फिलिप्पियों 2 - गददीमसीह री दीनता अतै महानता 1 मसीह मन्ज तुन्दी जिन्दगी तुसिओ मजबुत करदी हा अतै तसेरा प्यार तुसिओ तसल्ली दिन्दा हा। तुन्दी संगति पवित्र आत्मा सोगी हा अतै तुसै अक्की दूये पुर दया अतै तरस करदै हिन। 2 ठेरैतांये अऊँ तूसु सोगी बिनती करदा कि मेरी ऐसा खुशी जो पूरी करा कि अक्क मन चित सोगी रेय्आ अतै अक्क ही प्यार, अतै अक्क ही इच्छा रखा। 3 स्वार्थ अतै झूठी प्रशंसा तांई कुछ मत करा पर दीन मनां सितै अक्की दुऐ जो अप्पू थऊँ खरा समझा। 4 हर कोई अपणै ही बारै मन्ज ना पर दुऐ रै बारै मन्ज भी चिन्ता करा। 5 जिन्ना मसीह यीशु रा स्वभाव थू तून्दा स्वभाव भी तिनां ही भोआ। 6 यीशुऐ प्रमात्मैं रै बराबर भूणै रै बावजूद भी प्रमात्मैं रै बराबर भूणै जो अपणै वशा मन्ज रखणै री चिज ना समझू। 7 बल्कि अपणै ईश्वरीय अधिकारा जो छड़ी दिता अतै अक्क दासा सांईयै मणु बणी गो। 8 अतै मणु रै रूपा मन्ज पैदा भुच्ची करी अपणै आपा जो दीन करू अतै प्रमात्मैं रा ऐसा हूक्म मनणै बाळा बणु कि सब दुख सेहन्दा-सेहन्दा क्रूस पुर मौती जो गळै लाई लैऊ। 9 ऐत तांई पिता प्रमात्मैं तैसिओ सबी थऊँ उच्चै पद पुर बहालु अतै तैस जो सो नां दिता जैडा कि सबी नां मन्ज महान हा। 10 अतै जैडा कि स्वर्गा मन्ज रैहन्दै हिन या धरती पुर रैहन्दै हिन अतै धरती रै थलै रैहन्दै हिन सो सब यीशु रै नां मन्ज अपणा हैर झुकान। 11 अतै प्रमात्मैं री महिमा तांई हर अक्क मणु अंगीकार करा कि यीशु मसीह ही प्रभु हा। संसारा मन्ज ज्योती सांईयै चमका 12 हे मेरै प्यारे मित्रो जिआं कि तुसै हमेशा प्रमात्मैं रै हूक्मा जो मन्दै आये हिन जैहणै अऊँ तूसु सोगी थू। अबै अऊँ दूर हा ता तियां कम्मा जो डरदै अतै कम्मदै करदै रेय्आ, जैड़ै प्रमात्मैं रा उद्धार पाऊरै मणु तांई सही हिन। 13 क्ओकि प्रमात्मां तून्दै अन्दर कम करू करदा ताकि तुसिओ इच्छा अतै सामर्थ दी सका तियां कम्मा जो करनै तांई जैतै प्रमात्मां खुश भोआ। 14 सब कम बिना कुड़कुड़ अतै बिना विवाद करदै करू करा। 15 ताकि तुसै निर्दोष अतै भोळै-भाळै भुच्ची करी टेढै अतै हठिलै मणु मन्ज प्रमात्मैं री निष्कलंक औलाद बणी रैहन। क्ओकि तुसै जिन्दगी रा बचन लेई करी ऐसा दुनिया रै मणु मन्ज जग-मग करदै अम्बरा रै तारै सांईयै हिन। 16 ताकि मसीह यीशु रै दोबारा ईणै पुर ऐह मेरा घमण्ड़ करनै री व्जहा भोआ कि मेरी दौड़ अतै मेहनत व्यर्थ ना भूई। 17 अगर मिन्जो तून्दै विस्वास री सेवा तांई अपणा खून भी बहाणा पैय्आ ता भी अऊँ खुश हा अतै तूसु सबी सोगी खुशी मन्दा। 18 तियां ही तुहै भी खुश भून अतै मिन्जो सोगी खुशी मना। तीमुथियुस अतै इफ्रदीतुस 19 मिन्जो यीशु मसीह पुर उम्मीद हा, कि मुँ तीमुथियुस जो तूसु बल्लै जरूर भैजणा, ताकि तून्दा हाल चाल हुणी करी मिन्जो शान्ती मुळा। 20 क्ओकि तीमुथियुस रै स्वभाव सांईयै कसी होरी रा स्वभाव निआं कि सो साफ मनां सितै तुन्दी चिन्ता करा। 21 क्ओकि सब अपणै-अपणै स्वार्थ मन्ज रैहन्दै हिन, सो यीशु मसीह रै कमां री चिन्ता ना करदै। 22 पर तुसै तीमुथियुस जो परखी अतै जाणी भी लैऊ हा, कि जिआं पिता पुत्रा सोगी कम करदा तियां ही तिनी असु सोगी सुसमाचार जो फैलाणै री मेहनत करीआ। 23 ता अऊँ उम्मीद करदा, कि जिआं हि मिन्जो पता लगला कि मेरी हालत किनी भूणी हा तियां ही अऊँ तैस जो झट भैजी दिला। 24 अतै मिन्जो प्रभु पर भरोसा कि मुँ भी जैतूणै जल्दी भूच्ची सका तैतूणैं जल्दी चली ईणा। 25 पर मैंई इफ्रदीतुस जो जैडा कि मेरा विस्वासी भाई हा अतै सोगी कम करनै बाळा अतै विस्वास री लड़ाई लड़नै बाळा हा। तैसिओ जैड़ा तून्दा दूत अतै जरूरी गल्ला मन्ज मेरी सेवा टहल करनै बाळा भी हा तूसु बलै भैजणा जरूरी समझू। 26 तसेरा मन तूसु सबी मन्ज लगुरा थू, ठेरैतांये सो तूसु सोगी मिलणै जो व्याकुल रैहन्दा थू क्ओकि तुसै तसेरी बमारी रै बारै मन्ज हुणुरा थू। 27 अतै सो तूणा बमार थू कि मरनै बाळा थू पर प्रमात्मैं तैस जो ठीक करू अतै तैस पुर ही ना बल्कि मिन्जो पुर भी कि मिन्जो दुखा पुर होर दुखा ना भोआ। 28 ऐत तांई मैंई तैस जो भैजणै री होर भी कोशिश करी कि तुसै तैस सितै मुळी करी खुश भून अतै मेरी चिन्ता घट भुच्ची गच्छा। 29 ऐत तांई प्रभु यीशु रै नां सितै तुसै तैस सोगी खुशी सितै मुळै क्ओकि इन्नै-जिन्नै मणु रा आदर-मान करू करै। 30 क्ओकि सो भी यीशु मसीह रै सुसमाचार तांयै अपणै प्राणा जो मुसकल मन्ज फसाई करी मौती रै नेड़ै पुज्जी गछूरा थू, ताकि जैड़ी जैड़ी मदद तूसु थऊँ मेरी सेवा मन्ज दूर रैहणै थऊँ ना भच्छुरी हा, तैसा जो पूरी करा। |
This work is licensed under Creative Commons Attribution-ShareAlike 4.0 License.