فیلیپیان 3 - گیله ماز

مسیحِ ایمان راه دِلِه صالِح بِشمارِسِّه هَبین

¹ سَرآخر، اِی می اَداشان، خُداوندِ دِلِه خُشحال هَبین! تمام اون چیزانی که دَرَم شِمِرِه نِویسِنَم مَرِه زحمتی نیِه، بلکه شیمی اَمنیَّتِ وَسین هیسِه.

² اون سَگانِ جی دوری هَکُنید؛ اون گُناهکارانِ جی دوری هَکُنید! اوشانیکه خَتنِه هَکُردن وَسین جِسمِ بینَنِ جی، دوری هَکُنید.

³ چون خَتنِه‌ هَبوسِّه واقعی اَمائیم، که خُدایِ روحِ همره پرسِّش کانیم، وَ مسیحْ عیسی یه دِلِه فَخر کانیم، و اَمی تکیه جسمِ سَر نییِه-

⁴ هر چَن که مَن، خودَم، خُجیرِ دَلیلایی تَکیِه هَکُردَنِ وَسین جسمِ سَردارم. اَگِه یِنَفر گَمان کانه که دلیلی تَکیِه هَکُردَنِ وَسین جسمِ سَر داره، مَن بیشتر دارِم:

⁵ هَشتِمین روزِ دِلِه خَتنِه هَبام، اسرائیلی قومِ جی، بنیامینِ تَلک و طایفه جی، عبرانی وَچِه، عبرانی پیَر و مآر جی؛ طبقِ شریعت، فریسی؛

⁶ طبقِ غیرت، کلیسایِ آزار دهنده؛ طبقِ صالِحی که شریعتِ جی هَنِه، بی عیب.

⁷ وَلی هر چی که می نَفع با رِه، اونِه مَسیحِ خاطِری ضرر بِشمارِسَّم.

⁸ راس راسی، مَن هَمِه چیرِه اینه وَسین که می خداوند مسیحْ عیسی بِشناختَن همه چی یه جی بالاتر هیسِه، ضرر دانَم، و اونه خاطِری هَمِه چیرِه اَز دَس هَدَم و اوشانِه ایتا آشغالِ مِثان دانَم تا مَسیح رِه بِدَس بیارَم

⁹ وَ اونه دِلِه پیدا هَبوم، نه می صالحی یه همره که شریعتِ جی هَنِه، بَلکه اون صالحی یه همره که مَسیحِ ایمانِ راهِ جی بِدَس هَنِه، همون صالحی که خُدایِ جییِه و طبقِ ایمانِ.

¹⁰ خَنَم مَسیح و اونه زندهِ هَبوسَّنِ قُوَّتِ بِشناسِم و اونه عذابایِ دِلِه شَریک هَبوُم، اونه مرگ دِلِه اونه مِثان هَبوُم،

¹¹ تا هر جور که هَبو مُردگانِ جی، زِندِه هَبوسَّنِ بِدس بیارِم.

تَقَلّا هَکُردَن، هَدَفِ بَرِسییَنِ وَسین

¹² نَگونَم اَلآن ایشانهِ بِدَس بیاردَم یا کامل هَبام، بلکه مَرِه پِیش بَرنَم تا چیزی رِه بِدَس بیارِم که مسیحِ عیسی اونه خاطِری مَرِه بِدَس بیاردِه

¹³ اَداشان، گَمان نُکانَم هَلَه اونِهِ بِدَس بیاردِه بوم؛ وَلی یه کاری کانَم، وَ اون اینه که اونچه دُمّال سَر دَرِه رِه یاد کانَم و اونچه یه سمت که دَر پِیش دَرِه یه وَسین، تَقلّا کانَم،

¹⁴ هدفِ برِسیَنِ وَسین تَقلّا کانَم، تا جایزه‌ای که خُدا اونِه مسیحْ عیسی دِلِه مَرِه جآرِ سَمت دُخوانِسِّه رِه، بِدس بیارِم.

¹⁵ همه اَما که بالِغ هیسیم، بایسّی اینجور فکر هَکُنیم؛ و اَگِه هر چی یه دِلِه یِجور دیگه فِکر کانید، خُدا این رِه هم شِمِره معلوم کانه.

¹⁶ مُهم اینه که به هرمرحله‌ ایی که بَرِسییم، اون مِثان رفتار هَکُنیم.

¹⁷ اِی اَداشان، با هم می جی سرمشق هَگیرین، وَ شیمی توجه رِه اوشانه وَسین بَنین که طِبق الگویی که اَمیی دِلهِ سُراغ دارِن، رفتار کانَن.

¹⁸ چونکه مَن اوشانِ بارِه چَن دَفه شِمِرِه باگوتَم و حتّی اَلآن هَم خودَم آرسویه همره گونَم، خِیلیان، مسیحِ صلیبِ دُشمَنانِ مِثان رفتار کانَن.

¹⁹ اوشانِ آخَرعاقبت هَلاکَتِ. اوشانِ خُدا، اوشانِ شِکَمِ و نَنگ آورِ چیزان ره فَخر کانَن، اوشان زمینی چیزانِ بارِه فکر کانَن.

²⁰ اَسِه اونکه اَما آسِمانِ شی هیسیم وتمام شوقِ هَمرَه انتظار کَشِنیم که نِجات دَهَنده، یعنی اَمی خداوند عیسی مَسیح، اوجه یه جی بییِه.

²¹ اونیکه اَمی ذلیلِ تَنِ عوض کانه تا اونه جلال بِیتِه تَنِ مِثان هَبیم، اون قُوَّتِ همره، که اونه قُوَّت دَنِه تا تمام چیزان رِه خودِشِه مُطیع هَکونِه.