ፍልጵስዩሳ INTRO1 - ጌሻ ማፃፋጋ ቆፋ ጳዉሎስ ፍልጵስዩሳ አሳስ ፃፍዳ ኪታይ ፃፈትዳይ፥ ሮመ ካዎተን፥ ማቀዶነ ቢታን፥ ፍልጵስዩሳ ካታማን ደእያ ዎሳ ኬሳ። ሀ ኪታይ ፃፈትዳይ፥ ጳዉሎስ ቃሾ ኬን ደእያ ዎደ ሀራ አማንያ ኦሳንቾት እያ እፅዳ ዎደነ ፍልጵስዩሳ ዎሳ ኬን ደንድዳ ዎርዶ ትምርትያ ጋሶን እያ ዎዛናይ ዳሮ አዛንዳ ዎደ (1:21፤ 2:17፤ 3:10)። ግዶሽን፥ ጳዉሎስ የሱስ ክርስቶሳ ምንድ አማንያ ግሾ ሀ ኪታን ቆንጭድ በንተይ፥ ኡፋይስነ ኩመ አማነተ። ፍልጵስዩሳን ደእያ ዳሮ አሳይ ሮመፐ ድኤትድ ይዳ አስ። ኤንቲ ሮመ ቢታስ ምሸቶሶናነ ቢታ ሎይድ ናጎሶና። ኤንታፈ እሶት እሶት የሱሳ አማንዳ ግሾ፥ ባንታ ቢታ አሳን ጎደትዶሶና። ሄ ጎዳይ ኤንታ ቦላ መቶነ ማንቆተ ኤህስ (ሀዋ 16:20-21)። ጳዉሎስ ሀ ኪታ ፃፍዳ ጋሶይ እያ መቱዋ ዎደ እያ ማዳናዉ አማንያ አሳይ እሞታ እያዉ የድዳ ግሾነ እያዉ ዎስዳ ግሾ፥ ኤንታ ጋላታናሳ። እያ ቦላነ ኤንታ ቦላ ዱማ ዱማ መቶይ ጋክዳባ ግድኮካ ኤንቲ ምነታና መላነ ኩመ አማነትድ ዳና መላ ኤንታ ምንስ። ጬቆነ ኦቶሮ አግድ፥ የሱስ ክርስቶሳ አሽከተን ኩማና መላ ምንድ ኤንታ አኬክሴስ። ኤንቲ የሱስ ክርስቶሳን ግድድ ደምዳ ደኦይ ፆሳ አ ኬሀተፈ ፑልትዳባነ አማኖን ኤክዳባፐ አትሽን አይሁደታ ዎጋ ናግድ ኤክዳባ ግዶናይሳ ኤንታ አኬክሴስ። የሱስ ክርስቶሳን ደእያ ኡባስ ፆሳይ እምያ ሳሩዋነ ኡፋይሳ ኤንታዉ ፃፌስ። ሀ ኪታይ ኡፋይስ፥ አማነተ፥ እስፈተነ አማኖን ምንድ ዱሱ ቆንጭስድ በሴስ። ዉርሰን ጳዉሎስ ፆሳ አማንያ አሳይ ሲቆን ዳና መላነ ክርስቶሳ ቆፋ ዳና መላ ኤንታ ዞሬስ (2:2፤ 4:2-3)። ማፃፋ አይፈ ቆፋታ ገሎ ቆፋ (1:1-11) ጳዉሎስ ሀንድ ደእያ ደኡዋ (1:12-30) አሽከተ ዱሳ ሌምሶ (2:1-18) ፅሞትዮሳስነ ኤጳፍራድቱሳ (2:19-30) ሞርከታፐነ ኢታታፐ ናገተ (3:1—4:9) ጳዉሎስ ፍልጵስዩሳ አሳ ጋላቴስ (4:10-20) ሳሮነ አንጆ (4:21-23) |
The Word for the World International and The Word for the World Ethiopia