فیلیپیان 2 - گیله ماز

مَسیح فروتنی یه جی سَرمَخش بِیتَن

¹ پَس اَگه مَسیح دِلِه دِلگَرمی دارین، اَگه اونه مُحبت شیمی تَسلی یه باعث بونه، اَگه خُدای روحِ دِلِه رفاقت دارِین، وَ اَگه مِهرَبانی و دِلسوزی دارِین،

² هم فِکر هَبوسَّنِ همره واین مُحبتِ همره، یکدِلی و هَم نَظر هَبوسَّنِ همره، می خُشالی رِه کامِل هَکُنید.

³ هیچ کاری رِه خُدخواهی و چِش و هَم چِشمی سَر نَکُنین، بلکه فروتنی یه هَمرَه بَقیِه رِه شیمی جی بِهتَر بِدانید.

⁴ هیچکِدام شیمی جی فقط خودشه منفعَتِ فِکر دَنِبو، بلکه بَقیِه یه فکر هم دَبو.

⁵ هَمون فِکرا که مسیحْ عیسی داشتِه رِه بِدارین:

⁶ اونیکه هر چَن خُدایِ هَمره همشِکل با، برابری جی خدای هَمرَه خودِشَه نَفع سود نَبِردِه،

⁷ بلکه خودِش رِه خالی هَکُردِه وَ پاکاری یه شِکلِ بِیتِه، آدَمان مِثان دُنیا بوما.

⁸ وَ چون آدَمان شکلِ مِثان هَبا خودِش رِه فروتن هَکُردِه وَ تا بَمِردَنِ موقِه، حتّی صَلیبِ سَر بَمِردَن مُطیع هَبا.

⁹ پَس خُدا هَم اونه خِیلی سَربُلَن هَکُردِه وَ ایتا اِسم همه یه اِسمهایِ جی بالاتر اونه هَده،

¹⁰ تا عیسی یِه اِسمِ هَمرَه هَر زانو ایی خَم هَبو، آسِمانِ دِلِه، زَمینِ سَر و زمینِ جیر،

¹¹ وَ هر زِبانی اِقرار هَکونه که عیسی مسیح ’خداوَندِ‘، خُدای پیَرِه جَلالِ وَسین.

نور دنیایِ دِلِه

¹² پَس اِی عَزیزِان، هَمونجور که هَمَش مُطیع بِین، اَلآن نه فقط می وَرجِه، بلکه خِیلی بیشتر، وَختی مَن دَنییَم، شیمی نِجات رِه بایسّی ترس و لَرزِ هَمرَه عمل هَکُنید؛

¹³ چون خُدائه که شیمی دِلِه خودِشِه راضی هَکُردَنِ وَسین کار کانه، هم اِراده یه دِلِه، هم عملِ دِلِه.

¹⁴ هر کاری رِه بدون غُرغُر و جر و بحث اَنجام هَدین،

¹⁵ تا بی عیب و ساده دِل، و خُدایِ بی عیبِ وَچِه هان هَبین، خطاکار و گُمراهِ نَسلِ دِلِه که اوشانِ میَن سِتارِه شانِ مثان این دُنیایِ دِلِه سوسو زَنید،

¹⁶ زندگی یه کَلامِ قائم بِدارین، تا مسیحِ وَگَرِسَّنِ روزِ دِلِه، افتخار هَکونَم که بیخُدی دُو نَکوردَم و بیخُدی زحمت نَکِشییَم.

¹⁷ حتّی اَگه لازم هَبو که می خون ایتا پیشکِشِ مِثان شیمی ایمانِ قربانی یه وَسین بَریخته هَبو، ذوق دارم و شیمی هَمِه یه هَمره خُشحالی کانَم.

¹⁸ و شُما هَم بایسّی اینجور خوشحال هَبین و می هَمرَه خُشحالی هَکُنید.

تیموتائوس و اِپافْرودیتوس

¹⁹ خُداوند عیسی یِه دِلهِ اُمید دارَم تیموتائوسِ خیلی زود شیمی وَرجه روانه هَکونَم تا شیمی حال و اَحوالِ جی باخَبَرِ هَبوُم و می دِل خوشحال هَبو.

²⁰ چونکه دِ هیچکَسِ نِدارَم که راس راسی شیمی راحتی یه فکر دَبو.

²¹ چون که همه خودِشانِه نَفعِ دُمّال دَرِن، نه عیسی مسیحِ کارِ دُمّال.

²² وَلی شُما دانید که تیموتائوس خودشه آزمونِ پَس هَدَه، که چطور می هَمره، ایتا ریکایِ مثان خودِشِه پیَرِ هَمرَه، اِنجیلِ کارِ دِلِه خِدمَت هَکُردِه.

²³ پَس اُمید دارَم هَمینکه می تکلیف روشَن هَبا، اونه شِیمی وَرجه روانه هَکونَم؛

²⁴ وَ خُداوَندِ دِلِه مُطمَعنم که مَنَم خیلی زود هَنَم.

²⁵ من لازِم بِدانِسَّم اِپافْرودیتوس رِه شیمی وَرجه رَوانه هَکونَم، اونی که یک طرف جی می اَداش و هَمکار و می هَمرزمِ، وَ یک طرفِ دیگر جی، کَسیِه که شُما اونِه می احتیاجاتِ برطرف هَکُردنِ وَسین روانه هَکوردِه بِین.

²⁶ چون اون مُشتاقِ شُما هَمِه رِه بِینه و اینه خاطِری که بِشنَوِسّه بِین ناخوش با، پَریشانِ.

²⁷ راس راسی که ناخوش با و دَبا بَمیره. وَلی خُدا اونه رَحم هَکُردِه، وَ نه فقط اونه، بلکه مَرِه هَم رَحم هَکوردِه، تا ایتا غُصِّه می غُصِّه های سر زیاد نَبو.

²⁸ پَس خَنَم هر چی زودتر اونه روانه هَکونَم، تا یِدَفه دیگه اونه بَدییَنِ همره خُشحال هَبین و می غُصِّه یه جه هَم کَم هَبو.

²⁹ پس خُداوَندِ دِلِه، اونه تمام خُشحالی یه هَمرَه قبول هَکُنید و اینجور آدَمانِ حُرمت بَنین،

³⁰ چونکه اون، مَسیحِ کارِ وَسین دَبا بَمیره، و شِیمی خِدمتِ کَم و کاسّی یه جُبرانِ وَسین می خاطِری، خودشه جان خطر میَن توُوادَه.