Macitilo 28 - Chinsenga New Testament

Paulo pa cilumba ca Melita

¹ Petipulumuka tetyo, ticimvwa kuti cilumba cala zina yake ni Melita.

² Ŵanthu ŵa apo eticitila viweme ngako. Etipokela luweme notiyashila mulilo, cikomo kwitatika kupona mvula nipo kwizizila.

³ Paulo etema nkhuni nowelako na mtolo, nipo peciziyika pa mulilo, mu mtolo mwala mwifuma njoka cikomo cakupya. Imuluma nokatilila ku kwanja kwake kwala.

⁴ Ŵanthu ŵala peciwona njoka yala ililende ku kwanja kwake, etatika kuwuzyana kuti, “Ni cendi munthu uyu ni nyankapondo. Cukanga wapulumuka pa cimmana, koma Mulungu wa cilungamo aliyozomezye kuti aŵe na moyo.”

⁵ Koma Paulo eyikunkhumulila pa mulilo njoka yala, osacenekeka konse.

⁶ Ŵanthu ŵala, enzolindila kuti muŵili wake uvimbe, keno kuti apone pansi movundumukizya nakufwa. Eciŵa omulolesha nsita itali, koma peciwona kuti paliye ciliconse ca cilwendo camucitikila, eyalusha malingililo nolaŵila kuti, “Uyu ni yumo wa milungu.”

⁷ Pafupi na pa malo apo, penze minda ya Pubiliyo, mkulu wa pa cilumba pala. Yeve etipokela notisunga luweme masiku atatu.

⁸ Awisi wake wa Pubiliyo enze lele, cikomo enzolwala malungo na kamlopa. Paulo eloŵa mu cipinda cake notatika kumulombela, nipo emuyika manja pa mutu nomupozya.

⁹ Pevicitika ivi, ŵanthu ayakine wonse olwala pa cilumba pala ewela, Paulo eŵapozya.

¹⁰ Ŵanthu ŵala etipa mcinzi ngako, nipo petitatika soti ulwendo wasu wa pa ciwato, etipa vonse vetenzeve.

Paulo ofwika ku Roma

¹¹ Pepepita myezi itatu, tiyima cendi ulwendo wasu wa pa ciwato ciyakine, cinkhala pa cilumba pala pa nsita ya mphepo. Ciwato cala cenzofumila ku Alekisandiliya, nipo ciziŵikilo cake cenze “Mapasa.”

¹² Petifwika ku Silakusa, tinkhalako masiku atatu.

¹³ Kufuma kwala tipitilila nakuyofwika ku Legiyo. Pepepita nsiku imo, mphepo ya ku mmwela itatika kukuntha, tetyo pa nsiku yokonkhapo tifwika ku Putewoli.

¹⁴ Kwala tifwana enekwasu, nipo etisenga kuti tinkhale nawo masiku asanu na aŵili. Motetyo, ticiyofwika ku Roma.

¹⁵ Enekwasu ŵa kwala pecimvwa va sewo, ewela mpaka ku Nsaka ya Apiyo nipo soti ku munzi woyitiwa Ngʼanda za Alwendo Zitatu kuzoticinguzyila. Paulo peciŵawona tetyo, etembezya Mulungu, notangʼa mtima.

¹⁶ Petiloŵa mu mzinda wa Roma, Paulo ezomelezyewa kuŵa kwa yeka, na msilikali womulindilila.

Paulo oŵilizya kwa Ayuda ku Roma

¹⁷ Pepepita masiku atatu, Paulo ewunganisha acitangulila ŵa Ayuda ŵa kwala. Peciwungana, yeve eŵawuzya kuti, “Mwenekwasu, newo nili kuno ngani mkaidi ofumila ku Yelusalemu. Cukanga niliyoyifyile mtundu wasu keno myambo ya makolo ŵasu, koma cendi nitwaliwa kwa Aroma.

¹⁸ Ŵeve pecinikonsha, epangwa kunimangulula, cikomo aliyofwane mlandu wowamila kunipayila.

¹⁹ Koma Ayuda pecikana, nikakamizyiwa kusenga kuti mlandu wangu uyu nizenifukame ku mfumu ya ku Roma kuno. Nikutilini nenze na kanthu kolaŵilila mtundu wangu yayi.

²⁰ Ni cikomo cake nakuyitani kuti nilaŵile namwe. Pakuti namangiwa na unyolo uyu cikomo cocetekela cinthu cakulindila Aisilayeli.”

²¹ Acitangulila ŵala emuyasuka kuti, “Sewo tiliyopokelepo makalata ofumila ku Yudeya olaŵila va mwewo. Paliye soti muyakine mwa enekwasu efwika kuno kuzotikonkhololela keno kuzotiwuzya viyipa vanu.

²² Koma ngako–ngako ni ciweme kuti mutiwuzye malingililo ŵanu, pakuti va umba yanu ya pa mbali iyi tuziŵa kuti paliponse ŵanthu osushana nayo.”

²³ Ŵeve epangana naye nsiku yakuti akakumane naye, nipo anyinji ewela ku ngʼanda kwenzonkhala. Kutatikila mmawa mpaka mcingulo Paulo elaŵila nawo, noŵakonkhololela va Ufumu wa Mulungu. Pakuŵasambizya malizu ŵa mu Matetulo ŵa Mose nipo soti mu mabuku ŵa aneneli, enzoyesa kuŵanyengelela kuti acetekele Yesu.

²⁴ Ayakine enyengelelewa cendi na vecilaŵila, koma ayakine aliyocetekele.

²⁵ Lomba pakuti ŵanthu ŵala aliyomvwane, eyingofumapo. Koma mphela penzeakaliyofumapo, Paulo eyikililapo malizu ŵamo ŵakuti, “Mzimu Mtuŵa elaŵila vyendi peciwuzya makolo ŵanu mwa Mneneli Yesaya kuti,

²⁶ ‘Nkhoya ku ŵanthu ŵa mtundu uyu uŵawuzye kuti, “Kumvwa muzamvwe, koma muzemvwishishelini; kuwona muzemuwone, koma muzemuwonesheshelini.

²⁷ Cendi mtima wa ŵanthu ŵa mtundu uyu wafunala, akumvwalini na matu ŵawo, nipo ŵavala menso ŵawo. Kuyopa kuti angawone na menso ŵawo, nipo angamvwe na matu ŵawo, angamvwishe na mtima wawo, noyaluka mwa newo kuti niŵapozye.”’

²⁸ “Ziŵani lomba kuti Mulungu watumizya cipulumusho cake ici ku ŵanthu ŵa kunja ŵanthu asali Ayuda, ŵeve azamvwe.” [

²⁹ Paulo pecilaŵila malizu aŵa, Ayuda ŵala efumapo osushana ngako.]

³⁰ Lomba Paulo enkhala kwala vyaka viŵili vonse mu ngʼanda yake yozyamika, nipo enzoŵapokela luweme wonse owela kuzomuwona.

³¹ Enzoŵilizya va Ufumu wa Mulungu, nipo enzoŵasambizya va Asikulu Yesu Kristu patuŵa, paliye muyakine aliyense womulesha.