فیلیپیان 1 - کتاب مقدس به زبان گیلکی - گویش رشت و غرب گیلان

¹ پولُس و تيموتائوس جا، مسیحْ عیسی نوکران، تمان مُقدسین ره مسیحْ عیسی درون کی فيليپی شار میان ایسائید، ناظران و شَماسان:

² فيض و صلح و سلامتی خُدا طرف جا اَمی پئر، و خُداوند عيسی مسيح، شمرأ بایه.

دُعا و شُكر کودَن

³ هر وقت کی شمرأ به ياد اَورم، می خُدایَ شُكر كونم،

⁴ تمانِ می دُعائانِ درون هميشک، شُمان همتانِ ره ذوق مَره دُعا كونم،

⁵ اُ همکاری واسی کی مسیحِ انجیلِ کارِ درون جه اولتّا روج تا هسّا دَریدی.

⁶ و من حَتم دَرم اونكی شیمی درون خُبِ کارَ شروع بُكوده، اونَ تا عیسی مسيحِ واگردَستن روج به آخر خوائه فارسانن.

⁷ من اَ حقَّ دَرم كی شیمی همتانِ باره اَجور حسی بدَرَم، چره کی می دیل درون جا دَریدی، چونکی شُمان همتان می مرا خُدا فیض درون شریکید، هم می زندان دَکَفتنِ درون، و هم دفاع کودن انجيل جا و اونِ حئیقتِ ثابت کودن.

⁸ چونکی خُدا می گُواهِ كی چطور اُ احساساتِ امرا کی مسیحْ عیسی جا سرچشمه گیره، شُمان همتانِ ره مشتاقم.

⁹ می دُعا اَنه كی شیمی محبت ويشتر و ویشتر بِبه، دانایی و فهمِ کامل اَمرا بِبه،

¹⁰ تا بتانيد اوچی کی بخترین ایسه یَ قُبیل بُکونید و مسیحِ روج درون، پاك و بی عيب بیبید،

¹¹ صالحی ثمره جا پُر بیبید كی بواسطه ی عيسی مسيح بار آوره و به خُدا جلال و ستایش کودن فارسه.

انجيل ترقی

¹² ای براران، خوائم بدانيد اونچی كی می سر بامو، در اصل انجيل ترقی باعث بُبوست،

¹³ اُجور كی تمانِ سلطنتی كاخِ نگهبانان و همه کَس ره آشكار بُبوست كی من مسيح واسی زندان درونَم.

¹⁴ و می زندان دَکفتن باعث بُبوست كی ويشترِ براران، خُداوند درون اشانِ دیل قوی تر ببِه، تا تمان جرأت اَمرا بدون ترس خُدا کلامَ بیگید.

¹⁵ بعضی ئان حسودی و چشم و هم چشمی واسی مسيح‌َ موعظه كونيدی، ولی بعضی ئان خُبِ نیت اَمرا.

¹⁶ اَ دومتّا دسته محبتِ جا اَطو كونيدی، چون دانيدی كی من انجيلِ دفاع كودنِ واسی اَیا ایسام.

¹⁷ ولی اُ اولتّا دَسته چشم و هم چشمی واسی مسيحَ موعظه كونيدی، نه خُبِ نیت اَمرا، چون خیال کونیدی کی اَ کار مرا زندان درون مَره عذاب دیئیدی.

¹⁸ پس چی؟ مهم اَنه كی هر جور ایسه، مسيح اعلام بِبه، چی دُرُست نيّت امرا بِبه چی نادُرُست نیّت امرا! اَنه ره من شادی کنم، بله و شادی خوائم کودَن.

¹⁹ چون دانم كی شیمی دُعائان و عيسی مسیحِ روحِ یاری اَمرا، اَن به می آزاد بوستن ختم به،

²⁰ هُطوكی اشتیاق امرا رافا ایسام و اُميد دَرم كی هیچیِ درون شرمنده نخوائم بوستن، بلكی جرأتِ کامل مرا، الانم هميشک مانستن، چی مرگ و چی زیندگی درون، مسيح می تن درون جلال خوائه گیفتن.

²¹ چونکی زیندگی، مِره مسيحِ، و مَردن مِره سود.

²² اَگه قَراره می زیندگیَ اَ تنِ درون ادامه بدَم، اَن مِره ایتا کاری ایسه، پُر ثمر. با اَ حال ناتَنَم بگَم كویتای انتخاب كونَم!

²³ اَ دوتا ميان من سخت جَنگستن درم. چره کی ناجی دَرم اَ دُنیا جا بَشم و مسيح اَمرا بَبم، چونكی اَن خَیلی بختره.

²⁴ ولی می ایسان جسم درون شمرأ واجبتر.

²⁵ چونکی اَنه جا مطمئنَم، دانم كی شیمی تَرَقی و ذوقِ واسی ايمان درون، زنده مانم و شیمی همتان اَمرا ادامه دَئَم،

²⁶ تا وقتی کی ایوارده شیمی ورجه بایَم و شیمی فخر مسيحْ عيسی درون می خاطری ویشتر و ویشتر بِبه.

²⁷ فقط وَئلید شیمی طَرز زیندگی، مسيح انجيلِ لایق بِبه، اُجورکی چی بايم و شمرأ بيدينم و چی نایَم، شیمی جا بیشتاوم کی ايتا روح درون پا برجا ایسید و یک فکر، دوش به دوش هم انجيلِ ايمانِ واسی تقلّا كونيدی،

²⁸ و هیچی درون اوشانِ جا کی شیمی ضد ایسید تَرس نَدارید. اَن اوشان ره ایتا آشکار نشانه هلاكتِ ره ایسه، ولی شمرأ نجاتِ نیشانه، و اَن خُدا جا ایسه.

²⁹ چونکی اَ افتخار شیمی قسمت بُبوسته كی نه فقط مسيح‌َ ايمان باوريد بلکی اونِ واسی رنج هم بکشید.

³⁰ شمرأ ئَم هو جنگی نَئه كی مَرا اونِ درون بیده اید و هسّا ايشتاوید کی هنوزم اونِ امرا سر و کله زِئندرم.