Macitilo 16 - Chinsenga New Testament

Timoteyo opelekezya Paulo na Sila pa ulwendo

¹ Paulo efwika ku Delibe na ku Listala. Kwamene uko kwenze msambili, zina yake Timoteyo. Anyina enze Muyuda wocetekela Kristu, koma awisi enze Mgiliki.

² Enekwawo ŵa ku Listala na ŵa ku Ikoniyo enzomulaŵilila viweme Timoteyo.

³ Paulo epangwa kuti yeve amupelekezye. Tetyo, emusilimula cikomo ca Ayuda enze kwamene kwala, pakuti wonse enzoziŵa kuti awisi ŵa Timoteyo na Agiliki.

⁴ Penzopita mu mizinda, enzoziŵisha ŵanthu mfundo zecimvwana atumiki na akulu ŵa mpingo ŵa ku Yelusalemu, noŵawuzya kuti azisunge.

⁵ Motetyo, mipingo ya Akristu imangiwa pa cicetekelo cotangʼa, nipo oloŵamo enzopakila–pakila nsiku na nsiku.

Paulo owona munthu wa ku Masedoniya mu maloto

⁶ Paulo na ayake ŵala epitilila citwa ca Filijiya na Galatiya, pakuti Mzimu Mtuŵa eŵalesha kuŵilizya Malizu ŵa Mulungu ku Asiya.

⁷ Pecifwika ku malile ŵa Misiya, eyesa kuloŵa mu citwa ca Bitiniya, koma Mzimu wa Yesu aliyoŵazomezye.

⁸ Motetyo, epitilila Misiya nofwika ku Tloasi.

⁹ Usiku, Paulo mu tulo ewona munthu wa ku Masedoniya wapanama osenga kuti, “Tawukilani ku Masedoniya kuno, muzemutiyavye.”

¹⁰ Yeve peciwona ivi, nsita yamene iyo tikonzeka ulwendo wakuya ku Masedoniya, cikomo tiziŵa cendi kuti Mulungu niye watiyita kuti tikaŵilizye Malizu Aweme ku ŵanthu ŵa kwamene kwala.

Lidiya oyaluka mtima ku Filipi

¹¹ Kufuma ku Tloasi tiyenda mu wato kuya ku cilumba ca Samotilase, nipo mmawa mwake tipitilila mpaka ku Neapoli.

¹² Kufumila uko, tiluta ku Filipi, mzinda wa mu citwa cotatika ca mu citwa cala ca Masedoniya, nipo soti boma ya Roma. Tinkhala mu mzinda wala masiku atontho.

¹³ Pa nsiku ya Sabata, tifuma mu mzinda mwala noluta ku mmana kwetilingilila kuti kuli malo wolombelako. Lomba tinkhala pansi nolaŵila na anakazi ewungana kwala.

¹⁴ Pakati pawo penze mwanakazi muyakine, zina yake Lidiya. Enze wa ku mzinda wa Tiyatila, nipo nchito yake yenze yositisha nyula zisweta. Enze munthu wolomba Mulungu, nipo Asikulu evula mtima wake kuti amvwishishe venzolaŵila Paulo.

¹⁵ Yeve na ŵa mu banja yake pecibatiziwa, etisenga kuti, “Keno mwaniwona cendi kuti nine munthu wocetekela Asikulu, welani muzemuŵe mu ngʼanda mwangu.” Nipo etiyumilizya tetyo.

Paulo na Sila oyikiwa mu jele ku Filipi

¹⁶ Nsita iyakine petenzokuya ku malo wolombelako, tikumana na msimbi muzya ekatiwa na ciŵanda comulaŵilisha va pa nthangu. Enzophindulisha asikulu ŵake ngako polotela kwake.

¹⁷ Yeve etatika kukonkha Paulo na sewo tonse, oŵilikizya kuti, “Ŵanthu aŵa ni atumiki ŵa Mulungu wa Kululu. Omuŵilizyilani njila ya cipulumusho.”

¹⁸ Msimbi wala ecita ivi masiku anyinji. Koma Paulo ivo, vimukalifya, tetyo ecunguluka nowuzya ciŵanda cala kuti, “Wewo, mu zina ya Yesu Kristu, nukulamulila kuti ufume mwa uyu msimbi.” Nipo nsita iyo ciŵanda cala cifuma.

