Macitilo 13 - Chinsenga New Testament

Banabasi na Saulo otumiwa

¹ Mu mpingo wa ku Antiyokeya, mwenze aŵilizyi na asambizyi aŵa: Banabasi, Simiyoni (woyitiwa Mufipa), Lusiyo wa ku Kilene, Manayene (elelewa pamo na bwanamkubwa Helode), nipo soti Saulo.

² Nsiku iyakine ŵeve peciwungana kuti alombele Asikulu na kuti alileshe cakulya, Mzimu Mtuŵa eŵawuzya kuti, “Munipatulile Banabasi na Saulo kuti akakate nchito yeniŵaitila.”

³ Lomba pecileka kulya nolomba, eŵayika manja pa mitu noŵatuma.

Banabasi na Saulo ku Kiplo

⁴ Banabasi na Saulo, nthumi na Mzimu Mtuŵa wala, eluta ku Selewukiya. Kufumila uko eyendela mu wato nofwika ku cilumba ca Kiplo.

⁵ Pecifwika ku mzinda wa Salami, eŵilizya Malizu ŵa Mulungu mu kacisi wa Ayuda. Enze soti na Yohane, woyitiwa Maliko, woŵayavya.

⁶ Ŵeve epitilila cilumba conse mpaka kuyofwika ku mzinda wa Pafosi. Kwamene uko efwanako munthu wa mayele, zina yake Balayesu, Muyuda wamene enzoziyesa mneneli.

⁷ Yeve enzonkhala kwa bwanamkubwa Segiyo Paulo, munthu wa nzelu. Segiyo Paulo wala, eyita Banabasi na Saulo, cikomo yeve enzopangwisha kumvwa Malizu ŵa Mulungu.

⁸ Koma kwamene uko efwanako na Elimasi, wa mayele muyakine (Elimasi niye kuti “wa mayele”). Yeve etolola nawo, kuyopa kuti bwanamkubwa wala angacetekele.

⁹ Koma Saulo, wamene enzoyitiwa soti Paulo, pecizuzyiwa na Mzimu Mtuŵa, emulolesha

¹⁰ nolaŵila kuti, “Wewo mwana wa Satana, mulwani wa cilungamo, wa mtima wa wenye kulikonse nakucenjelesha kwa mtundu–mtundu, ukaleke lini kunyongolola njila zolungama za Asikulu?

¹¹ Wona kwanja ya Asikulu yukunyata lomba apa. Unkhale mphofu osawona zuŵa pa kansita.” Mmangu–mmangu fulele na nfinzi viwela pali yeve, esakila munthu kuti amutangulile na kwanja.

¹² Bwanamkubwa wala peciwona vicitika, ecetekela. Ekanganishiwa navo venzosambizya ŵeve va Asikulu.

Antiyokeya citwa ca Pisidiya

¹³ Paulo na muyake eyendela mu wato kufuma ku Pafosi kuyofwika ku Pega mu citwa ca Pamfiliya. Koma Yohane eŵasiya nowelela ku Yelusalemu.

¹⁴ Kufumila ku Pega, ŵeve epitilila nofwika kwa Antiyokeya mu citwa ca Pisidiya. Pa nsiku ya Sabata eloŵa mu kacisi wa Ayuda, nonkhala pansi.

¹⁵ Peciŵelengewa malizu ŵa mu buku ya Matetulo ŵa Mose na mu buku ya aneneli, akulu ŵa kacisi wala eŵatumila malizu oŵawuzya kuti, “Enekwasu, keno muli na malizu okosesha ŵanthu aŵa, laŵilani.”

¹⁶ Pamene apo Paulo epanama noyimya kwanja kwake kuti ŵanthu aŵe celele, nipo etatika kulaŵila kuti, “Mwewo Aisilayeli na ayakine wonse woyopa Mulungu, mvwani.

¹⁷ Mulungu wa mtundu wasu wa Aisilayeli, esalula makolo ŵasu, nipo eŵakuzya peenze alwendo ku calo ca Ejipito. Eŵafumya mu calo mwala na kwanja kwake kwa mphamvu,

¹⁸ eŵasamala mphela mokoselela mu cipululu vyaka makumi anayi (40).

¹⁹ Yeve eceneka mitundu isanu na iŵili ya ŵanthu ŵa mu calo ca Kanani, notwala calo cawo kwa Aisilayeli kuti ciŵe cawo–cawo. Vonse ivi vitola vyaka makumi kumi anayi na makumi asanu (450).

²⁰ “Pa vuli pake eŵapa wopingula kufwika nsita ya Mneneli Samuyeli.

²¹ Ŵanthu esenga kuti aŵape mfumu, nipo Mulungu eŵapa Saulo, mwana wa Kisi, munthu wa mkoka wa Benjameni, yeve eŵalamulila vyaka makumi anayi.

²² Pa vuli pake, Mulungu emufumyapo, Saulo wala, noyika Davide kuti aŵe mfumu yawo. Va yeve Mulungu elaŵila kuti, ‘Nafwana Davide, mwana wa Yese, niye munthu wangu wa pa mtima, watiazecite vonse vanupangwa newo.’

²³ “Mwa azukulu ŵa Davide wala Mulungu esalula Yesu kuti aŵe Mpulumushi wa Aisilayeli ngani mwecilayizyila kale.

²⁴ Yeve penzeakaliyotatika nchito, Yohane enzoŵilizya kwa Aisilayeli wonse kuti ayaluke mtima nobatiziwa.

²⁵ Yohane peenze pafupi kusilizya nchito yake, ekonsha ŵanthu kuti, ‘Kansi mwewo, muyesa kuti newo nine ŵani? Newo ninelini wamulindila wala yayi. Koma pakuza muyakine pa vuli pangu wakuti newo nine wosawamila cukanga kumangulula nkhwaŵilo zake.’

