فیلیپیان 2 - کیتاب مقدّس به گیلکی (رشتی)

عیسی مسیحٚ فروتنی جأ سرمشق اوسأدن

¹ پس اگه مسیح شیمی دیلَ گرمَ کونه، اگه اونٚ موحبت شیمی دیل تسلایه، اگه روح‌القدسٚ اَمرأ ریفاقت دأریدی و اگه رحم و دیلسوجی دأریدی،

² بأیید می خوشحالی‌یَ کامیلَ کونید و کس‌کسٚ اَمرأ ایجور فیکر بوکونید و کس‌کسَ موحبت بوکونید، هم دیل و هم نظر بیبید.

³ هیتّأ کارَ پست و مقام یا غرورٚ وأسی انجام ندید، بلکی فروتنی اَمرأ الباقی‌یَ شیمی جأ بهتر بدأنید.

⁴ هیتّأ جٚه شومأن فقط خو نفعٚ رِه فیکرَ نوکونه، بلکی دیگرأنٚ فیکرم ببه.

⁵ شومأنم هوطو فیکر بوکونید کی عیسی مسیح فیکر کودی:

⁶ اونی کی خودا اَمرأ همذات بو، جٚه اَنکی خودا اَمرأ برابر بو نخوأسته خو نفعٚ وأسی ایستفاده بوکونه،

⁷ بلکی خورَه خألِه کوده و غولامی ذاتَ قوبیل بوکوده و اینسأنٚ شکل بوبوسته

⁸ و اینسأنی شکلٚ دورون نمایانَ بوستنٚ اَمرأ خورَه خوار و خفیفَ کوده و تا مرگ، حتی صلیبٚ سر مردنٚ رِه موطیع بوبوسته.

⁹ پس خودایم اونَ بحیساب سربولندَ کوده و ایتأ نام اونَ ببخشه کی هر نامٚ جأ بوجورتره

¹⁰ کی هر زانویی عیسی نامٚ وأسی بچٚمٚه، آسمانٚ دورون، زیمینٚ سر و زیمینٚ جیر،

¹¹ و هر زوانی ایعتراف بوکونه کی عیسی مسیح خوداوند ایسه، کی خودای پئرٚ نام جلال بیأفه.

ستاره‌یأنٚ مأنستن نورانی

¹² پس اَی شومأنی کی مِره عزیزیدی، هوطویی کی همیشه ایطاعت کودیدی، نه فقط می ورجأ بلکی حتی الأن کی شیمی ورجأ نئسَم خیلی ویشتر ترس و لرزٚ اَمرأ شیمی نجاتَ عمل بوکونید؛

¹³ چره کی خودایه کی خو کارٚ اَمرأ هر چی وأسی کی اونَ خوشحالَ کونه، هم ایراده و هم اونٚ انجام دَئنٚ قوّتَ در شومأن بوجود اَوره.

¹⁴ هر کاری‌یَ بی غُرغُر و دعوا مورافه انجام بدید،

¹⁵ کی بی غلٚ غش و بی شیله پیله و خودا بی‌عیب و ایرادٚ زأکأن بیبید، نسلی دورون کی کج شوئون‌دره و جٚه رأ بٚدٚره کی شومأن اوشأنٚ میأن هَچین ستاره‌یأنٚ مأنستن اَ دونیا دورون نور دتأوأنیدی،

¹⁶ هَطویی کی زندگی‌بخشٚ کلامٚ قایم دأریدی. اَطویی، تأنم مسیحٚ روزٚ دورون ایفتخار بوکونم کی الکی نودُوٚستم و هَچین زحمت نکشئم.

¹⁷ ولی اگرم هوطو کی قوربانی‌یأنٚ سر فوکودنی پیش‌کشی شراب فوکودیدی، می خون او شرابٚ مأنستن شیمی ایمأنٚ ختمتٚ رِه فٚوٚه، خوشحالم و شیمی همه‌تأنٚ اَمرأ شادی کونم.

¹⁸ و شومأنم وأستی هَطو خوشحال بیبید و می اَمرأ شادی بوکونید.

تیموتائوس و اِپافْرودیتوس

¹⁹ اومید دأرم خوداوندْ عیسی خوأست و ایراده اَمرأ هَه روزأن تیموتائوسَ اوسه کونم شیمی ورجأ کی شیمی خبر احوالٚ اشتأوستنٚ اَمرأ می دیل بوجور بأیه.

²⁰ چره کی هیکسَ نأرم کی می اَمرأ همدیل ببه و دیل و جانٚ مره شیمی فیکر ببه.

²¹ چره کی هر کی خو نفعٚ دونبأل دره، نه عیسی مسیحٚ کارأنٚ دونبأل.

²² ولی شومأن دأنیدی کی تیموتائوس خو ایمتحانَ پسَ دَه، چره کی هوطو کی ایتأ پسر خو پئرٚ اَمرأ کار کونه، می اَمرأ خوروم خبرٚ کارٚ وأسی ختمت بوکوده.

²³ پس اومید دأرم هَطو تأ می تکلیف روشنَ به، اونَ شیمی ورجأ اوسه کونم؛

²⁴ و به اومیدٚ خوداوند باور دأرم کی خودمم خیلی زود اَیم.

²⁵ هَطویم، لازم دأنم کی اِپافْرودیتوسَ اوسه کونم کی وأگرده بأیه شیمی ورجأ، هونی کی جٚه ای‌طرف می برأر و همکار و همرزمه و جٚه ایطرفٚ دیگر شیمی اوسه کوده خادم کی می ایحتیاجأنَ رفع بوکونه.

²⁶ چره کی موشتاقه شمرَ همه‌تأنَ بیدینه و جٚه اَ خأطر کی بشتأوستیدی اونٚ حال خُب نوبو، ناراحته.

²⁷ رأس رأسی ناخوش بو و حتی نزدیک بو بیمیره. ولی خودا اونَ رحم بوکوده، نه فقط اونَ بلکی مرَ یم رحم بوکوده، کی ایتأ غورصه می غورصه‌یأنٚ سر نأیه.

²⁸ پس خوأیم هر چی زودتر اونَ اوسه کونم شیمی ورجأ کی اونٚ ایوار دِه دِئنٚ اَمرأ خوشحالَ بید و می غورصه جأیم کمَ به.

²⁹ در خوداوند اونَ تومامٚ شادی اَمرأ قوبیل بوکونید و اَ جور آدمأنَ ایحترام بنید،

³⁰ چره کی مسیحْ ختمت کودنٚ وأسی تا مرگٚ نزدیکی جُلُو بوشو و جٚه اَ خأطر کی خوأستی شیمی ختمتٚ کم و کسری‌یأنَ جبران بوکونه، خو جانَ بخطر تأودَه.