Macitilo 9 - Chinsenga New Testament

Saulo oyaluka mtima

¹ Saulo wala enzoyofya asambili ŵa Asikulu, nopangwa kuŵapaya. Eluta kwa Mkulu wa Ansembe wonse

² kuyomusenga makalata akuya nawo ku makacisi ŵa Ayuda ŵa ku Damasiko. Enzopangwa kuti keno akafwaneko okonkha Njila ya Asikulu, keno analume keno anakazi, akaŵamange nakuza nawo ku Yelusalemu.

³ Ali pa ulwendo wake wala, efwika pafupi na mzinda wa Damasiko. Movundumukizya, kuŵala kofuma Kululu kwimuzinga.

⁴ Saulo epona pansi, nipo ecimvwa malizu olaŵila kuti, “Saulo, Saulo, unitamanishilanji newo?”

⁵ Yeve ekonsha kuti, “Nimwe ŵani, Asikulu?” Ŵeve elaŵila kuti, “Nine Yesu, wauzingwisha.

⁶ Lomba, uka, loŵa mu mzinda umu, nipo akuwuzye vocita.”

⁷ Ŵanthu enze naye pa ulwendo wala epanama, eciŵa celele. Lizu yala enzoyimvwa, koma osawona kanthu.

⁸ Tetyo, ayake ŵala emukata pa kwanja noloŵa naye mu Damasiko.

⁹ Saulo esila masiku atatu wosalola, nipo soti osalya keno kumwa kanthu.

¹⁰ Ku Damasiko kwala kwenze msambili, zina yake Ananiya. Yeve wala ewona mensomphenya Asikulu omuyita kuti, “Ananiya!” Yeve elaŵila kuti, “Eee, Asikulu.”

¹¹ Asikulu emuwuzya kuti, “Yima, ulute ku mseu wa mu mzinda umu wakuti, ‘Njila yolungama.’ Nipo ku ngʼanda ya Yudasi ukasakile munthu wa ku Talisi, zina yake Saulo. Lomba teti olomba,

¹² nipo wawona mensomphenya munthu zina yake Ananiya, oloŵa nomuyika manja pa mutu kuti awone soti.”

¹³ Pecimvwa ivo Ananiya elaŵila kuti, “Asikulu, ŵanthu anyinji aniwuzya va munthu uyo, kuti eŵacitila viyipa vinyinji ŵanthu ŵanu ku Yelusalemu.

¹⁴ Nipo wawela kuno na ulamulilo wa Akulu ŵa Ansembe kuti azemange wonse olombela mu zina yanu.”

¹⁵ Koma Asikulu emuwuzya kuti, “Nkhoya, pakuti uyo ni mtumiki wangu wenisalula kuti akaŵilizye zina yangu ku ŵanthu ŵa mitundu iyakine, ku mafumu, nipo soti ku Aisilayeli.

¹⁶ Newo nizemuwoneshe voŵaŵa vonse vakuwamila kumvwa kuti malizu ŵangu aŵilizyike.”

¹⁷ Pamene apo Ananiya eyima nakuyoloŵa mu ngʼanda mwala. Eyika manja pa mutu pa Saulo wala nolaŵila kuti, “Mkwasu Saulo, Asikulu Yesu, ekuwonekela pa njila yewelelako iyi, wanituma. Opangwa kuti uwone soti, na kuti uzuzyiwe na Mzimu Mtuŵa.”

¹⁸ Pamene apo mu menso mwake mwifuma vinthu ngani mamba asaŵi, nipo etatika soti kulolesha. Epanama, nobatiziwa,

¹⁹ nipo pecisilizya cakulya efwana soti mphamvu. Saulo enkhala masiku atontho pamo na asambili ŵa ku Damasiko.

Saulo otatika kuŵilizya ku Damasiko

²⁰ Nipo posataya nsita etatika kuŵilizya mu kacisi wa Ayuda kuti Yesu ni Mwana wa Mulungu.

²¹ Ŵanthu wonse ecimvwa malizu ŵake ŵala ekanganishiwa, nokonshana kuti, “Kansi uyu ni walalini enzopaya ŵanthu otembezya zina ya Yesu ku Yelusalemu? Kansi aliyowele kuno kuti aŵamange woteti nakuŵatwala kwa Akulu ŵa Ansembe?”

