2Alabaraɗe Də Mabərkiziti 9 - Bible en Guidar

Məlyaŋgək na Saba tat əzat ula Salomoŋ

¹ Məlyaŋgək na Saba təprəmək alabara na Salomoŋ. Yaŋ təde a Yerusalem, vi kawsla əsən na Salomoŋ dit asənasənaɗe. Tədek dit ɗiy ammbat diyɗa, may dit zlogomeɗ də tursanɗe, təbəz na meleŋge diyɗa may gərmeŋge na sləma aketi. Təde aza Salomoŋ, təpel dəndən aka wən an dəsan a makrat gərakə.

² Salomoŋ azlanək a met əssõhɗe nat pakə, tay təttaka dəmbər məs Salomoŋ dəɓap əzlan sət akan ɓa ɓa.

³ Məlyaŋgək na Saba tulak maɗɗula na Salomoŋ də gəla məs arkə,

⁴ may way nawzəm nani, gəla nawvoŋ net gewleɗ nabani, va ɗiy neŋgil ananda adassoŋ aka wəza, də zəga nawgul neti, məpsənən zəga nawsa də zəga nawgul neti, əpeŋ nan va adawpeŋ addəv gəla na Yawe, əmpəs nat suku.

⁵ Yaŋ təɓsən məlĩ na: «Əpel nəprəm səka dələv naw aka əpel noko gəm aka maɗɗula nokuŋ gesiŋgi mbaraka.

⁶ Nətaf əpel net ɗiy ɓa hã in gap nula də harawa, yaŋ na, mənah suwi wəɗak na kpukpum na maɗɗula nok məs kərbanəŋ ɓa. Kədayək ki wən nəprəm hiwweŋka.

⁷ Zazay yi azet ɗiy noko, zazay yi azet gewleɗ nokiŋki, ndəɗaŋ məs məzəzuweŋ abok pay pak gəm məzəprəmən maɗɗula nokokuŋka.

⁸ Soko sən Yawe Maŋgəlva noko, ndən məs dənan nek də isi vi kawɗiyuk aka mazaŋga na məlĩ nan ka məlĩ də iya Yawe Maŋgəlva noko! Vi Maŋgəlva nok aŋgluwək Israyel dəssangən faɗə, ndəni aɗiyuk məlĩ aketi, vi kaɗɗa təstəs gəm moggoni.»

⁹ Səɓɓan na, məlyaŋgək na Saba təpsənək meleŋge, kilo gabal hoku də səkat sle', tursanɗe diyɗa sawɓa gəm gərmeŋge na sləma. Mulay ɗah tursanɗe zeŋvit məs məlyaŋgək na Saba təpsən Salomoŋ vetis ɓa.

¹⁰ Məɗɗaŋ wəza na Huram gəm en na Salomoŋ, məs dəkiyən meleŋge sə Ofir vet akiyaŋgək wəleŋɗe na Saŋtal gəm gərmeŋge na sləma əmpa'e.

¹¹ Dit wəleŋɗe na saŋtal veti, məlĩ Salomoŋ aɗaman təki nafuŋ naddəv gəla na Yawe, gəm an naddəv gəla na məlyã, may azaɓək gaŋgara gəm gəzləŋtəndəŋ net məyaŋ gəlya. Mulay ɗah zeŋvit zəgeɗ vas aka dələv na Yuda ɓa.

¹² Məlĩ Salomoŋ tam apsətək an mat məlyaŋgək na Saba asan akan pakə, hã day ki an məs təki səni. Məlyaŋgək təmndat aka dələv nat dit gewleɗ nata.

Əpel an mərəh temtem aka arya na Salomoŋ

¹³ Meleŋge dədazzan ərəh məlĩ Salomoŋ ama əzva na, gagdak nan tay gabal kaklaw sula;

¹⁴ mbəksa nzalaka səvet məkkesenən mammba dəlva dit məɗɗaŋ terere na, milyeŋge net mə Arabɗe dit deyeɗe na kivadələv naka dələv baymet awkiyaŋ sənən meleŋge də təbəz net deleɗ sən Salomoŋ.

