Macitilo 8 - Chinsenga New Testament

¹ Nipo Saulo wala enzozomelezyana nawo zopaya kwamene kwala. Nsiku yamene iyo mpingo wa ku Yelusalemu witatika kunzunziwa ngako, nipo wonse, kufumyapo nthumi zeka, emwazyikila ku vitwa vonse va Yudeya na Samaliya.

Saulo otatika kunzunza Mpingo

² Ŵanthu ayakine otemwa Mulungu eciyoyika malilo ŵa Stefano nomulila ngako.

³ Koma Saulo wala enzopasula mpingo. Enzoloŵa mu ngʼanda za ŵanthu, nokata analume na anakazi, noŵapoza mu jele.

Filipo oŵilizya Malizu Aweme ku Samaliya

⁴ Wocetekela ŵala emwazyika, eluta mu calo conse oŵilizya Malizu Aweme.

⁵ Filipo efwika ku mzinda uyakine wa ku Samaliya, noŵilizya ku ŵanthu ŵa kwamene kwala va Kristu, Mpulumushi Wolayizyiwa wala.

⁶ Winji wa ŵanthu wenzomvwila na mtima umo venzolaŵila Filipo. Wonse enzokumvwa malizu ŵake nowona vokanganisha venzocita yeve.

⁷ Pakuti viŵanda venzofuma mu ŵanthu anyinji enze wokatiwa navo, noŵilikizya ngako. Nipo anyinji enze ŵa vizo va kufwa keno wopunduka, enzopola.

⁸ Tetyo, mwenze cisangalalo cikulu mu mzinda mwala.

Simoni wa mayele

⁹ Mu mzinda mwala, mwenze munthu muyakine zina yake Simoni, wamene kale enzocita mayele, nokanganisha ŵanthu wonse ŵa ku Samaliya. Yeve enzozimvwa kuti ni munthu mkulu.

¹⁰ Ŵanthu wonse, atontho na akulu, enzomumvwila nomukonkha nolaŵila kuti, “Munthu uyu niye mphamvu ya Mulungu yala yakuti, Mphamvu ikulu.”

¹¹ Enzomukonkha cikomo pa nsita itali enzoŵakanganisha na mayele ŵake.

¹² Koma Filipo penzoŵilizya Malizu Aweme olaŵila va Ufumu wa Mulungu, nipo soti va zina ya Yesu Kristu, ŵanthu ecetekela, nipo ebatiziwa, analume na anakazi kumo.

¹³ Simoni naye ecetekela, nipo ebatiziwa, enzonkhala pamo na Filipo. Ekanganishiwa powona viziŵikilo na vokanganisha venzocitika.

¹⁴ Nthumi zenzonkhala ku Yelusalemu pezicimvwa kuti ŵanthu ŵa ku Samaliya apokela Malizu ŵa Mulungu, zetumizyako Petulo na Yohane.

¹⁵ Ŵeve pecifwika, etatika kulombela wocetekela ŵala kuti apokele Mzimu Mtuŵa.

¹⁶ Nsita yamene iyo niye kuti Mzimu Mtuŵa enzeakaliyofwika pa aliyense mwa ŵeve. Wonse eyingobatiziwa mu zina ya Asikulu Yesu.

¹⁷ Tetyo, Petulo na Yohane eŵayika manja pa mutu nipo epokela Mzimu Mtuŵa.

¹⁸ Simoni wala peciwona kuti Mzimu Mtuŵa watwaliwa kwa wocetekela peciŵayika manja pa mitu. Tetyo, epangwa kupa ndalama Petulo na Yohane.

¹⁹ Elaŵila kuti, “Tyani munipeko nane mphamvu iyi, kuti aliyense waningayike manja pa mutu pake akapokele Mzimu Mtuŵa.”

²⁰ Petulo emuyasuka kuti, “Ndalama zako izo ukatayike nazo pamo. Wewo ulingilila kuti ungatweshe kupokela cawanzi ca Mulungu potwala ndalama kansi?

²¹ Uliye citwa keno malo pa nchito iyi, pakuti mtima wako ni wosalungama pa menso pa Mulungu.

