فیلیپیان 4 - کتاب مقدس به زبان گیلکی - گویش رشت و غرب گیلان

¹ پس، می براران کی شمرأ دوست دَرَم و مشتاقم شمرأ بيدينم، ای كی شُمان می شادی و می تاج سَريد، ای عزيزان، اَطویی خُداوند درون قائِم بأسید.

پند، تشویق و دعا

² اِفُوديه جا خواهش کونَم و سینتیخی جا خواهش كونم كی خُداوندِ درون هَم‌ رأی بيبيد.

³ بله، وفادار همکار، تی جائَم خوائَم كی اَ دوتا بانویَ كمك بُكونی. اوشان کی می امرا شانه به شانه انجیلِ کار درون اَکْلیمِنتُس و الباقی می همکاران کی اوشانِ نام دفتر حیاتِ درون بینیویشته بُبوسته، زحمت بکشه اید.

⁴ هميشک خُداوند درون شاد بيبيد؛ بازم گَم: شاد بيبيد.

⁵ وَئلید همتان بیدینید شُمان آدمانی ایسید با ملاحظه. خُداوند نزديكه؛

⁶ هيچی ره نيگران نيبيد، بلكی هرچی درون دُعا و تمنا مَرا، شُكر کودَن مَرا، شیمی خواسته ئانَ خُدایَ بیگید.

⁷ خُدا صلح و سلامتی، كی هر فهم جا بجورتره، شیمی ديلان و فکرانَ مسيحْ عيسی درون محافظت خوائه کودَن.

⁸ آخر بسر، ای براران، هر اونچی كی راستِ، هر اونچی كی حرمت دَره و هر اونچی كی دُرُستِ، هر اونچی كی پاكِ، هر اونچی كی دوست داشتَنیه و هر اونچی كی پرستشِ ره قابیله، اَگه عالیه، اگر پرستشِ ارزشَ دَره، اَشانِ باره فكر بُكونيد.

⁹ اونچی کی می جا باموختیدی و بدَس باوردید، بيشتاوَستید و می درون بيده‌ئيد، اَشانَ انجام بديد، و خُدا صُلح و سلامتی شیمی اَمرا خوائه ایسان.

خُدا تدارُک دِئن

¹⁰ خُداوند درون خَيلی خوشحالم كی هسّا ايوارده می واسی نیگران بُبوستید. راس راسی شُمان می فكر بید، ولی فرصت ناشتيد.

¹¹ اَنه، احتیاجِ واسی نگم، چونکی باموختم كی هر وضع درون قانع ببم.

¹² من، هَم دَنَم محتاج بوستَن چُطویه، و هَم دَنَم، فراوانی نعمت درون زیندگی کودَن چطویه. هر وضع و حال درون، زیندگی رازَ، سیری و ویشتایی و احتیاج و محتاجیَ ياد بيگيفتم.

¹³ من هر کاریَ تانَم بُکونَم، بواسطه ی اونکی مَره قوت دِئه.

¹⁴ با اَ حال، لوطف بُكوديد كی می زحمتانِ درون شريک بُبوستید.

¹⁵ شُمانَم ای فيليپيان، خُب دَنيدی كی، بعد اونكی مُقدونيه‌یَ ترکَ كودم، هی كليسايی جغیر شُمان، انجيلِ کارِ بنا ره، دخل و خرج درون می امرا شريک نُبوست.

¹⁶ حتی اُ زمات كی تِسالونيكی شار درون بوم، شُمان می احتياجات ره کمک اوسه کودید و بازم اوسه كوديد.

¹⁷ نه اَنكی پیشکش دُمبال ببم، بلكی ایتا ثمر دمبال ايسم كی شیمی اعتبارَ خُدا ورجه زیاد کونه.

¹⁸ شیمی کمک ئان، کامل می دَس فارسه و می احتیاج جا ویشتر دَرم. حالا كی شیمی كمکَ بواسطه ی اِپافرودیتوس کی مرا روانه کودید، فیگيفتم، حیسابی تأمین ایسَم، شیمی پیشکش، خوشبو عطر و قابیل قُبیل قربانی ايسه كی خُدایَ راضی كونه.

¹⁹ و می خُدا، تمان شیمی احتیاجاتَ طبق خو پُر جلال دولت، مسيحْ عيسی درون بر طرف کونه.

²⁰ خُدا و اَمی آسمانی پئرَ، تا همیشک و تا ابد جلال ببه. آمين.

آخرتا سلام ئان

²¹ تمان مُقدّسینَ مسيحْ عيسی درون سلام فاراسانید. برارانی كی می اَمرا ايسائید، شمرأ سلام فاراسانیدی.

²² تمانِ مُقدّسین اَیا شمرأ سلام فاراسانیدی، بخصوص اوشانی كی قيصر خانه اهل شینید.

²³ خُداوندْ عيسی مسيحِ فيض شیمی روح اَمرا بِبه.آمين.