¹⁵ Məlĩ Salomoŋ azaɓək barayɗe gugriɗ na meleŋge səkat sula, baray metiŋgin taka pak azəmək meleŋge kilo sləre,

¹⁶ gəm əmpa barayɗe meɗmeɗ na meleŋge səkat hoku, baray muzliya taka pak azəmək meleŋge kilo hoku, yaŋ məlĩ atoŋgit addəv gəla na muyã net wəleŋɗe na Liban.

¹⁷ Məlĩ azaɓək mazaŋga na məlĩ metiŋgin də gozlobekne, məkkəɗ zən də meleŋge an saksakə.

¹⁸ Mazaŋga na məlĩ vanəs tay də wəlaŋ maha məs haran sləre, təki nawɗi təl ɗəf pak na meleŋge yi, gəm təki nawɗi van aza təkzləm mazaŋga van dahãdahã; məzaɓi ɓooliɗ sula aka təkzləmən dahãdahã,

¹⁹ gəm ɓooliɗ məzeɓit kəlaw kiyit sula ziwziw adak dahãdahã aka təki nawɗi təl ɗəf sləre. Tay məɗɗa ɗah vas aka va net milyeŋge meɓɓet ɓa.

²⁰ Hiliŋgiɗ nawsa zəga na məlĩ Salomoŋ pak na meleŋgeŋgə, zəgeɗ na magulo naddəv gəla na muyã net wəleŋɗe na Liban pak na meleŋge saksakəŋgə. Zəga məɗɗan na təbəz babar tay va zəga aka pay na Salomoŋ ɓa.

²¹ Məlĩ tay dit bəlayɗe məzəddoŋ a Tarsis dit gewleɗ na Huram. A ma əzva hoku pak, bəlayɗe vet əzzoŋ sə Tarsis də meleŋge, təbəz babara, gozlobekne, bəryeŋge may doloŋgozoyɗe addivti.

²² Məlĩ Salomoŋ adayək kiyit milyeŋge meɓɓet nammba dələv pak dəwəl sən arya gəm maɗɗula.

²³ Milyeŋge naka dələv pak əkayan ula Salomoŋ vi kaprəm maɗɗula məs Maŋgəlva apsən akani.

²⁴ Aza əzva pak, ndəɗaŋ əkiyaŋ naway di pak zəgeɗ napsən va, təbəz babara, meleŋge, lukutɗe, zəgeɗ nawgaya, tursanɗe, pilseŋge may koropilseŋge.

²⁵ Salomoŋ tay dit gazlaŋɗe net pilseŋge gabal poɗo gəm mawteŋɗe net pilseŋge, gəm məpeŋgeŋ pilseŋge gabal kəlaw kiyən sula, yaŋ məlĩ ezi a walaŋgəleɗe net mawteɗ nawgaya gəm azan a Yerusalem.

²⁶ Askak wəlet milyeŋge baymet təŋ səza məlpa metiŋ, hã aka dələv net mə Filistiɗe gəm hã aket meŋge də Eziptə.

²⁷ Məlĩ dəɗɗa təbəz babar anzlər va gərmeŋge a Yerusalem, muguguleɗ na Liban tam, təki pak va korvoŋɗe a Bagərma.

²⁸ Pilseŋge na Salomoŋ vet, səka dələv na Eziptə, gəm səket dəlveŋge meɓɓet adawkisinini.

Əmta na Salomoŋ

²⁹ Madambərgən wəza na Salomoŋ, ətəŋ nan də əbayman, ndəni məverən addəv wəza na məskəleŋ Natan gəm addəv kəleŋ na Ahiya ɗəf na Silo, gəm addəv hənhən na Yedo məs dəwəl sən Yerobo'am, wətən Nebat ɓa sa.

³⁰ Wəzva kaklaw poɗo Salomoŋ azəm məlĩ a Yerusalem, aket ɗiy na Israyel baymeti.

³¹ Salomoŋ amtəka azbetik efiŋgiɗni, məndəkni a walaŋgəla-metiŋ na Davit afəni; Robo'am wətən dəgəm məlĩ a gəlan.