Macitilo 27 - Chinsenga New Testament

Otumizya Paulo ku Roma

¹ Pevisimikizyika kuti tuwamila kuya ku Italiya mu ciwato, emutwala Paulo pamo na akayidi ayakine kwa Sentuliyo citangulila wa asilikali, zina yake Yuliyo, wa umba ya asilikali yoyitiwa Umba ya Augusto.

² Petikwela mu ciwato cofumila ku Adilamitiyo cenze cokonzekelatu kuya ku madowoko ŵa ku Asiya, nipo tiyima. Alistaliko, Mmasedoni wa ku mzinda wa Tesalonika, enze nase.

³ Mmawa mwake tifwika ku Sidoni, nipo Yuliyo ewamila mtima Paulo, nomuzomezya kuluta kuwotemweka ŵake kuti akamusunge luweme.

⁴ Kufuma uko, tipitila ku mpoto kwa cilumba ca Kiplo cikomo mphepo yenzokuntha kufumila kwenzokuya.

⁵ Titawuka cimmana citwa ca ku Siliya na Pamfiliya nofwika ku Mila, mzinda wa ku Likiya.

⁶ Kwamene uko citangulila wa asilikali wala efwanako ciwato cofumila ku Alekisandiliya cokuya ku Italiya, nipo etitakula mu ciwato cala.

⁷ Tiyenda patontho–patontho kwa masiku anyinji, nakuyofwika pafupi na Kinido mosawukila. Lomba pakuti mphepo itivuta cendi, tiliyotweshe kupitilila ulwendo wasu mwolunjika, tetyo tingopitila ku mmwela kwa cilumba ca Klete, petipitilila Salimone.

⁸ Tiyenda mosawukila mu mbali mwa cilumba cala, nakuyofwika ku malo ayakine woyitiwa Madowoko Aweme, pafupi na mzinda wa Laseya.

⁹ Nsita itali ipita, nipo cukanga nsita yolilesha kulya yenze ipita kale. Nsita iyo ulwendo wa pa manzi wenze woyofya. Pamene apo Paulo eŵacenjezya kuti,

¹⁰ “Mwenekwasu, newo nuwona kuti pa ulwendo wasu uyu, vinthu vinyinji vizecenekeke notayika, osati katundu weka na ciwato yayi, koma soti myoyo yasu.”

¹¹ Koma citangulila wa asilikali wala emvwila kapitawo wa ciwato nipo soti mwine wake wa ciwato cala, osati malizu ŵa Paulo yayi.

¹² Lomba pakuti dowoko yenzelini luweme kunkhalako pa nsita ya mphepo, anyinji mwa ŵeve epangwa kufumako, noyesa kuti angatweshe kuyofwika ku Fenikisi nonkhala uko pa nsita ya mphepo. Fenikisi yenze dowoko ya ku Klete, yolola ku mmwela ca ku mcingulo, nipo soti ku mpoto ca ku mcingulo.

Okumana na cinkhuka pa cimmana

¹³ Mphepo ya ku mmwela peyitatika kukuntha patontho–patontho, ŵanthu eyesa kuti lomba afwana mpata wakuti acite vakupangwa. Motetyo, eyima ulwendo, noyenda mbali mwa cilumba cala ca Klete.

¹⁴ Koma paliyopite nsita itali mphepo yokuntha, yoyitiwa Yulakulo, itatika kukuntha kufumila ku silya.

¹⁵ Ikuntha ciwato cala, niye pakuti tiliyotweshe kukumana na mphepo yala tizomela kutolewa nayo.

¹⁶ Tifwika pafupi na ka cilumba coyitiŵa Kawuda, ku citwa kwayisafwika mphepo. Kwamene kwala movutikila titwesha kuthangulila wato wodonsewa na ciwato cala.

¹⁷ Nipo ekwezeka wato wala pa ciwato, nipo pa vuli pake emanga ciwato cala na nthambo kuti acitangʼishe. Lomba poyopa kuti angakagundishe ku misece wa ku Siliti, esisha mathanga nozomela kuyingotolewa tyala na mphepo.

¹⁸ Pakuti tisawushiwa ngako na cinkhuka cala mmawa mwake etatika kutaya katundu mu manzi.

¹⁹ Nipo pa nsiku ya citatu yake etaya mu cimmana na vipangizo va wato kumo.

²⁰ Tiliyowone zuŵa keno nyenyezi masiku anyinji, koma cinkhuka cenze cikali na mphamvu mpaka tonse titayilatu cicetekelo cakuti tipulumuke.

Paulo okosesha mtima ayake ŵa ulwendo

²¹ Pa nsita itali ŵala ŵanthu aliyeulye kanthu. Lomba Paulo epanama pakati pawo nolaŵila kuti, “Mwenekwasu, kuti mwimvwila venilaŵila newo, osafuma ku Klete, sembe vinthu viliyoceneneke notayika moteti.

