Macitilo 22 - Chinsenga New Testament

¹ “Mwewo mwenekwasu na mwewo akulu–akulu, nimvwileni niyasuke lomba vakunilaŵilila.”

² Ŵeve pecimvwa olaŵila nawo mu Ciyuda, eciŵa celele ngako. Tetyo, Paulo elaŵila kuti,

³ “Newo nine Muyuda wovyalikila ku Taliso, mzinda wa ku Siliya, koma nilelewa mu mzinda wa Yelusalemu mwamene muno. Gamaliyele niye enze msambizyi wangu, enisambizya ngako kusunga Matetulo ŵa makolo ŵasu. Nipo nenze wotangʼa ngako pa va Mulungu, ngani mwamucitila nsiku zino.

⁴ Nenzosawusha ŵanthu okonkha Njila ya lomba iyi, mpaka noŵapaya. Nenzokata ŵanthu aŵa analume na anakazi kumo, noŵamangisha.

⁵ Mkulu wa Ansembe wonse, na ŵa mu Kaupo Kakulu ka Ayuda anganizomelezye. Ŵeve awo enipa makalata akuya nawo ku enekwasu ŵa Ciyuda ku Damasiko. Lomba niluta kwamene uko kuti nikaŵakate ŵanthu aŵa, nakuza nawo ku Yelusalemu ali womangiwa, kuti azealangiwe.”

Paulo okonkholola mweciyalukila mtima

⁶ “Penenze pa ulwendo uyu nili pafupi na Damasiko, nsita yenze ngani 12 koloko mzuŵa, movundumukizya kuŵala kukulu kufumila kululu kwenizunguluka.

⁷ Nipona pansi, nipo nicimvwa malizu olaŵila kuti, ‘Saulo, Saulo, unisawushila vinji?’

⁸ “Newo nikonsha kuti, ‘Nimwe ŵani Asikulu?’ “Ŵeve elaŵila kuti, ‘Newo nine Yesu wa ku Nazaleti, wausawusha wewo.’

⁹ Ayangu ŵa pa ulwendo ekuwona kuŵala kwala, koma malizu ŵenzolaŵila na newo aliyoŵamvwe.

¹⁰ “Tetyo, newo nikonsha kuti, ‘Nicite vinji Asikulu?’ “Nipo Asikulu elaŵila kuti, ‘Uka, nkhoya ku Damasiko, kwamene uko akakuwuzye vonse vawawamya Mulungu kuti ucite.’

¹¹ Niliyolole soti cikomo ca kuŵala kukulu kwala, ni cikomo cake ayangu ŵala ecitonikata pa kwanja nonitangulila mpaka kuyoloŵa mu Damasiko.

¹² “Kwamene kwala kwenze munthu muyakine, zina yake Ananiya. Enze munthu woyopa Mulungu na wosamala Matetulo wasu, nipo Ayuda wonse ŵa kwamene kwala enzomutembezya.

¹³ Yeve uyo efwika nakuzopanama pafupi na newo, noniwuzya kuti, ‘Mkwasu Saulo, tatika soti kuwona.’ Nsita yamene iyo nitatika cendi kuwona nipo yeve nimuwona.

¹⁴ “Lomba eniwuzya kuti, ‘Mulungu wa makolo ŵasu ekusalula kuti uziŵe vakupangwa yeve, uwone wolungama ŵala, nipo umvwe malizu ŵake olaŵila nawe.

¹⁵ Pakuti uzeumcitile umboni ku ŵanthu wonse pa vawawona novimvwa.

¹⁶ Nga lomba ucelwela vinji? Yima, utembezye zina yake mwa mcinzi, ubatiziwe nosambizyiwa kuti macimo ŵako asukiwe.’”

Asikulu onituma ku ŵanthu ŵa mitundu iyakine

¹⁷ “Lomba niwelela ku Yelusalemu, nipo penenzolomba mu Ngʼanda ya Mulungu, nicita ngani nakomoka.

¹⁸ Niwona Asikulu oniwuzya kuti, ‘Yendesha, fuma mmangu mu Yelusalemu muno, cikomo ŵanthu aŵa azeazomelelini umboni wako olaŵila va newo.’

¹⁹ “Newo nelaŵila kuti, ‘Ni vyendi Asikulu, cikomo ŵeve woziŵa kuti newo nenzokuya ku ngʼanda iliyonse ya malombelo kuyoŵakata noŵatwala mu jele, noŵakwapula wonse wocetekela mwewo.

²⁰ Penzopaya Stefano, mboni yanu, nane soti nenzepo. Nenzozomelezyana nawo, nipo nenzosunga ni newo vovwala va wala enzomupaya.’

²¹ “Pamene apo Asikulu eniwuzya kuti, ‘Yima, cikomo newo nizekutume kutali ku ŵanthu ŵa mitundu iyakine.’”

Mkulu wa asilikali owuzyiwa kuti Paulo ni nzika ya Ciroma

²² Mpaka pa malizu aŵa, ŵanthu ŵala enzomvwisha luweme malizu ŵa Paulo. Koma pecizotomola malizu osilizya ŵala, ŵeve etatika kuŵilikizya kuti, “Munthu woteti owamila kumupaya. Owamilalini soti kuŵa moyo.”

²³ Ŵeve enzoŵilikizya nozunguzya malaya ŵawo, nowazya lukungu kululu.

²⁴ Nsita yamene iyo mkulu wa asilikali wala elamula kuti aloŵe naye Paulo mu linga ya asilikali yala. Eŵawuzya kuti amukwapule, kuti yeve wala awulule cikomo cenzomuŵilikizyila tetyo ŵanthu ŵala.

²⁵ Pamene apo epanamila citangulila wa umba ya asilikali. Lomba asilikali ŵake pecimanga Paulo kuti amkwapule, Paulo ŵala ekonsha citangulila wala kuti, “Kansi matetulo ŵanu ozomezya kukwapula nzika za Ciroma mukaliyenozipa mlandu?”

²⁶ Citangulila pecimvwa ivi, eluta kwa mkulu wa asilikali wala nomukonsha kuti, “Kansi mwewo mukuti mucite tyani? Munthu wala ni nzika ya Ciroma.”

²⁷ Pamene apo mkulu wala ecizokonsha Paulo kuti, “Kansi wewo niwe nzika ya Ciroma?” Yeve eyasuka kuti, “Eee.”

²⁸ Lomba mkulu wala emuwuzya kuti, “Newo nicitosita ufulu wangu uyu na ndalama zinyinji.” Paulo elaŵila kuti, “Koma newo ufulu wangu uyu nicitovyalika nawo.”

²⁹ Pamene apo asilikali enzomukonsha makonsho, emuleka. Mkulu wala ecita wowa peciziŵa kuti emanga munthu enze nzika ya Ciroma.

Paulo ku Kaupo Kakulu ka Ayuda

³⁰ Mkulu wa asilikali wala epangwa kuziŵa cikomo ngaco–ngaco cenzopela Paulo mlandu Ayuda. Tetyo, mmawa mwake, emumangulula nolamula kuti Akulu ŵa Ansembe na wonse ŵa ku Kaupo Kakulu ka Ayuda awungane. Nipo ewela na Paulo nomupanamika pakati pawo.