¹⁹ Asikulu ŵake ŵa msimbi wala peciwona kuti aliye phindu naye soti, ekata Paulo na Sila noŵatwala ku nsaka ya akulu.

²⁰ Pecifwika nawo kwa akulu opingula milandu, eŵawuzya kuti, “Ŵanthu aŵa ni Ayuda, nipo otisawusha mu mzinda mwasu.

²¹ Osambizya myambo yatisazomelezyewa keno kuyikonkha, cikomo nise Aroma.”

²² Ŵanthu wonse egudukila Paulo na Sila, nipo akulu ŵala opingula milandu elamula kuŵangʼambila vovwala vawo na kuti akwapuliwe.

²³ Peciŵakwapula ngako, eŵapoza mu jele, nolamula wolindilila jele yala kuti aŵasunge luweme, angawutuke.

²⁴ Cikomo ca malizu ŵala, wolindilila jele wala eciyoŵakhomela mu cipinda ca mkati ngako mwa jele, nomangilila mendo ŵawo mu magoli.

Vokanganisha vucitika mu jele

²⁵ Koma pakati pa usiku Paulo na Sila enzolomba noyimba nzimbo zocinzika Mulungu, akayidi ayawo enzomvwililila.

²⁶ Movundumukizya kwiwela civomezi ca mphamvu, motetyo kuti maziko ŵa jele esungʼunzyika. Nsita iyo viseko vonse vivuliwa, maunyolo ŵa mkaidi aliyense emangululiwa.

²⁷ Wolindilila jele wala peciwuka, nowona kuti viseko vonse va mu jele ni vovulika, eyesa kuti akayidi aŵutuka. Pamene apo esolola cipula cake kuti azipaye.

²⁸ Koma Paulo eŵilikizya kuti, “Wewo usaziceneke! Tonse tilipo.”

²⁹ Apo wolindilila jele wala eyitisha nyale, nowutukila mkati, nipo enzotutumila na wowa, noliponesha pa mendo ŵa Paulo na Sila.

³⁰ Tetyo, eŵafumyila kunja, noŵakonsha kuti, “Mwepo, kansi nicite vinji kuti nipulumuke?”

³¹ Ŵeve emuyasuka kuti, “Cetekela Asikulu Yesu, nipo uzepulumuke, pamo na ŵa mu ngʼanda mwako.”

³² Emuŵilizyila malizu ŵa Asikulu na wonse ŵa mu ngʼanda mwake.

³³ Nsita iyo, cukanga wenze usiku, yeve eŵatola noŵasuka vilonda vawo. Nipo pamene apo yeve pamo na wonse ŵa mu ngʼanda mwake ebatiziwa.

³⁴ Pa vuli pake eluta nawo ku ngʼanda kwake, noŵapa cakulya. Nipo yeve pamo na wonse ŵa mu ngʼanda mwake esangalala ngako cikomo cocetekela Mulungu.

Wopingula milandu ewuzya Paulo na Sila kuti aŵekuya

³⁵ Mmawa pekwecica, akulu wopingula milandu etuma asilikali kuyolaŵila kuti, “Ŵamangululeni ŵanthu ŵala aŵekuya.”

³⁶ Wolindilila jele wala ekonkhololela Paulo malizu ŵala elaŵila kuti, “Akulu opingula milandu atumizya malizu kuti tikumangululeni. Niye kuti mwewo fumani, mwakuya mwa mtendele.”

³⁷ Koma Paulo eŵawuzya asilikali ŵala kuti, “Ŵeve ŵala etikwapulila pakati pa ŵanthu, osapingula mlandu wasu, conse ico sewo nise nzika za ufumu wa Ciroma, ciyakine notipoza mu jele. Niye kuti lomba opangwa kutifumya mwa cisinsi? Ivo veka yayi! Awele ŵamene awo azetifumye ŵeka.”

³⁸ Asilikali ŵala eluta kuyoŵakonkhololela akulu opingula milandu malizu ŵala. Ŵeve ŵala pecimvwa kuti ni nzika za ufumu wa Ciroma, ecita wowa.

³⁹ Motetyo, ewela noŵapepesa, noŵafumya noŵasenga kuti afumemo mu mzinda mwala.

⁴⁰ Paulo na Sila pecifuma mu jele mwala eluta ku ngʼanda kwa Lidiya. Kwamene kwala ewonana na enekwawo, nipo eŵakosesha, noŵafumya.