फिलिप्पी 2 - Garhwali

यीशु मा एक ह्‍वेके रौण

¹ हे मेरा भै-बैंणो, मि जणदु छौं कि तुम यीशु मसीह पर बिस्वास करद्‍यां, अर वेका द्‍वारा तुमतै प्यार, हौसला अर दिलासा मिलदी। अर वेन तुमरा मनों तैं पवित्र आत्मा का द्‍वारा एक कैरियाली, अर वेन ही तुम पर अपणी किरपा अर दया दिखै।

² इलै मि भि इन चान्दु कि तुम एक-दुसरा से और भि जादा प्यार करा। अर एक मन ह्‍वेके रा, अर इन सोच रखा कि तुम सभ्या का सभि एक जन ही छाँ, अर अगर जु तुम इन करिल्या त यां से मितैं बड़ु आनन्द मिललु।

³ अर याद रखा, कि यू सब तुम अपणा फैदा अर झूठ्‍ठी बडै खुणि नि कैरा, मगर नमर बणि के एक-दुसरा तैं अफ से जादा खूब समझा।

⁴ अर तुम मा बटि कुई भि अपणी ही भलै खुणि ना, बल्किन मा दुसरो की भलै का बारा मा भि सोचा।

यीशु की महानता

⁵ हे मेरा दगड़्यों, जन मसीह यीशु को सभौ छौ, ठिक उन्‍नि तुमरो भि हो।

⁶ किलैकि परमेस्वर का बराबर होण पर भि वेन वे पद की धौंस नि जमै,

⁷ बल्किन मा सब कुछ छोड़ि के एक मनखि बणि गै, इख तक की एक गुलाम का बराबर ह्‍वे गै।

⁸ अर वु मनखि का रुप मा हमरा बीच मा रै अर वेन खुद तैं नमर बणै दिनी, अर वु इथगा आज्ञा को पालन करण वळु छौ, कि वेन क्रूस की मौत तैं भि स्वीकार कैर दिनी।

⁹ इलै परमेस्वर न वेतैं सबसे ऊँचो पद दिनी, अर वेतैं वु नौ दिनी जु सब न्वौं मा सबसे महान च।

¹⁰ ताकि जथगा भि लोग ईं धरती पर छिन या जु लोग अधलोक मा छिन, या जु स्वर्ग मा छिन वु सब लोग यीशु का नौ से घुंडा टेका।

¹¹ अर पिता परमेस्वर की बडै करणु खुणि हरेक जीब स्वीकार कैरो, कि यीशु मसीह ही प्रभु च।

उज्याळा का जन चाल-चलन

¹² इलै हे मेरा प्यारा भै-बैंणो, मि जणदु छौं कि जब मि तुमरा दगड़ा छौ त तुम हमेसा से आज्ञा को पालन करदी औणा छाँ। अर अब जब मि तुम से दूर छौं, इलै अब या बात और भि जादा ध्यान रखण वळी ह्‍वे जान्दी कि तुम ऊं सब बातों को पालन और भि जादा कैरा, जु कि बिस्वासी लोगु खुणि सही छिन जैतैं पिता परमेस्वर न बचैयालि।

¹³ किलैकि परमेस्वर ही च जु कि अपणी मनसा का मुताबिक तुमरा जीवनों मा काम कनु च, अर उ ही च जु की इन इच्छा पैदा करदु कि तुम वेका मुताबिक चलि सैका।

¹⁴ अर जथगा भि काम तुम कना छाँ वु सब बिना सिकैत कियां, अर बिना वाद-विवाद कियां कैरा,

¹⁵ ताकि तुम हर बात मा निरदोष अर पवित्र बणि सैका, अर परमेस्वर की एक सच्‍चि औलाद का जन ह्‍वे जा, किलैकि तुम भ्रष्‍ट अर पापि लोगु का बीच मा रौन्द्‍यां, इलै तुमरो जीवन ऊंका बीच मा चमकणु रौ जन कि आसमान मा गैंणा चमकदिन।

¹⁶ अर जीवन का वचन तैं अपणा जीवनों मा मजबूती से बणै के रखा, ताकि यीशु मसीह का वापस औण का दिन पर ईं बात पर मि बड़ु मोन कैरी सैकु। अर वे दिन मि समझि जौलु कि मेरी भाग-दौड़ अर मेरा द्‍वारा करीं मेनत बेकार नि गै।

