ፍልጵስዩሳ 3 - ጌሻ ማፃፋ

ቱማ ፅሎተ

¹ ዉርሰን፥ ታ እሻቶ፥ ህንተ ጎዳባ ግድያ ግሾ፥ ኡፋይትተ። ታኒ ካሰ ፃፍዳይሳ ዛራዳ ፃፋናይስ ታና ዋይሰና፥ ሽን ህንተና ባላፐ ናጋና።

² ኢታባ ኦያ ካናታፐ፥ ቃስ ቃፃረታናዉ ኮሼስ ግያ ኢታ አሳታፐ ናገትተ።

³ ኑኒ ፆሳ ጌሻ አያናን ጎይንያ ግሾነ ኑ ደኡዋን ክርስቶስ የሱሳን ጬቀትያ ግሾ፥ ቱማ ቃፃሮ ቃፃረትዳይሳታ። ኑኒ ካረ አሳተ ቦላ ኦሰትያባን ጬቀቶኮ።

⁴ ታ ካረ አሳተን ጬቀታናዉ ኮሽኮ ታ ዳሮባን ጬቀታናዉ ዳንዳአይስ። አይ አስካ ባ ካረ አሳተን ጬቀትያባይ ባዉ ደኤስ ግድ ቆፕኮ፥ ታኒ እያፐ ዳሮ አዳ ጬቀትያባይ ደኤስ።

⁵ ታኒ የለትዳ ሳምንታራ ቃፃረታስ። ታኒ የለታን እስራኤለ፤ ታኒ ብንያመ ኮቸ፤ ታኒ ዋላክ ባይና አይሁደ አሰ። አይሁደ ህገ ናጎን ግድኮ ታኒ ፋርሳወ።

⁶ አይሁደ አማኑዋስ ምሸተን ግድኮ ታኒ ዎሳ ኬ የደስ። እስ አስ ህገ ናግድ ፅልያባ ግድኮ፥ ታናን ቦረይ በንትቤና።

⁷ ሽን ካሰ ታና ማዴስ ጋዳ ቆፕዳባ ኡባ፥ ክርስቶሳ ግሾ ጋዳ ማዶናባ ኦዳ ታይባስ።

⁸ ሄሳ ፃላላ ግዶናሽን፥ ታኒ ታ ጎዳ ክርስቶስ የሱሳ ኤረይስ ሀራባ ኡባፈ ዳሮ አያ ግሾ፥ ሄ ኡባ ዎይ ባይናባዳ ታይባስ። ታኒ እያ ግሾ ኡባባ ያስ። ክርስቶሳ ደማናዉ ኡባባ ዎራ ሆለትዳ ቡረዳ ታይባይስ። ታኒ የሱሳራ እስኖ ግዳስ።

⁹ ታኒ ህገስ ኪተታዳ ደምያ ታ ሁጰ ፅሎተ ታዉ ባዋ። ክርስቶሳ አማንን በንትያ ፅሎተይ፥ ፆሳ ማታፐ ያ ፅሎተይ ሀእ ታዉ ደኤስ።

¹⁰ ታኒ ክርስቶሳነ እያ ደንዶ ዎልቃ ኤራናዉ ኮያይስ። ታኒ እያ መቱዋ እያራ ሻከታናዉነ እያ ሀይቁዋን እያ ዳናናዉ አሞታይስ።

¹¹ ሄሳዳካ፥ ሀይቆፐ ደንዳዳ መርናዉ ደኦን ዳናይሳ ኡፋይስ ኦይስ።

ጋፃ ጋካናዉ ዎፅተ

¹² ታኒ ሀእ ጋፃ ጋካስ ዎይኮ ታናን ባል ባዋ ጊከ። ሽን ክርስቶስ የሱሲ ታና ኦይክዳ ግሾ ታኒ ታ ስንን ደእያ ዎይቱዋ ኦይካናዉ ዎፃይስነ ቡተታይስ።

¹³ ታ እሻቶ፥ ታኒ ሄሳ ደማስ ጋዳ ቆፕከ፥ ሽን ታኒ እስባ ኦይስ። ታፐ ጉየራ ደኤይሳ ዶጋዳ ስንን ደኤይሳ ኦይካናዉ ዛቱራይስ።

¹⁴ ሄሳ ግሾ፥ ታኒ ጋፃ ጋካናዉ ዎፃይስ። ፆሳይ ክርስቶስ የሱሳ ባጋራ ሳሎ ደኡዋስ ፄግዳ ዎይቱዋ ኤካናዉ ዳቡራይስ።

¹⁵ ህዛ፥ ኑኒ አያናን ጋሽትዳ ኡባይ ሄሳ ቆፓናዉ በሴስ። ህንተፈ ባጋታስ ዱማትያ ቆፍ ደእኮ፥ ሄሳካ ፆሳይ ህንተዉ ቆንጭሳና።

¹⁶ ግድኮካ፥ ኑኒ ሀኖ ጋካናዉ ደእዳ ደኡዋን፥ አነ ስን ቦስ።

¹⁷ ታ እሻቶ፥ ታና ዳንተ፤ ሄሳዳካ፥ ኑ ሌምሱዋ ካልያ አሳታ አኬክድ በእተ።

¹⁸ ታኒ ሄሳ ህንተዉ ካሰ ዳሮ ቶሆ ኦዳስ፥ ሽን ሀእካ ዛራዳ አፉን ኦዳይስ። ክርስቶሳ ማስቃልያስ ባንታና ሞርከ ኦዳ ዳሮ አሳት ደኦሶና።

¹⁹ ኤንታ ዉርሰይ ዮ፤ ኤንታ ኡሎይ ኤንታዉ ፆሰ። ዬላታናዉ በሲያባን ኤንቲ ጬቀቶሶና፤ ቃስ ሀ ሳአባ ፃላላ ቆፖሶና።

²⁰ ኑ ቢታይ ሳሉዋና። ሳሎፐ ይድ ኑና አሽያ ጎዳ የሱስ ክርስቶሳ ናጎስ።

²¹ ክርስቶስ ኡባባ ባ ማታፐ ጋርሳን ኦናዉ ዳንዳእያ ባ ዎልቃን ኑ ዳቡራንቾ አሳተ ላምድ ባ ቦንቾ አሳተ ዳንሳና።