2Alabaraɗe Də Mabərkiziti 3 - Bible en Guidar

Ərka Gəla na Maŋgəlva

¹ Salomoŋ atəŋgək ərka Gəla na Maŋgəlva a Yerusalem, aka mossorgo na Moriya, a təki məs Yawe arban zən aza Davit afəni, a təki məs Davit azaɓan a gəla kelle na Ornan, mə Yebus.

² Yaŋ atəŋ ərkan aka əvoŋ masula'ən na təla masulan addəv əzva nawzəm məlĩ nan mapoɗo'o.

³ Gabba gəla van yaŋka Salomoŋ aɗi narka Gəla na Maŋgəlva: zezek nan na, metir kaklaw hoku, slosloprok nan tam metir kəlaw.

⁴ Zezek na gəla nawtoŋ a daŋgla van tay metər kəlaw məstaka də slosloprok na gəla vani, gəm əɓay nan metir kaklaw sləre. Yaŋ akkəɗ gədəvən də meleŋge saksakə.

⁵ Akkpa'ək wəleŋɗe lelewɗe aza zə gəla metiŋgin van sə kəla ngil pakə. Akkəɗ zit də meleŋge saksakə, aver gugozleɗ gəm ngiyamɗe memeɗeŋɗe azeti.

⁶ Averenik gəla vanə'e dit gərmeŋge na sləma. Meleŋge məs adaɗɗaŋ wəza dəndən van sə Parwayim adawkiyəni.

⁷ Akkəɗik dədəkeɗi, maddamba naggar kəyən, zə gəla vani gəm maddambeɗe nan də meleŋge, yas kan aver kerubaɗe aza gəla vani.

⁸ Arkək təzoŋ, məyan na: təki salala diyɗa. Zezek nan ndəni yi slosloprok na gəla vani, tay metir kəlaw, slosloprok nan pak tay metir kəlaw; akkəɗ də meleŋge an moggoni, kilo gabal kaklaw sula.

⁹ Gagdak net penteɗe na meleŋge, məs məɗɗa wəza dənɗaŋ, agəɗək wəɗak na kilo. May gəleɗe naka gəla pak akkiɗik də meleŋge.

¹⁰ Agəɗək kerubaɗe sula addəv gəla an salala diyɗa də təbəz məhə̃sən, akkəɗ zit də meleŋge.

¹¹ Zezek na persleket kerubaɗe agəɗək metər kəlawə, persleke taka pak tay metər sula də mani, tay ərəŋgən zə gəla, persleke an mbərən tamə tay metər sula də mani ərəŋgən persleke keruba mbərni.

¹² Persleke keruba taka pak tay metər sula də mani, tay ərəŋgən zə gəla, persleken an mbərni, tay metər sula də mani, tay ərəŋgən persleke keruba mbərni.

¹³ Persleket kerubaɗes tay pəparra, agəɗək metər kəlawə, tahəŋ ziwziw aka tilti, heret kəleŋgili.

¹⁴ Ahũk məzlzlara məhəmən pepreŋ va uffiyo na muŋgus, gəm pepreŋ witwit, gəm liwliwi, gəm busobuso, yaŋ ahũ kerubaɗe akani.

Dədəkeɗ na təbəz pepreŋge gəm matuya

¹⁵ Agəɗək dədəkeɗ sula, zezek na taka pak tay metər kəlaw kiyən buhul də meŋgeslin, kawziwgit aba Gəla na Maŋgəlva. Daŋgbarga naka dadwar ki taka pak tay metər sula də meŋgeslin.

¹⁶ Agəɗək ngiyamɗe meɗmeɗi, məɗiyit a metteɓ met dədəkeɗ neki. Məbaysəni gawla əmpa dit weweɗe səkatə, yas mugulet aket ngiyamɗe memeɗeŋɗe neki.

¹⁷ Ampe dədəkeɗ nek ama Gəla na Maŋgəlva, taka dəka dəzəŋ, maɓɓan dəka zlaɓay; məlvani an naka dəzəŋ na Yakin. An naka zlaɓay tam məlvani na, Bo'az.