²⁶ “Mwenekwasu, azikulu ŵa Abulahamu, na ayakine wonse woyopa Mulungu, malizu ŵala wa cipulumusho Mulungu watumizya kwa sewo.

²⁷ Ŵanthu onkhala ku Yelusalemu na akulu ŵawo aliyomuziŵe Yesu, nipo aliyomvwishe malizu ŵa aneneli ŵoŵelengewa nsiku ya Sabata iliyonse. Koma pomupa mlandu Yesu wala kuti apayiwe, ecita vyendi vecilaŵililatu aneneli.

²⁸ Cukanga kuti aliyofwane cikomo comupayila, koma esenga Pilato kuti Yesu wala apayiwe.

²⁹ Nipo pecisilizya kucita vonse vilembewa va yeve, emufumyapo pa mtanda pala nomuyika mu manda.

³⁰ Koma Mulungu emuwukisha kwa akufwa,

³¹ nipo pa masiku anyinji eciŵa owonekela ku ŵanthu ŵala emupelekezya ku Yelusalemu kufumila ku Galileya. Ŵala niye omucitila umboni ku ŵanthu wonse lomba.

³² “Nipo sewo tukuŵilizyilani Malizu Aweme ŵakuti vilipo vecilayizya makolo ŵasu Mulungu.

³³ Tetyo, vecilayizya yeve eticitila sewo, na azikulu ŵawo, powukisha Yesu kwa akufwa. Ngani mwamwilembewela mu Salimo ya ciŵili kuti, ‘Wewo niwe Mwana wangu. Newo lelo nakuvyala.’

³⁴ Nipo vakuti emuwukisha kwa akufwa kuti asawole, Mulungu elaŵila kuti, ‘Nizekupeni mashukisho ŵa pa mbali na wocetekeleka ŵenelayizya Davide.’

³⁵ “Ni cikomo cake mu Salimo iyakine olaŵila soti kuti, ‘Mukalekelelelini Mtuŵa wanu kuti awole.’

³⁶ “Davide pecitumikila Mulungu mu luko yake, ecifwa noyikiwa pamo na makolo ŵake, nipo muŵili wake wiwola.

³⁷ Koma wala weciwukisha kwa akufwa Mulungu, aliyowole yayi.

³⁸ “Tetyo, mwenekwasu, ziŵani kuti cikomo ca Yesu wala tuŵilizya vakuti macimo olekelelewa.

³⁹ Kupitila mwa Yeve aliyense wocetekela ofwana cipulumusho conse cakuti sembe aliyocifwane pokonkhelela Matetulo ŵa Mose.

⁴⁰ Tetyo mwewo muŵe celu kuti vingakuponeleni venzolaŵila aneneli ŵala kuti,

⁴¹ ‘Mvwani mwewo ŵanthu otafulila, kanganishiwani nipo mucenekeke. Pakuti pa nsita ya moyo wanu, newo nizenicite cinthu camungacetekelelini, cukanga muyakine akuwuzyeni.’”

⁴² Penzofuma, ŵanthu ŵala esenga Paulo na Banabasi kuti azealaŵile nawo soti ivo nsiku ya Sabata iyakine.

⁴³ Ŵanthu ewungana ŵala, pecimwazyikana Ayuda anyinji, nipo soti ŵanthu ŵa mitundu iyakine eyaluka nokonkha va Ciyuda, ekonkhelela Paulo na Banabasi. Aŵa aŵili elaŵila na ŵala ŵanthu, noŵasenga kuti atangʼe kukonkha veciŵacitila Mulungu mwa cisomo cake.

⁴⁴ Pa nsiku ya Sabata iyakine yala, pafupi–fupi ŵanthu wonse ŵa mu mzinda mwala ewungana kuti amvwe malizu ŵa Asikulu.

⁴⁵ Ayuda ŵala peciwona ŵanthu anyinji teti, ecita ukwa ngako. Etatika kususha venzolaŵila Paulo, nipo emucita vyongo.

⁴⁶ Koma Paulo na Banabasi elaŵila motangʼa, elaŵila kuti, “Kwiwamila cendi kuti titatike kuŵilizya Malizu ŵa Mulungu kwa mwewo. Tetyo, pakuti mwaŵakana, nipo potetyo mwawonesha mweka kuti nimwe osawamila kupokela moyo wosasila, sewo tukusiyani, tukuya ku ŵanthu ŵa kunja.

⁴⁷ Pala Asikulu etiwuzya kuti, ‘Nakuyika kuti usanikile ŵanthu ŵa kunja, kuti mwa wewo nipulumushe calo conse ca pansi.’”

⁴⁸ Ŵanthu ŵa mitundu iyakine ŵala pecimvwa ivi, etemwa, notembezya mwa Asikulu. Nipo wonse ŵecisalula Mulungu kuti apokele moyo wosasila, ecetekela.

⁴⁹ Malizu ŵa Asikulu emwazyikila mu calo conse mwala.

⁵⁰ Koma Ayuda ŵala ewusha mitima ya anakazi ayakine ŵa palulu olombela Mulungu, nipo soti ya acitangulila analume ŵa mu mzinda mwala. Tetyo, etatikisha manzunzo osausha Paulo na Banabasi, noŵapilikisha mu calo cawo mwala.

⁵¹ Koma ŵeve ekunkhumula lito ya ku mendo kwawo moŵasusha, nakuya ku Ikoniyo.

⁵² Nipo asambili ŵa ku Antiyokeya ezuzyiwa na Mzimu Mtuŵa nipo enze na cimwemwe cikulu.