن و سنّتأن تکیه نوکونیم

⁴ اگه چی من ایتأ عالمه خوروم دلیل دأرم کی تأنم اَ چیزأنَ تکیه بوکونم. بس چی! اگه هر کی گومان کونه کی خوروم دلیلأن دأره کی بتأنه اَجور اینسأنی کارأن و سنّتأنَ تیکه بوکونه، می دلیلأن قایم‌تریدی:

⁵ هشت روزٚ زأی بوم کی ختنه بوبوستم، ایسرائیلٚ قومٚ جأیم، بنیامینٚ قبیله شینم، عیبرانی زأی، جٚه عیبرانی پئر و مار؛ شریعتٚ ایجرا کودنٚ وأسی، فریسی؛

⁶ غیرتٚ جأیم کی دِه وأنورس، کلیسایَ اذیت و آزار بوکودم؛ شریعت و پارسایی نیگاهٚ اَمرأیم بی‌عیب.

⁷ ولی اونچی کی مِره سود بو، مسیحٚ وأسی ضرر بحیساب بأوردم.

⁸ بلکی وختی هر چی‌یَ می خوداوند، مسیحْ عیسی شنأختٚ پیله ارزشٚ اَمرأ موقایسه کونم، دینم اوشأن هَچین ضرریدی، کی اونٚ وأسی همه چی‌یَ جٚه دس بدَم. رأس رأسی، اَشأن همه‌تأنَ کثافت بحیساب اَورم کی مسیحٚ بدس بأورم

⁹ و در اون بیأفته ببم، نه خودمٚ پارسایی اَمرأ کی شریعتٚ جأ ایسه، بلکی او پارسایی‌یی کی مسیحَ ایمأن اَوردنٚ جأ بدس اَیه، او پارسایی‌یی کی خودا جأ ایسه و اونٚ پایه ایمانه.

¹⁰ خوأیم مسیح و اونٚ قیام کودنٚ قوّتَ بشنأسم و اونٚ درد و رنجٚ اَمرأ شریکَ بم و اونٚ مرگٚ مره ایتأ ببم،

¹¹ کی هر جور بوبوسته مورده‌یأنٚ قیام کودنَ بدس بأورم.

خطٚ پایانٚ فأرسئنٚ رِه حقّٚ سعی کودن

¹² نوگفتَن‌درم کی هَه الأن تومامٚ اَشأنَ بدس بأوردم یا کامیلَ بوستم، بلکی مرَ برم جُلُو کی او چیزی‌یَ بدس بأورم کی مسیحْ عیسی اونٚ رِه مرَ بدس بأورده.

¹³ برأرأن، گومان نوکونم هنوز اونَ بدس بأورده‌بیم؛ ولی ایتأ کار کونم، و اون اَنه کی اونچی کی پوشتٚ سر نهَه جٚه خأطر برم و مرَ فأکشم اونچی طرف کی مرَ پیش دٚرٚه،

¹⁴ خطٚ پایأنٚ فأرسئنٚ رِه حقّٚ سعی زنم، کی پیله دعوتٚ جایزه بدس بأورم کی خودا اونٚ رِه در مسیح عیسی مرَ دوخوأده.

¹⁵ تومامٚ اَمأنی کی بالغیم وأستی اَطو فیکر بوکونیم؛ و اگه در موردٚ ایتأ موضوع ایجور دیگه فیکر کونیدی، هَنم خودا شِمرِه نیشأن دهه.

¹⁶ مهم اَنه کی هر مقام فأرسه‌ییم، هونٚ موطابیق رفتار بوکونیم.

¹⁷ اَی برأرأن، کس‌کسٚ اَمرأ می جأ سرمشق اوسأنید، و شیمی فیکر و ذکرَ کسأنی رو بنید کی اَمی مأنستن، ینی او اولگویی کی اَمی جأ دأریدی، رفتار کودَن‌درید.

¹⁸ چره کی هوطویی کی خیلی شمرَ بوگفتم و الأنم اَرسو فوکودنٚ اَمرأ وأگویا کونم، خیلی‌یأن مسیحٚ صلیبٚ دوشمنأنٚ مأنستن زندگی کونیدی.

¹⁹ اَجور آدمأنٚ آخر و عاقبت هلاکَ بوستنه. اوشأنٚ شکم اوشأنٚ خودایه و ننگٚ چیزأنٚ رِه گولاز کونیدی و اوشأنٚ فیکرأن فقط زیمینی چیزأنٚ سر نهَه.

²⁰ ولی اَمأن آسمانٚ شینیم و تومامٚ ایشتیاقٚ اَمرأ اینتظار کشیم کی اونی کی اَمرَ نجات دهه ینی اَمی خوداوند عیسی مسیح، جٚه اویه ظوهور بوکونه.

²¹ اون او قوّتٚ اَمرأ کی اونَ قادر کونه کی همه چی‌یَ خو فرمان بأوره، اَمی کم ارزشٚ جانأنَ تبدیل کونه کی خودشٚ پور جلالٚ جانٚ مأنستن بیرون بأیه.