Macitilo 25 - Chinsenga New Testament

Paulo osenga kuyopinguliwa na mfumu ya ku Roma

¹ Fesito etatika nchito yake yopingula mu citwa cala. Pepepita masiku atatu, eluta ku Yelusalemu kufumila ku Kayisaliya.

² Kwala, Akulu ŵa Ansembe na acitangulila ŵa Ayuda emukonkhololela va mlandu wa Paulo. Ŵeve emusenga Fesito

³ kuti aŵawamile mtima pomtumizya Paulo ku Yelusalemu. Ecita tetyo cikomo enzeepangana vomulindila pa njila kuti amupaye.

⁴ Fesito eŵawuzya kuti, “Paulo osungiwa mu jele ku Kayisaliya, nipo newo nikuya kwala kwa lombapano.

⁵ Lomba, acitangulila wanu alute nane pamo, kuti akamusimikizye munthu wala, keno ni cendi ecitapo ciyipa.”

⁶ Fesito pecinkhala pakati pawo masiku asanu na atatu keno kumi, eluta ku Kayisaliya. Mmawa mwake enkhala pa mpando wopingulila milandu, noyita Paulo kuti awele pa menso pake.

⁷ Paulo pecifwika, Ayuda ewela kufumila ku Yelusalemu ŵala emuzinga, notatika kumulaŵilila vinthu voyofya ngako, valiyotweshe kuvisimikizya.

⁸ Paulo poyasuka vomulaŵilila vala elaŵila kuti, “Newo niliyoyifyilepo Matetulo ŵa Ayuda, keno Ngʼanda ya Mulungu, keno soti mfumu ya ku Roma.”

⁹ Fesito popangwa kutemwesha Ayuda, ekonsha Paulo kuti, “Kansi ungatemwe kuya ku Yelusalemu kuti mlandu wako uyu ukapinguliwile kwala pa menso pangu?”

¹⁰ Koma Paulo elaŵila kuti, “Newo napanama pa nsaka ya milandu ya mfumu ya ku Roma, niye kwakuwamila kunipingulila. Ayuda aŵa newo niliyoŵayifyile ciliconse, ngani mwewo muziŵa luweme.

¹¹ Keno nine woyifya, nipo keno nacita cinthu cowamila kuti nipayiwe nukanalini kupayiwa yayi. Koma keno vakunilaŵilila aŵa ni va wenye, paliye munthu angatweshe kunitwala kwa ŵeve. Newo nusenga kuti mlandu wangu uyu nikafukame ku mfumu ya ku Roma.”

¹² Lomba Fesito pecilaŵizyana na ŵa nsaka ŵake, elaŵila kuti, “Wasenga kuti mlandu wake ukapinguliwe ku Roma. Ni ciweme, ukalute ku Roma ku mfumu ikulu.”

Fesito okonkhololela Mfumu Agilipa mlandu wa Paulo

¹³ Pepepita masiku, mfumu Agilipa, pamo na mkazi wake Belenise, ewela ku Kayisaliya kuzopokela Fesito.

¹⁴ Pecinkhala kwala masiku atontho, Fesito wala ekonkhololela mfumu yala va mlandu wa Paulo. Elaŵila kuti, “Kuli munthu muyakine kuno wecisiya mu jele Felikisi.

¹⁵ Penenze ku Yelusalemu, Akulu ŵa Ansembe pamo na acitangulila ŵa Ayuda enikonkhololela va yeve, nonisenga kuti nimupe mlandu nopingula kuti ni woyifya.

¹⁶ “Newo niŵayasuka kuti ni mwambolini wa Aroma kuyingotwala munthu yayi. Munthu wolaŵiliwa wala otatika wakumana nawo omulaŵilila ŵala, kuti yeve aŵe na shuko yoyasukapo pa vakumulaŵilila.

¹⁷ Lomba ŵeve pecizowungana kuno, newo mosataya nsita, mmawa mwake ninkhala pa mpando wopingulila milandu, nomuyita munthu wala kuti awele pa menso pangu.

¹⁸ Omulaŵilila ŵala pecipanama, aliyomulaŵilile ciyipa cukanga cimo pa venenzolingilila newo.

¹⁹ Enzoyingokangana naye pa cilambilo cawo, nipo soti va munthu muyakine zina yake Yesu, ecifwa, koma Paulo osimikizya kuti ali moyo.

²⁰ “Newo nisila nzelu, osaziŵa kuti niyisande–sande tyani nkhani iyi. Tetyo, nimukonsha Paulo wala keno angatemwe kuya ku Yelusalemu kuti mlandu wake ukapinguliwe.

²¹ Nipo esenga kuti awosungiwa mu jele mpaka mfumu ya ku Roma ikasimikizye va mlandu wake. Pamene apo nipingula kuti amusunge mu jele kufwikila namutumizya kwa mfumu iyo.”

²² Pamene apo Agilipa ewuzya Fesito kuti, “Nane soti sembe natemwa kuti nizimvwile neka vatialaŵile munthu uyu.” Fesito elaŵila kuti, “Mukamumvwe mailo mmawa.”

²³ Mmawa mwake Agilipa na Belenise ewela na mcinzi ukulu wa cifumu. Eloŵa mu nsaka ya milandu pamo na akulu ŵa asilikali nipo soti akulu–akulu ŵa mu mzinda mwala. Fesito eyita Paulo kuti awele, nipo ewela cendi.

²⁴ Lomba Fesito elaŵila kuti, “Mfumu Agilipa, na mwewo monse muli nase muno, mumuwona munthu uyu. Ayuda wonse enisenga ku Yelusalemu na kuno kwamene moŵilikizya kuti uyu owamilalini kuŵa soti na moyo.

²⁵ Koma newo niliyofwane kuti yeve ecita kanthu kowamila kupayiwa. Lomba pakuti mwine wake uyu esenga kuti mlandu wake ukapinguliwe na mfumu ya ku Roma, nilingilila vomutumizya.

²⁶ Koma niliye kanthu ngako–ngako kakuti nilembele Mfumu iyo va yeve. Motetyo, nawela naye kwa mwewo, monse ngako–ngako mfumu Agilipa, kuti mukamukonsheshesha, niŵe na kanthu kakuti nilembe.

²⁷ Newo nuwona kuti ni cinthu ciliye nzelu kutumizya mkaidi paliye kutomolapo vikomo va mlandu wake.”