¹⁷ अर प्रभु मा तुमरा बिस्वास अर तुमरा द्‍वारा किये जाण वळी सेवा, परमेस्वर खुणि अरपण मा चड़ईं भेंट का जन च, अर अगर जु मितैं अपणु बलिदान या अपणु खून एक खास तेल की तरौं चड़ौण पोड़लु, त तभि भि मि खुश छौं अर मि ईं खुशी को साझा तुमरा दगड़ा मा भि करदु।

¹⁸ मि तुम बटि बिन्ती करदु, कि तुम भि इन्‍नि खुशी मणा, अर मेरा आनन्द मा सामिल ह्‍वे जा।

तीमुथियुस अर इपफ्रुदीतुस

¹⁹ हे मेरा भै-बैंणो मितैं प्रभु यीशु मसीह पर आस च कि मि भौत जल्द तीमुथियुस भै तैं तुमरा पास भेजलु, ताकि तुमरा बारा मा समाचार सुणी के मेरु हौसला और भि जादा बढ़ो।

²⁰ किलैकि मेरा पास तीमुथियुस का जन और कुई भि मनखि नि च जु कि सच्‍चा दिल से तुमरा बारा मा चिन्ता-फिकर करदु हो।

²¹ किलैकि सब लोग अपणा ही फैदा की खोज मा लग्यां छिन, ना कि ईं बात की खोज मा की यीशु मसीह क्या चान्दु।

²² मगर तीमुथियुस कथगा काबिल च ईं बात का बारा मा तुम भौत अच्छे जणद्‍यां, कि वेन परमेस्वर का शुभ समाचार तैं फैलाण मा ठिक उन्‍नि मदद कैरी जन एक नौनु अपणा पिता की मदद करदु।

²³ इलै मितैं इन उम्मीद च कि जन्‍नि मितैं पता चललु कि मेरा दगड़ा मा क्या जि होण वळु च, तन्‍नि मि तीमुथियुस भै तैं तुमरा पास भेज द्‍यूलु।

²⁴ अर मितैं प्रभु पर पूरु बिस्वास च, कि मि भौत जल्द तुमरा पास आलु।

²⁵ पर फिर भि मितैं यू जरुरी लगदु कि मि तुमरा पास इपफ्रुदीतुस भै तैं वापस भेजूँ, अर उ मसीह मा मेरु एक भै का जन अर सेवा का काम मा मेरा दगड़ा मा एक सिपै का जन काम करण वळु च। अर तुम लोगु न मेरी जरुरतों तैं पूरु करणु खुणि अपणा खास आदिम का रुप मा वेतैं मेरा पास भेजि छौ, ताकि उ मेरी मदद कैरी सैको।

^26-27 अर तुमुन इपफ्रुदीतुस भै का बारा मा सुणी कि वु भौत बिमारि च। हाँ, या बात सच्‍चि च कि उ भौत बिमार ह्‍वे गै छौ, इख तक कि उ मुरण वळु छौ, मगर पिता परमेस्वर न वे पर दया कैरी, बस वे पर ही ना बल्किन मा मि पर भि ताकि मितैं और भि जादा दुख नि झिलण पोड़ो। अर अब इपफ्रुदीतुस भै तुम से मिलणु खुणि भौत बेचेन च अर तरसणु च।

²⁸ अर मि वेतैं तुमरा पास जल्दी भेजण कि कोसिस इलै कनु छौं, ताकि तुम वेसे मिली के आनन्द मणै सैका, अर मेरी चिन्ता-फिकर भि कम ह्‍वे जौ।

²⁹ इलै प्रभु यीशु का प्यार का मुताबिक तुम वेको स्वागत बड़ी खुशी से कर्यां, अर इन्द्रया लोगु को स्वागत बड़ा सम्मान से करण चयेणु।

³⁰ किलैकि यीशु मसीह का काम का खातिर वेन अपणी जान की भि बाजी लगै दिनी इख तक की उ मुरण वळु छौ। अर इपफ्रुदीतुस भै न मि खुणि सेवा को उ काम भि पूरु कैरी जैतैं तुम लोग दूर रै के नि कैरी सकद्‍यां।