Macitilo 2 - Chinsenga New Testament

Kuwela kwa Mzimu Mtuŵa

¹ Nsiku ya cisangalalo ca Pentekosti peyifwika, ŵala wonse enze pamo mu ngʼanda imo.

² Movundumukizya kwimvwika kufumila kululu mlilimo ngani mphepo ikulu, nozuzya ngʼanda yonse yenzonkhalamo.

³ Nipo ewona ngani tumalulimi twa mulilo twiyaŵikana nonkhala pa ŵeve, aliyense kake.

⁴ Wonse ŵala ezuzyiwa na Mzimu Mtuŵa, nipo etatika kulaŵila vilaŵilo va cilwendo, ngani Mzimu mwenzoŵalaŵilishila ŵala.

⁵ Tetyo, mu Yelusalemu mwala mwenze Ayuda ayakine, ŵanthu otemwa Mulungu, ofumila ku vyalo vonse va pansi.

⁶ Mlilimo wala pewimvwika, ŵanthu anyinji ewungana. Wonse ekanganishiwa, cikomo aliyense mwa ŵeve enzoŵamvwa olaŵila cilaŵilo cake.

⁷ Ekanganishiwa, nosiliwa nzelu nipo elaŵila kuti, “Kansi wonse aŵa olaŵila ni Agalileyalini?

⁸ Nga, ni cikomo canji aliyense mwa sewo tuŵamvwa olaŵila mu cilaŵilo ca kwawo?

⁹ Ayakine mwa sewo na Apaliti na Amedi na Ayelami, ayakine ni wonkhala ku Mesopotamiya, ku Yudeya na ku Kapadokiya, ku Ponto na ku Asiya,

¹⁰ ku Filijiya na ku Mpamfiliya, ku Ejipito, na ku madela ŵa Libiya kufupi na ku Kilene, ayakine ni alwendo ofumila ku Roma,

¹¹ niye kuti Ayuda na ayakine okonkha va Ciyuda. Ayakine soti ni Akilete na Alabu, koma tonse tuŵamvwa aŵa ŵanthu olaŵila mu vilaŵilo vasu va nchito ikulu ya Mulungu.”

¹² Wonse ekanganishiwa nosiliwa nzelu, nipo etatika kukonshana kuti, “Kansi ici ni cinji?”

¹³ Koma ayakine enzoyingoseka nolaŵila kuti, “Akolwa vinyu wa lomba.”

Petulo osambizya ŵanthu

¹⁴ Koma Petulo epanama pamo na nthumi zala kumi na yumo, nipo elaŵila moŵilikizya kuti, “Mwewo Ayuda, na mwewo monse munkhala mu Yelusalemu muno, mvwani nipo mumvwishishe luweme malizu ŵangu.

¹⁵ Aŵa ŵanthu aliyokolwe yayi, ngani mwamulingililila mwewo, pakuti nsita ikali 9 koloko mmawa.

¹⁶ Koma ivi niye vecilaŵila Mneneli Yoweli va ku nthangu kuti,

¹⁷ ‘Mulungu olaŵila kuti, Pa masiku osilizya nizeniyike Mzimu wangu mwa ŵanthu wonse. Ŵana ŵanu analume na anakazi azoŵilizya va Mulungu; alumbwana ŵanu azowona vinthu menso na menso, nipo akulukazi azolota maloto.

¹⁸ Ni vyendi, pa masiku awo nizeniyike Mzimu wangu, cukanga mwa ŵazya ŵangu analume na anakazi, nipo azoŵilizya va Mulungu.

¹⁹ Nizenicite vokanganisha ku mkumbi wa Kululu, nipo pano pansi viziŵikilo ivi: milopa, mulilo na cusi catolo–tolo.

²⁰ Zuŵa ikayaluke ngani mfinzi nipo mwezi ngani milopa, ikaliyofwika nsiku ikulu na ya ulemelelo ya Asikulu Mulungu.’”

²¹ Pamene apo aliyense watiazeacinzike zina ya Asikulu molicefya, azeapulumuke.

²² “Mwewo Aisilayeli, mvwani malizu aŵa. Yesu wa ku Nazaleti enze munthu wecituma Mulungu kwa mwewo. Mulungu emusimikizyilani ivi na va mphamvu, vokanganisha na viziŵikilo venzocita kupitila mwa yeve pakati panu, ngani muziŵa.

²³ Tetyo, Yesu uyo etwaliwa mweciwamyilatu Mulungu, na mwakuziŵila yeve vinthu. Koma mwewo mwimupaya pomutwala ku ŵanthu woyifya kuti amupanyike pa mtanda.

²⁴ Koma Mulungu emumangulula ku voŵaŵa va imfwa, nomuwukisha kwa akufwa, cikomo cenzelini cowamila kuti acimfyiwe na imfwa.