²² Ni cikomo cake, uyaluke mtima, uleke viyipa vako. Senga Asikulu kuti payakine angakulekelele malingililo ŵa mu mtima mwako.

²³ Pakuti nawona kuti niwe wozula na ndulu yoŵaŵa, nipo soti niwe womangiwa na maunyolo ŵa viyipa.”

²⁴ Simoni wala elaŵila kuti, “Munisengele ŵamene mwewo kwa Asikulu kuti vamwalaŵila ivi osati vikaniponele.”

²⁵ Petulo na Yohane pecisilizya kutwala umboni wawo noŵilizya malizu ŵa Asikulu, ewelela ku Yelusalemu. Enzokuya oŵilizya Malizu Aweme mu minzi inyinji ya Asamaliya.

Filipo na nduna ya ku Etiopiya

²⁶ Mngelo wa Asikulu ewuzya Filipo kuti, “Yima, nkhoya ca ku mcingulo, wokonkha mseu wakuya ku Gaza kufumila ku Yelusalemu; mseu wopitila mu cipululu.”

²⁷ Filipo eyima cendi nakuya. Nipo munthu wa ku Etiopiya eluta ku Yelusalemu kuyolomba. Yeve enze nduna ikulu ya Mfumukazi Kandeke wa ku Etiopiya, nipo soti wololesha pa cuma cake conse.

²⁸ Nsita iyo enzowelela kwawo. Enze pa galeta woŵelenga buku ya Mneneli Yesaya.

²⁹ Tetyo, Mzimu Mtuŵa ewuzya Filipo kuti, “Nkhoya, ufwendele pafupi na galeta.”

³⁰ Filipo ewutukila nduna yala, nipo eyimvwa yuŵelenga buku ya Mneneli Yesaya. Lomba eyikonsha kuti, “Mwepo, kansi mukumvwa vamuŵelenga?”

³¹ Yeve elaŵila kuti, “Ha, ningamvwishe tyani paliye wonimangululila?” Motetyo, eyita Filipo kuti akakwele nonkhala naye pa galeta apo.

³² Malizu ŵa mu Malembo ŵala ŵenzoŵelenga ni aŵa: “Yeve enze ngani mbelele yoyitanguzya pakuyopaya, ngani mwana wa mbelele ali tyala celele pomumeta. Aliyolaŵilepo kanthu.

³³ Emupepusha, pa mlandu wake aliyomcitile cilungamo. Paliye angatweshe kulaŵila va azukulu ŵake, pakuti moyo wake wafumyiwa pa calo ca pansi.”

³⁴ Pamene apo nduna yala yelaŵila kuti, “Pepani, niwuzyeni, kansi venzolaŵila mneneli wala ni va ŵani – va yeve mwine, keno va muyakine?”

³⁵ Apo Filipo etatika kuŵilizya va Malizu Aweme ŵa Yesu kutatikila pa Malembo ŵamene aŵa.

³⁶ Nipo penzopita mu mseu mwala, efwika payakine penze manzi. Nduna yala yelaŵila kuti, “Manzi ni aŵa. Kansi pali colesha kuti nibatiziwe?” [

³⁷ Filipo elaŵila kuti, “Mungatweshe kubatiziwa keno mucetekela na mtima wanu wonse.” Yeve eyasuka kuti, “Nucetekela kuti Yesu Kristu ni Mwana wa Mulungu.”]

³⁸ Pamene apo nduna yala ilamulila kuti galeta yala ipaname. Aŵili wonse, Filipo na nduna yala, eselukila ku manzi, Filipo nomubatiza.

³⁹ Pecifuma mu manzi mwala, Mzimu wa Asikulu emufumyapo Filipo wala. Nduna yala iliyomuwone soti, koma ipitilila ulwendo wake mosangalala.

⁴⁰ Tetyo, Filipo efwana kuti ali ku Azoto. Epita mu calo conse oŵilizya Malizu Aweme mu mizinda yonse, mpaka peciyofwika ku Kayisaliya.