Macitilo 24 - Chinsenga New Testament

Ayuda otanikila Paulo kwa Felikisi

¹ Pepepita masiku asanu, Ananiya, Mkulu wa Ansembe wonse, ewela pamo na akulu–akulu ayakine ŵa Ayuda, na kaswili muyakine wolaŵilila ŵanthu pa milandu, zina yake Telitulilo. Ŵeve efwika pa menso pa bwanamkubwa wala, notatika kulaŵila va Paulo.

² Lomba Paulo wala pecimuyita, Telitulilo wala etatikapo vomulaŵilila vala. Elaŵila kuti, “Mwewo Felikisi wocinzikiwa, sewo tunkhala pa mtendele ngawo–ngawo cikomo ca mwewo, nipo vinthu vinyinji vankhala vokonzeka mu calo casu cikomo ca ucitangulila wanu wa nzelu.

³ Vonse ivi, tuvipokela mwa mcinzi ngako paliponse mwa njila iliyonse.

⁴ Pepani, nupangwalini kukutayilani nsita, koma nusenga kuti muniwamile mtima, muyingomvwako tyala malizu wasu aŵa mwa pafupi.

⁵ “Niye kuti munthu uyu sewo tamufwana kuti ni wovutisha ngako. Waŵa oleta vyongo pakati pa Ayuda pa calo conse ca pansi, nipo soti ni citangulila wa cipani ca Anazaleti.

⁶ Eyesa soti cukanga kuyifyisha ngʼanda ya Mulungu wasu. Niye petimukata. [Tipangwa kumupingula pokonkha Matetulo ŵasu.

⁷ Koma Lisiyasi, mkulu wa asilikali, ecizomusomphola ku manja kwasu mwa nkhondo,

⁸ nopingula kuti womulaŵilila azeawonekele kwanu.] Mukamukonsha uyu, muwamila kuziŵa mweka vonse vatumulaŵilila.”

⁹ Ayuda nawo soti ezomelezya, nolaŵilisha kuti vonse ivo ni vyendi.

Paulo olicingilizya pa menso pa Felikisi

¹⁰ Bwanamkubwa wala, ecewula Paulo kuti alaŵile, nipo Paulo elaŵila kuti, “Nuziŵa kuti mwewo mwaŵamupingula mtundu uyu vyaka vinyinji, ni cikomo cake natemwa kuti niyasuke pa menso panu vakunilaŵilila.

¹¹ Mwewo muwamila kufwana umboni wake, penzepaliyopite masiku opitilila kumi na aŵili kufuma paniciyolombela ku Yelusalemu,

¹² Ayuda aliyonifwanepo nukangana na munthu aliyense mu Ngʼanda ya Mulungu, keno kuwusha vyongo pakati pa ŵanthu mu makacisi, keno paliponse mu mzinda mwala.

¹³ Ŵeve angakusimikizyilenilini vakunilaŵilila.

¹⁴ Koma ici ceka, nuzomela pa menso panu, kuti nulombela Mulungu wa makolo wasu pokonkha njila ŵeve yenzokuti ni umba ya pa mbali. Nucetekela vonse volembewa mu Matetulo ŵa Mose nipo soti mu mabuku ŵa aneneli.

¹⁵ Powona kuti nucetekela Mulungu, nipo nawo wocetekela, kuti ŵanthu wonse – wolungama na wosalungama – akawuke kwa akufwa.

¹⁶ Ni cikomo cake, nane soti nuyesesha nsita zonse kuŵa na mtima wolungama pa menso pa Mulungu, na pa menso pa ŵanthu.

¹⁷ “Lomba peninkhala kuyakine vyaka vitontho, nicizotwala ndalama ku ŵanthu ŵa mtundu wangu, nipo soti nicizotwala nsembe.

¹⁸ Penenzocita ivi, ŵeve enifwana mu Ngʼanda ya Mulungu nucita mwambo wolituŵisha. Penzeve winji wa ŵanthu keno vyongo yayi.

¹⁹ Nipo alipo pano Ayuda ayakine ŵa ku Asiya kuti anisimikizyile pa menso panu keno ali nane na kanthu.

²⁰ Keno ŵeve ali pano aŵa alaŵile keno enifwana coyifya penenze mu Kaupo Kakulu kwawo.

²¹ Koma coyifya cangu cingaŵe ici cakuti, penipanama pa menso pawo, neŵilikizya kuti, ‘Munipa mlandu newo lelo cikomo nucetekela kuti ŵanthu akufwa azeawuke.’”

²² Felikisi enzoziŵa luweme va Njila ya Asikulu, tetyo evala nsaka yala na malizu olaŵila kuti, “Nizenipingule mlandu wako akaza Lisiyasi, mkulu wa asilikali.”

²³ Lomba elamulila citangulila wa umba ya asilikali kuti awomulonda, koma awomupako mtendele, osalesha wotemweka ŵake kumusamala.

Paulo olaŵila na Felikisi na Dulusila

²⁴ Pepepita masiku atontho Felikisi ewela na mkazi wake Dulusila muyuda. Eyita Paulo, notatika kumvwilila venzolaŵila vocetekela Kristu Yesu.

²⁵ Koma Paulo pecilaŵila va cilungamo, va kulilesha kulya, na vakuti Mulungu azeapingule ŵanthu, Felikisi ecita wowa nomuwuzya kuti, “Pakali pano nkhoya wakuya, nikafwana nsita, nizenikuyite soti.”

²⁶ Koma enzolingilila kuti Paulo azeamupe ndalama, ni cikomo cake enzomuyita mowelezya–welezya notandala naye.

²⁷ Pepepita vyaka viŵili, Pokiyo Fesito eloŵa mu malo mwa Felikisi. Lomba Felikisi wala popangwa kuwamizya Ayuda, emusiya mu jele Paulo wala.