فیلیپیان 4 - Gilaki New Testament

¹ اَی می جأنٚ دیلٚ برأرأن، شٚمٚره خٚیلی دوس دأرم و ایشتیأق اَمرأ شیمی دٚئنٚ رِه چوم بٚرأیٚم، چونکی شومأن می خوشألی و می زحمتأنٚ پأدأشیدی. اَی می جأنٚ دیلأن، خوداوندَ وفأ بوکونید.

پولسٚ آخری گبأن

² اَنٚم بٚگم کی، جٚه او دونه موحترمٚ خأنم، اِفودیه و سینتیخی ایلتمأس کونم کی کس‌کسٚ اَمرأ آشتی بوکونٚد، چونکی خوداوند شین ایسده.

³ تی جَا، کی می دوس و نیزدیکٚ همکأر ایسی، خأهیش کونم کی او دونه خأنمَ کومک بوکونی کی اَشأنی ایختلأف حل بٚبه، چونکی اوشأن می دوشأ دوش خیدمت بوکودٚد کی اینجیلٚ پیغأمَ وأگویا بوکونیم. اوشأن کلمنت و البأقی می همقطأرأنٚ اَمرأیٚم کی اوشأنی نأمأن، اَبدی زٚندیگی دفترٚ دورون بینیویشته بوبوسته، همکأری بوکودٚد.

⁴ همیشٚک در خوداوند شأد بیبید، و وأزم گم کی شأد بیبید!

⁵ تومأمٚ کأرأنٚ دورون شیمی جَا ایثأر نیشأن بدید و الباقیأنٚ فیکرم بیبید. شٚمٚره خأطر بٚبه کی خوداوند زود وأگردِه.

⁶ هیچی رِه دیلوأپس نیبید. اونی عوض، هر جور بوبوسته، دوعأ و ایلتمأس و شوکرگوزأری اَمرأ، شیمی خأسته‌یأنَ ببرید خودا حوضور.

⁷ اگه اَطو بوکونید، خودا آرأمشَ بٚدٚس اَوٚریدی، او آرأمٚش کی آدمٚ فیکر نتأنه اونَ بفأمه. اَ ایلاهی آرأمٚش شیمی دیل و فیکرَ، کی مسیحَ ایمأن بأوٚردیدی، آسأیش و رأحتی بخشه.

⁸ و اَسه، می جأن و دیلٚ ریفِقأن، آخرسٚر ایچی شٚمٚره گم: شیمی فیکرَ اوچی سٚر جمَ کونید کی دوروست و قأبیلٚ ایحترأمه، اوچی سٚر کی دوروست و تیمیز، اوچی سٚر کی دوس دأشتنیه و شأ ستأیٚش کودن. کأرأنی‌یَ فیکر بوکونید کی خٚیلی خوروم بٚبه و بشأ تمجید کودن.

⁹ هر چی می جَا بأمؤختیدی، یا می جَا فأگیفتیدی، یا بشتأوستیدی، یا می دورون بیدِییدی، اوشأنَ انجأم بدید. بأزین خودایی کی سلأمتی فأده شیمی اَمرأ ایسه.

پیشکشأنٚ رِه تشکر کودن

¹⁰ چنقذر خودا جَا تشکر کونم و اونَ ستأیٚش کونم کی ایوأردِه بأمؤییدی می کومک. دأنٚم کی همیشٚک اَ فیکرٚ دورون ایسأبید، ولی فورصت نأشتیدی اونَ انجأم بدید.

¹¹ البت می منظور اَن نییٚه کی ایحتیأج دأشتیم، چونکی یأد بیگیفتم اوچی وأسی کی دأرم، رأضی ببم و هونی اَمرأ قنأعت بوکونم.

¹² دأنٚم کی فقر و دأرأیی میأن چوطو زٚندیگی بوکونم. همه جور زٚندیگی میأن قنأعتٚ رمزَ بأمؤختم، چی سِئر ببم چی ویشتأ، چی خٚیلی بٚدأرم چی کم.

¹³ خودا هوچی‌یَ کی می جأ بٚخأیٚه، مسیح کومک اَمرأ تأنٚم انجأم بدم، چونکی اونی انجأم دٚئنٚ قودرتَ مسیح مٚرَه بخشِه.

¹⁴ اَ تعریفأنٚ اَمرأ، مٚرَه لوطف بوکودیدی کی می سختیأنٚ میأن، بأمؤییدی می کومک.

¹⁵ شومأن فیلیپی آدمأن خُب دأنیدی کی وختی اوّلی وأر اینجیلٚ پیغأمَ شِمِرِه وأگویا بوکودم، و بأزین مقدونیه جَا بأمؤم، فقد شومأ مٚرَه مألی کومک بوکودیدی. هیتأ کیلیسا دِه اَ کأرٚ دورون پیش دنکفته.

¹⁶ حتّا او وخت کی تسالونیکی شهرٚ دورون ایسأ بوم، دو وأر، می ایحتیأجأنٚ رفع بوستن رِه پول اوسِه کودیدی.

¹⁷ البت شیمی پیشکشأنٚ وأسی تشکر کونم، ولی اونچی کی ویشتر مٚرَه خوشأل کونِه اَنه کی شیمی اَ خوروم کأرأنٚ وأسی، خوروم پأدأش فأگیریدی.

¹⁸ هسأ، همه‌چی دأرم کی حتّا جٚه می نیأز ویشتره؛ و پیشکشأنی کی «اپافرودیتوسٚ» دٚسٚ جَا اوسه کودیدی میأن غولطه خوردأندٚرم، او پیشکشأنی کی خوشبو قوربأنی مأنستَن، خودایَ رأضی کونه.

¹⁹ خودایٚم عیسا مسیح فدأکأری وأسی، شیمی تومأمٚ ایحتیأجأنَ خو پورجلال ثروٚتٚ اَمرأ جٚه بین بٚره.

²⁰ جٚه هسأ تأ اَبد، اَمی پئر خودایَ جلال بٚبه، آمین.

پولسٚ آخری سلأمأن

²¹ تومأمٚ ایمأندأرأنی‌یَ کی در عیسا مسیح ایسأیید سلأم برسأنید. او برأرأن کی می اَمرأیٚده، سلأم رٚسأنده.

²² اَیَه تومأمٚ ایمأندأرأن، بوخصوص او ایمأندأرأن کی قیصرٚ قصرٚ جَایٚده، سلأم رٚسأنده.

²³ خوداوندْ عیسا مسیحٚ، فیض، شیمی روحٚ اَمرأ بٚبه.