²² Koma lomba nukuwuzyani kuti mukose mtima, pakuti paliye cukanga yumo mwa mwewo ŵatiatayike, koma ciwato ceka niye caticicenekeke.

²³ Usiku wasila kwinizela mngelo wa Mulungu, Mulungu ni wangu nipo nine wake, nipo numucinzika.

²⁴ Mngelo wala eniwuzya kuti, ‘Osacita wowa, Paulo. Uwamila kuyopanama pa menso pa mfumu ya ku Roma. Mulungu, mwakuwama mtima kwake, wazomelezya kuti ayako wonse ŵa ulwendo aŵe moyo.’

²⁵ “Niye mwewo, tangʼani mtima, pakuti nucetekela Mulungu, kuti vawaniwuzya ivi vizevicitike cendi mwavilili.

²⁶ Koma tikasakamile pa cilumba ciyakine.”

Ofwendela ku silya

²⁷ Pakati pa usiku wa kumi na cinayi (14), mphepo yenzeyikalutikankha pa cimmana ca Adiliya, anyanchito ŵa pa wato elingilila kuti ali pafupi na ku silya.

²⁸ Lomba peciyesa kupima kunoka kwa cimmana efwana mamita okwanila makumi anayi (40). Peciyenda patontho epima soti nofwana soti mamita okwanila patontho makumi atatu (30).

²⁹ Poyopa kuti ciwato cingakasamile pa myala eselusha anangula anayi mu cimmana ku vuli kwa ciwato. Nipo enzoyingolomba mopangwa kuti kuce.

³⁰ Anyanchito ŵa pa ciwato ŵala enzopangwa kuwutukamo mu ciwato mwala. Tetyo, eselushila wato utontho pa manzi, nocita ngani opangwa kuselusha anangula mu cimmana ku nthangu kwa ciwato.

³¹ Motetyo, ewuzya citangulila wa asilikali wala pamo na asilikali ŵake kuti, “Keno ŵanthu aŵa onkhalalini mu ciwato muno, cendi mwewo mungatweshelini kupulumuka yayi.”

³² Tetyo, asilikali ŵala etenda nthambo za wato wala nowulekelela kuti upone.

Paulo okosesha soti ayake ŵa ulwendo

³³ Pekwenze pafupi kuca, Paulo eŵasenga wonse ŵala kuti alyeko kanthu. Eŵawuzya kuti, “Mwaŵa masiku kumi na anayi lomba mitima yanu ili mu malele, nsita yonse iyi osalya keno kulaŵa kanthu.

³⁴ Nukusengani lomba kuti mulye kanthu kuti mupulumuke. Paliye na yumo kumo mwa mwewo watiazetaye cukanga sisi imo.”

³⁵ Pecilaŵila ivi, Paulo etola mkate, notembezya Mulungu pa menso pa wonse. Nipo pecisuna mkate wala etatika kulya.

³⁶ Pamene apo wonse ŵala etangʼa mtima, nawo soti etatika kulya.

³⁷ Tonse pamo tenzokumana Makumi kumi aŵili na makumi asanu na aŵili na mphuzyo zisanu na imo (276) mu ciwato mwala.

³⁸ Wonse ŵala pecilya nokuta, epepusha wato potaya tiligu mu cimmana.

Ciwato cucenekeka

³⁹ Pekwecica, ŵanthu aliyoziŵe msenga wala, koma eyingowona mu mbali mwa cimmana ca misece. Lomba elingilila kuti keno ni cotwesha, akawamyile ciwato kwamene uku.

⁴⁰ Tetyo, etaya anangula noŵasiya mu cimmana. Nsita iyo emangulula nzinzi zomangila nkhafi zoyondololela, nokweza thanga ya ku nthangu, kuti mphepo ikankhe wato nipo elungamisha ku silya.

⁴¹ Koma ciwato cala cikasamila pa misece wofisika na manzi, nipo ipanama. Citwa ca ku nthangu kwa ciwato cijima kotetyo kuti iliyotweshe kuyenda soti. Nipo citwa ca ku vuli cala cicenekeka na mphamvu ya mafunde.

⁴² Asilikali ŵala elingilila kupaya akayidi, kuyopa kuti ayakine mwa ŵeve anganyaye kufwika ku silya nowutuka.

⁴³ Koma citangulila wa asilikali wala epangwa kupulumusha Paulo, motetyo eŵalesha. Elamula kuti wonse anganyaye, azipoze mu manzi, anyaye kuti akafwike ku silya.

⁴⁴ Ŵala wosala eŵalamula kuti akate mapulanga keno viyakine va mu ciwato cocenekeka cala. Motetyo, wonse epulumuka nofwika ku silya.