Macitilo 23 - Chinsenga New Testament

¹ Paulo eŵalolesha ŵa mu Kaupo Kakulu kala nolaŵila kuti, “Mwenekwasu, newo moyo wangu wonse mpaka lelo naŵa na mtima utuŵa pa menso pa Mulungu.”

² Pamene apo Ananiya, Mkulu wa Ansembe wonse, elamula ŵala epanama pafupi na Paulo kuti, “Munyateni pa kamwa!”

³ Pamene apo Paulo emuwuzya kuti, “Mulungu anyate wewo, uliye vyendi! Wewo wankhala apo kuti unipingule pokonkha Matetulo ŵa Mose, ngani cikomo canji uŵafwaya Matetulo aŵa polamula kuti aninyate?”

⁴ Pamene apo ŵala epanama pafupi na Paulo emuwuzya kuti, “Ni cikomo canji utafulila Mkulu wa Ansembe ŵa Mulungu?”

⁵ Paulo elaŵila kuti, “Pepani mwenekwasu, nenzoziŵalini kuti ni Mkulu wa Ansembe. Pala Malizu ŵa Mulungu olaŵila kuti, ‘Usamulaŵilile viyipa wopingula ŵanthu ŵako.’”

⁶ Paulo peciwona kuti ayakine mwa ŵeve na ŵa mu cipani ca Asaduki, ayakine ŵa mu cipani ca Afalisi, elaŵila malizu moŵilikizya mu Kaupo mwala kuti, “Mwenekwasu, newo nine Mfalisi, mwana wa Mfalisi. Newo nupinguliwa cikomo ca cilolelo kuti ŵanthu azeawuke kwa akufwa.”

⁷ Pecilaŵila ivi, Afalisi na Asaduki ŵala etatika kukangana, nipo msonkhano wipatukana. (

⁸ Pala Asaduki olaŵila kuti ŵanthu azeawukelini kwa akufwa, nipo soti kuti kuliye angelo keno mizimu. Koma Afalisi wocetekela vonse ivi.)

⁹ Ŵanthu ŵala etatika kuŵilikizya ngako. Lomba Asambizyi ayakine ŵa Matetulo, ŵa mu cipani ca Afalisi, epanama nolaŵila kuti, “Tufwanalini coyifya mwa munthu uyu yayi. Payakine kungaŵe kuti mzimu keno mngelo walaŵila naye!”

¹⁰ Ŵanthu ŵala efwika pokangana koyofya, tetyo mkulu wa asilikali wala eyopa kuti angamutende pakati Paulo. Tetyo, elamula asilikali kuti, “Nkhoyani mukamupokeshe kwa ŵanthu aŵa, mukamuloŵeshe mu linga ya asilikali.”

¹¹ Nsiku iyo, usiku, Asikulu ecizopanama pafupi na Paulo nomuwuzya kuti, “Tangʼa mtima. Ngani mwawanicitila umboni kuno ku Yelusalemu, uwamila ukanicitile soti umboni ku Roma.”

Ayuda omucitila msikila Paulo

¹² Pekwecica, Ayuda ayakine enkhala pamo, nipo epangana motangʼa kuti, “Sewo tilyelini keno kumwa kalikonse mpaka timupaye Paulo.”

¹³ Ŵanthu epangana va msikila uyu enzepo opitilila makumi anayi (40).

¹⁴ Ŵeve eluta kwa Akulu ŵa Ansembe na kwa Akulu ŵa Ayuda noŵawuzya kuti, “Sewo talapila motangʼa kuti tilaŵelini kanthu mpaka timupaye Paulo uyu.

¹⁵ Lomba mwewo, pamo na Kaupo Kakulu, mutumizye malizu kwa mkulu wa asilikali kuti awele naye Paulo kwa mwewo, ngani mupangwa zomukonsheshesha luweme va mlandu wake. Sewo nise wokonzeka kumupaya pakaliyofwika kuno.”

¹⁶ Koma mwana wa mlongosi wake wa Paulo, pecimvwa va msikila uyu, eciyoloŵa mu linga ya asilikali yala nomuwuzya Paulo.