²⁵ Pala Davide polaŵila va yeve elaŵila kuti, ‘Nuwona Asikulu Mulungu pa menso pangu nsita zonse; pakuti akuŵa ku kwanja kwangu kwendi kuti ningasungʼuzyike.

²⁶ Ni cikomo cake mtima wangu wisangalala, nipo nilaŵila motemwa. Muŵili wangu uzeunkhale soti mu cicetekelo. Ni cendi, cukanga muŵili wangu wamene uzeupumule mu manda,

²⁷ nucetekela kuti muzenisiyelini ku malo ŵa ŵanthu akufwa, keno kulekelela Atuŵa ŵanu kuti awole.

²⁸ Mwiniziŵisha njila ya kuya ku moyo, nipo muzemunizuzye na cisangalalo pa menso panu.’”

²⁹ “Mwenekwasu, ningalaŵile namwe mosimikizya va kolo yasu Davide. Yeve emwalila, noyikiwa mu manda, nipo manda ŵake alipo mpaka lomba.

³⁰ Pala yeve enze mneneli, nipo eviziŵa Mulungu vemulayizya molapila vakuti yumo mwa azikulu ŵake niye ŵatiazeloŵe ufumu wake.

³¹ Niye kuti Davide wala ewonelatu vamene ivi, vakuti Kristu azeawuke kwa akufwa, nipo pamene apo elaŵila malizu ŵala olaŵila kuti, ‘Yeve aliyosiyiwe ku malo ŵa ŵanthu akufwa, nipo muŵili wake uliyowole.’”

³² “Yesu wala, Mulungu emuwukisha cendi kwa akufwa, nipo tonse nise mboni za ivi.

³³ Yeve ecinzikiwa kuŵa ku kwanja kwendi kwa Mulungu, nopokela Mzimu Mtuŵa, wecilayizya Atata. Nipo vamuwona na kumvwa niye cawanzi cake cawatitumizyila.”

³⁴ “Pala Davide aliyokwele kuya Kululu, koma yeve yeka elaŵila kuti, ‘Leza ewuzya Asikulu ŵangu kuti, “Nkhala ku kwanja kwangu kwendi;

³⁵ mpaka nikayalushe alwani ŵako kuti aŵe ngani cokandapo mendo ŵako.”’”

³⁶ “Tetyo, ŵazomelezyeni Aisilayeli wonse aziŵe cendi kuti Yesu wala mwewo wamwipanyika pa mtanda wala, Mulungu emuyalusha kuti aŵe Asikulu na Mpulumushi.”

³⁷ Ŵanthu pecimvwa ivi, viŵalasa ku mtima, nipo ekonsha Petulo na nthumi ziyakine zala kuti, “Enekwasu, nga lomba sewo ticite vinji?”

³⁸ Petulo eŵawuzya kuti, “Yalukani mtima, nipo aliyense wa mwewo abatiziwe mu zina ya Yesu Kristu. Mukacita tetyo macimo ŵanu alekelelewe, nipo muzemupokele cilambu ca Mzimu Mtuŵa.

³⁹ Pala Mulungu vecilayizya, elayizyila mwewo, ŵana ŵanu, nipo ŵanthu wonse onkhala kutali, wonse ŵamene Asikulu Mulungu wasu ŵatiazeyite.”

⁴⁰ Petulo elaŵila soti malizu ayakine anyinji, noŵacenjezya kuti, “Fumankoni ku malingililo ovyongoloka ŵa luko iyipa ino.”

⁴¹ Pamene apo, ŵanthu ecimvwa malizu ŵake ŵala, ebatiziwa, nipo nsiku iyo ŵanthu ngani myanda itatu (3,000) eyangizyiwa pa winji wawo.

Unkhalo wa Akristu wotatika

⁴² Ŵanthu ŵala, enzowungana molitwala kuti amvwe vezenzosambizya nthumi. Enzomvwana, nipo enzokulya cakulya nolombela pamo.

⁴³ Ŵanthu wonse enzoyopa Mulungu powona vokanganisha na viziŵikilo vinyinji vezenzocita nthumi.

⁴⁴ Ocetekela wonse enze okatizyana, nipo enzoyaŵana vinthu vawo.

⁴⁵ Enzositisha vonse venze navo, nipo ndalama zake enzoyaŵila wonse, malinga ni kusoŵa kwa aliyense.

⁴⁶ Nsiku na nsiku enzoungana na mtima umo mu Ngʼanda ya Mulungu, nipo enzolyela pamo ku ngʼanda zawo. Enzokulya cakulya cawo cala motemwa nipo na mtima wa mtendele.

⁴⁷ Enzotembezya Mulungu, nipo ŵanthu wonse enzoŵawamila mtima. Nipo nsiku na nsiku Asikulu enzoŵayangizyila ayakine opokela cipulumusho.