Thimo 9 - Kĩrĩkanĩro Gĩa Gĩkũyũ

Ũũgĩ na Ũrimũ

¹ Ũũgĩ nĩeyakĩire nyũmba, na akeyacũhĩria itugĩ mũgwanja.

² Nĩathĩnjĩĩte ndũrũme ciake cia gĩceegũ; ndibei yake nĩhaarĩrie wega, o na meetha nĩarĩĩte.

³ Nĩarekeetie airĩĩtu arĩa mamũtungataga mageetane marũngiĩ tũthũngũriinĩ twa itũũra.

⁴ Moige atĩrĩ, “Irimũ ciothe nĩitoonye na gũũkũ!” Arĩa matarĩ oogĩ arameera atĩrĩ,

⁵ “Ũkaai mũrĩe irio ciakwa na mũnyue ndibei ĩrĩa haarĩirie.

⁶ Tiganaai na ũrimũ nĩguo mũtũũre, thiagaai na mĩthiĩre ya ũtaũku.”

⁷ Ũrĩa ũkaanagia mũndũ wa kĩnyũrũri nĩ gĩconoko egĩagĩra nakĩo. Na ũrĩa ũkaanagia mũndũ mwaganu nĩkwĩyũnũha eyũnũhaga.

⁸ Ndũkaanakaanie mũndũ wa kĩnyũrũri tondũ no agũthũũre. No ũngĩkaania mũndũ mũũgĩ, ũcio no akwende.

⁹ Ũngĩtaara mũndũ mũũgĩ nĩohĩgaga makĩria; ũngĩruta mũndũ mũthingu ũndũ nĩongagĩrĩra ũmenyo.

¹⁰ Gũtĩĩa MWATHANI nĩkuo kĩhumo kĩa ũũgĩ, na ũngĩmenya Ũrĩa Ũmwe Mũtheru nĩwegĩĩra na ũmenyo.

¹¹ Ũũgĩ nĩkuongerera wongagĩrĩra matukũ maaku, o na ũkoongerera ũtũũro waku mĩaka ĩngĩ mĩingĩ.

¹² Angĩkorwo wĩ mũũgĩ-rĩ, ũũgĩ ũcio nĩ ũteithio waku wiki; angĩkorwo wĩ wa kĩnyũrũri ndũrĩ ũteithio ũngĩona.

¹³ Mũtumia mũkĩĩgu nĩ wa inegene; nĩ mwaganu o na ndarĩ thoni.

¹⁴ Nĩgũikara aikaraga o hau mũrangoinĩ wa nyũmba yake, o na ahota gũikara itũũra gatagatĩ,

¹⁵ agagĩĩtaga arĩa mekũhĩtũka, o arĩa megwĩthiĩra mabatainĩ maao.

¹⁶ Akameera atĩrĩ, “Andũ arĩa oothe irimũ nĩmatoonye gũũkũ!” Na akeera arĩa matarĩ oogĩ atĩrĩ,

¹⁷ “Maaĩ ma kũiya me mũrĩo, na irio cia kũrĩĩra hithoinĩ o nacio i mũrĩo!”

¹⁸ No matimenyaga atĩ, arĩa oothe matoonyaga gwake matiumaga kuo, na matiũĩ atĩ arĩa maanatoonya kuo marĩ o kwa arĩa a akuũ.