فیلیپیان 2 - کتاب مقدس به زبان گیلکی - گویش رشت و غرب گیلان

مسيحِ فروتنی جا سرمشق گیفتن

¹ پس اَگه مسيحِ درون ديلگرمی دَرید، اَگه اونِ محبت شیمی تسلی باعث به، اَگه خُدا روحِ درون رفاقت دَریدی، اَگه مهربانی و دیلسوجی نَئه،

² هم رأی بودن امرا، هه محبت امرا، یکدیلی و هم نظر بوستن امرا می شادیَ کاملَ کونید.

³ هی كاریَ مَنم مَنم و چشم و هم چشمی جا نُكونيد، بلكی فروتنی اَمرا ديگرانَ شیمی جا بختر بدانيد.

⁴ هیتا جه شُمان فقط خو منفعتِ فکر نَبه، بلکی بقیه ئانِ فکرم بِبه.

⁵ هو فكرانیَ بداريد كی مسيحْ عيسی داشتی:

⁶ اونكی، هرچن خُدا اَمرا هم شکل بو، خُدا امرا برابریَ دو دَسی نچسبسته،

⁷ بلكی خودشَ خالی بُكود، نوکرِ شکلَ به خودَش بیگیفت، آدمانِ مانستن بُبوست.

⁸ و چونکی آدمانِ شکل مانستن بُبوست، خورَه فروتن بُكود و مَردن ره، حتی صليب سر مَردَن ره فرمانبر بُبوست.

⁹ پس خُدا اونَ خَیلی بُجور بَبرد و ایتا نام بجورتر جه تمان نام ئان اونَ ببخشه،

¹⁰ تا عیسی نامِ اَمرا هر زانویی خمَ به آسمان درون، زمين سر و زمينِ جیر،

¹¹ و هر زوانی اقرار بُكونه كی عيسی مسيحْ ’خُداوندِ‘ خُدای پئرِ جلال واسی.

نور دُنیا درون

¹² پس ای عزيزان، هُطویی كی هميشک فرمانبر بید، هسّا، نه فقط می جُلو، بلكی خَیلی ويشتر، می نَبودِ درون، خودتانِ نجات ره بایستی ترس و لرز اَمرا عمل بُکونید،

¹³ چون خُدایِ كی شیمی درون خو خشنودی واسی کار کودَن دَره، هم اراده درون و هم عمل درون.

¹⁴ هر كاریَ بی غُرغُر و توکه بِرا انجام بديد،

¹⁵ تا بی عیب و ساده دیل و خُدا بی عیب زاكان بيبيد، خطاکار و گُمراهِ نسل درون کی شیمی نور اوشان ميان ستارئان مانستن اَ دُنیا درون فتاوِه،

¹⁶ زیندگی كلامَ قائم بدارید، تا مسيحِ وَگردستنِ روجِ درون افتخار بُكونم كی هچین نُدوَستم و هچین زحمت نکشِئم.

¹⁷ حتی اَگه لازم بِبه می خون ايتا پیشکشِ مانستن شیمی ایمان قربانی ره فُکوده بِبه، خوشحالم و شُمان همتان اَمرا ذوق كونم.

¹⁸ و شُمانم بایستی هُطو خوشحال بيبيد و می مَرا ذوق بُكونيد.

تيموتائوس و اِپافْرودیتوس

¹⁹ خُداوندْ عیسی درون اُميد دَرم كی تيموتائوسَ خَیلی زو شیمی ورجه اوسه كونم تا شیمی حالِ جا واخبر بَبم و می ديل شاد بِبه.

²⁰ چونکی دِه هیکسَ نارَم كی حئیقتن شیمی راحتی فكر بِبه.

²¹ اوشان همتان، خوشانِ منفعت دُمبالید، نه عيسی مسيح.

²² ولی شُمان دانيدی كی تيموتائوس خو امتحانَ پس بدَه، کی چطو می اَمرا، ایتا پسر مانستن خو پئر مَرا، انجيل كار درون خدمت بُكوده.

²³ پس اُميد دَرم هَطوكی می تكليف روشنَ بوسته، اونَ، شیمی ورجه اوسه كونم؛

²⁴ و خُداوندِ درون اطمينان دَرم كی منم خَیلی زو خوائم اَمون.

²⁵ من لازم بدانستم اِپافْرودیتوسَ شیمی ورجه اوسه کونَم، اونَ کی جه ايطرف برار و همكار و می همرزمه و جه اُ طرف، کسی ایسه کی شُمان اونَ می احتیاجاتِ برطرف کودن ره اوسه بُکوده بید.

²⁶ چونکی اون، شیمی همتانِ دِئن ره مشتاق بو و اَنه واسی كی بشتاوسته بید ناخوش بُبوسته، پریشانِ.

²⁷ راس راسی كی ناخوش بو و مردَن دوبو. ولی خُدا اونَ رحم بُكود، و نه فقط اونَ، بلکی مَرَم رحم بُکود، تا نَبه ایتا غُصه به می غُصه ئان اضافه به.

²⁸ پس من اونِ اوسه كودن ره ویشتر ذوق دارم، تا ايوار دِه اونِ دِئن اَمرا خوشحالَ بيد و می غصه ئم كمَ به.

²⁹ پس خُداوندِ درون تمانِ خوشحالی مَرا اونَ قُبیل بُكونيد و اَجور آدمانِ حرمتَ بدارید،

³⁰ چونکی اون، مسيحِ کار واسی مردَن دبو و خو جانَ به خطر تَوَده تا شیمی خدمتِ کم و کاستی به من جبران بِبه.