²² Tetyo, mphamvu za Saulo zenzokulila–kulila, nipo esilizya nzelu Ayuda onkhala ku Damasiko poŵasimikizyila kuti Yesu ni wamene cendi Mpulumushi Wolayizyiwa wala.

Saulo owutuka Ayuda

²³ Pepepita masiku anyinji, Ayuda epangana kuti apaye Saulo,

²⁴ koma ŵanthu ayakine emuwuzyako va cizondo cala. Ŵanthu ŵa cizondo cala enzolindila pa milyango ya linga ya mzinda mzuŵa na usiku kuti amupaye.

²⁵ Koma asambili ŵake emutola usiku, nomufumyila kunja kwa linga yala mu citundu.

Saulo ku Yelusalemu

²⁶ Saulo pecifwika ku Yelusalemu, eyesa kuloŵa mu umba ya asambili ŵala. Koma wonse ecita naye wowa, osacetekela kuti naye soti ni msambili.

²⁷ Pamene apo munthu muyakine, zina yake Banabasi, emutola nakuya naye kwa atumiki. Yeve eŵakonkhololela va Saulo mweciwonela Asikulu pa njila pala, nipo na kuti Asikulu elaŵila naye. Eŵawuzya soti va Saulo ku Damasiko mwecilaŵilila motangʼa mtima mu zina ya Yesu.

²⁸ Tetyo, Saulo eciŵa nawo, noyendela Yelusalemu yonse oŵilizya motangʼa mtima mu zina ya Asikulu.

²⁹ Enzolaŵila soti nosushana na Ayuda olaŵila Cigiliki, koma ŵeve enzopangwa kumupaya.

³⁰ Enekwawo pecimvwa ivi, eluta naye ku Kayisaliya nomutuma ku Taliso.

³¹ Pamene apo mpingo wa ku Yudeya konse, ku Galileya na ku Samaliya wenze pa mtendele. Wenkhazikika, nipo ŵanthu anyinji eloŵamo cikomo ŵanthu ŵake enzoyenda moyopa Asikulu, nipo Mzimu Mtuŵa wenzoŵakosesha.

Petulo opozya Eneya

³² Petulo penzoyendela ŵanthu ŵa Mulungu uku na uku, efwika kwenzonkhala ayakine ocetekelela ku Lida.

³³ Kwamene uko efwanako munthu muyakine, zina yake Eneya, enze lele pa mphasa vyaka visanu na vitatu, wakufwa vizo.

³⁴ Tetyo, Petulo emuwuzya kuti, “Eneya, Yesu Kristu okupozya; uka, takula mphasa yako.” Pamene apo ewuka cendi.

³⁵ Ŵanthu wonse onkhala ku Lida na ku Saloni pecimuwona, eyalukila kwa Asikulu.

Petulo owusha Tabita wakufwa

³⁶ Ku Yopa kwenze msambili mwanakazi, zina yake Tabita (pa Cigiliki olaŵila kuti Dolika). Yeve uyu enzocita viweme noyavya wozingwa.

³⁷ Masiku ŵala mwanakazi wala elwala nakufwa. Ŵanthu esambika citanda, nocilalika mu cipinda ca palulu.

³⁸ Ku Yopa kwenze kufupi na ku Lida, tetyo asambili pecimvwa kuti Petulo enze ku Lida, etuma ŵanthu aŵili kuti akamuwuzye kuti, “Mwepo, muwele kuno kwasu mmangu.”

³⁹ Petulo eyima nakuya nawo. Yeve pecifwika, emutwala ku cipinda cala ca palulu. Anakazi wonse ŵa nchete epanama pafupi mu mbali mwake, olila, nowonesha malaya na vovwala viyakine venzoŵila Tabita peenze akali nawo pamo.

⁴⁰ Petulo eŵasenga wonse kuti afume, nipo efukama pansi nolomba. Nipo pecicungulukila ku citanda cala elaŵila kuti, “Tabita, uka!” Pamene apo Tabita etunama, nipo peciwona Petulo, ewuka nonkhazikika.

⁴¹ Petulo emukata kwanja nomupanamika. Nipo eyita ŵanthu ŵa Mulungu na anyankufwilwa ŵala nomutwala kwa ŵeve ali moyo.

⁴² Ŵanthu wonse ŵa ku Yopa ecimvwa ivi, nipo anyinji ecetekela Asikulu.

⁴³ Tetyo, Petulo enkhala ku Yopa masiku anyinji kwa munthu muyakine, zina yake Simoni, mmisili wa vikumba.