¹⁷ Pamene apo Paulo eyita yumo mwa acitangulila ŵa asilikali nomuwuzya kuti, “Nkhoyani na mulumbwana uyu kwa mkulu ŵa asilikali, olaŵila kuti ali namwe na malizu.”

¹⁸ Yeve emutola mulumbwana wala nakuya naye kwa mkulu wa asilikali, nomuwuzya kuti, “Mkaidi wala Paulo, eniyita nonisenga kuti niwele na mulumbwana uyu kwa mwewo, olaŵila kuti ali namwe na malizu.”

¹⁹ Mkulu wa asilikali wala emukata pa kwanja mulumbwana wala, nakuya naye pa seli, lomba peenze pa ŵeka emukonsha kuti, “Kansi ni malizu wotyani ŵaupangwa kuniwuzya?”

²⁰ Yeve elaŵila kuti, “Ayuda ayakine epangana kuzomusengani kuti mukalute na Paulo ku Kaupo Kakulu mailo, ngani kuti ŵeve opangwa kukonsheshesha luweme va mlandu wake.

²¹ Koma pepani, mwewo musaŵamvwile, cikomo pali ŵanthu opitilila makumi anayi amufisamila Paulo pa njila. Ŵeve elapila kuti alyelini keno kumwa kalikonse mpaka amupaye. Lomba apa ni wokonzeka, nipo oyingolindila kuti muŵazomelezye.”

²² Tetyo, mkulu wa asilikali wala ewuzya mulumbwana wala kuti, “Luweme, wewo nkhoya, koma usawululile muyakine aliyense kuti wanikonkololela ivi.”

Otumizya Paulo kwa Felikisi

²³ Mkulu wa asilikali wala eyita acitangulila aŵili ŵa asilikali noŵawuzya kuti, “Wuzyani asilikali makumi kumi aŵili (200) aŵe okonzeka kutatikila nsita ya 9 koloko usiku uno, kuya ku Kayisaliya pamo na asilikali makumi asanu na aŵili (70) okwela pa haci nipo makumi kumi aŵili ŵa mikondo.

²⁴ Mumuwamyile Paulo mahaci kuti akwelepo, nipo mukamufwishe luweme kwa Felikisi, bwanamkubwa.”

²⁵ Lomba elemba kalata iyi:

²⁶ Newo Kilawudiya Lisiyasi, Nutwala moni kwanu ocinzikiwa, Afelikisi, bwanamkubwa.

²⁷ Munthu uyo Ayuda emukata, nipo enze pafupi kumupaya. Penicimvwa kuti yeve ni nzika ya Ciroma, niluta na asilikali kuyomulondesha.

²⁸ Nenzopangwa kuziŵa cikomo cenzomulaŵilila, tetyo niluta naye ku Kaupo Kakulu kwawo.

²⁹ Nifwana kuti enzomulaŵilila cikomo ca nkhani yokumya Matetulo ŵawo, koma osati wopayiwa keno womuyika mu jele.

³⁰ Lomba pakuti namvwa kuti pali msikila wakupangana pa munthu uyu, namutumizya kwa mwewo mmangu. Nawuzya omulaŵilila kuti azealaŵile malizu ŵawo kwa mwewo.

³¹ Pamene apo asilikali ŵala etola Paulo ngani mweciŵalamulila, eluta naye ku Antipatili usiku.

³² Mmawa mwake ŵeve ewelela ku linga ya asilikali, nosiya alukwele pa haci ŵala kuti apitilile na Paulo.

³³ Ŵeve ŵala pecifwika ku Kayisaliya, etwala kalata yala kwa bwanamkubwa, notwala soti Paulo mmanja mwake.

³⁴ Bwanamkubwa wala peciŵelenga kalata yala, ekonsha Paulo va ku citwa kwenzofuma. Pecimvwa kuti ofumila ku Siliya,

³⁵ emuwuzya kuti, “Nizamvwe mlandu wako akawela okulaŵilila viyipa ŵala.” Pecicita tetyo, elamula kuti awomusunga ku ngʼanda ya mfumu Helode.