SOFONII 2 - Kalata Ko SƆ̧ DC

Aia-nú wen kpaa mbe ta

^1-2 Ɛnɛ o tugun bíí nɔ'ɔ nɛ foe de'nɛ́ na’ɛ, ɛ̀nɛ̀ bá zu'nɛ́, wen ká kita tɛɛ tik'nɛ́, ká wese'i tɛɛ hɔ nɛ haya-a hee mɔ'ɔ nɛ búk kai nɛ pumyulu mɔ yaknɛ'ɛ ga. Ɛ̀nɛ̀ bá zu'nɛ́ wen ka wese kpɔra nyimsea ko GASA WAN tɛɛ tik zu'nɛ́.

³ Ɛ̀nɛ̀ kíí GASA WAN, ɛ́nɛ́ o wi-mɔka-see zu nù'ɛ, ɛ́nɛ́ o wi-kasi-geŋa kɔ̧-a̧; ɛ̀nɛ̀ kíí mɛ de mɔ nɛ yuwar-a, ɛ̀nɛ̀ dúk si ɗɔɔ, ɓɛɛ ŋmafara ɛnɛ tɛ kpa fara-hu̧si wese nyimsea ko GASA WAN.

Tɔ̧ɔ̧-wen a zu o dukbíí nɛ ya zik Israɛl

⁴ Gaza tɛ kifi bɛɛ-oi, Askelɔŋ tɛ kifi geemɔ; wa tɛ ndak Asdod nɛ bu-wese. Wa tɛ zuɗi Ekrɔŋ yinɛ.

⁵ Ŋgamɔ'ɔ kpá‘nɛ́, ɛ́nɛ́ o wi ɔ ká̧ zaŋ gba-tɔp, ɛ́nɛ́ o bezaŋ Krɛt; wen ko GASA WAN a̧a̧ zu mɛ Kanaŋ, nù ko o be Filistii: «Mi tɛ ɗaŋ mɛ yinɛ, oi ndaa bíí beka duk na.

⁶ Nù kɔ-mɛ ká̧ zaŋ gba-tɔp tɛ kifi nɛ fara-nyɔŋ-mɔ ko o mɔ-dai, fara-yar ko o wi-dai-mɔ, in fara-a o mɔ-dai.»

⁷ Fara'i tɛ duk nɛ mɔɔ-oi ko o bíí nutua ko Juda. Wa tɛ dai o mɔ-dai sɛnɛ; mɛ ga̧a̧mɔ, ɓɛɛ wa ɔma tɛ kɔ̧ tua ko Askelɔŋ, wen GASA WAN Sɔ̧ kɔ-wa tɛ yor ɗoŋ-wa, ɓɛɛ a̧ tɛ ɗafi war duka-a kɔ-wa.

⁸ Mi zia dara ko Mɔab in zɛkɛɗa dukbíí kɔ‘m nɛ o be Amɔŋ zɛkɛɗi mam nɛnɛ kpa nɛ mɔ tɛ nù kɔ-wa'i.

⁹ GASA WAN Sɔ̧ ko Israɛl nɛ a̧a̧ nɛ ŋgayamɔ lɛŋ tɔ̧a̧: «Mi kana mɔ nɛ tɛ‘m: Héé mɔ'ɔ n'am duk kpasa ga, Mɔab tɛ kifi duk héé Sɔdɔm ga; o bezaŋ Amɔŋ tɛ kifi duk héé Gɔmɔr ga: bɛɛ-oi kɔ-wa tɛ dun nɛ tɛn-dara, tɛ duk hee fara-dɔ-tɔŋ ga, nɛ bíí beka ɔ sɛnɛ ɓɔna. Oi dukbíí kɔ‘m nɛ tɛ ɓɔn tɛ ɓar mɔ er-wa lɛŋ; oi tugun bíí kɔ‘m tɛ ba nù kɔ-wa nɛ mɔɔ-oi.

¹⁰ «Mɔ nɛ wa tɛ kpa oi ŋmaŋa tɛ kɔ-wa nɛ mɔ‘i, wen wa da̧a̧ so dukbíí ko GASA WAN nɛ a̧a̧ nɛ ŋgayamɔ lɛŋ, kpa nɛ mɔ tɛ nù kɔ-wa.

¹¹ GASA WAN tɛ de ŋgamɔ in wa; a̧ tɛ ɗaŋ o sɔ̧ zu nù lɛŋ yinɛ, ɓɛɛ o tugun bíí tɛ gu nù ti a̧, kóó nɛ́ o wan mɛ nyɛi̧a fara mɛ mbɛt, kóó o ndé sɛn bee-gara kɔ‘i.

¹² Ɓɛɛ nɛ k’ɛ́nɛ́ o be Etiopii, gba-paa kɔ‘m tɛ gɔm'nɛ́ gbɛ mbɛt.»

¹³ GASA WAN tɛ de ŋmaa in o bíí mɛ́ ká̧-zan-mɛ́-ŋgɔn, a̧ tɛ ɗaŋ nú Asirii yinɛ; a̧ tɛ de ha̧ Ninivɛ mɛ kifi duk nɛ bɛɛ-oi kotoro, hee ŋga-gbárà ga.

¹⁴ O mɔ-dai in o saɗi-zaŋbɛɛ nɛtɛ nɛtɛ tɛ ɔm tɛ fara'i. O diri tɛ ɔ zu o gan-ndui, wi tɛ zii hiɗimɔ kɔ-wa nɛ woi-tua. O ŋgeŋ tɛ gbin dun nú tua gɛ́tɛ́-gɛ́tɛ́, ɓɛɛ o kpaakpee-ba-ger-tua nɛ‘i dee nɛ gbatui tɛ ya zan ŋmakpa̧ra̧.

¹⁵ Ye nɛ duka so nɛ́ ɓɔɔ ye, nɛ̀ ŋgamɔ hɔ sɛnɛ na, nɛ̀ duka so kɔn nɛ ŋguɗi'e, nɛ́ wi, nɛ́ wi kpɔk ɓɛɛ'ɛ, nɛ́ mɔ'ɔ nɛ kifa bɛɛ-oi nɛ̀ o saɗi ya sɛnɛ'ɛ! Kóó o ndé nɛ tɛ ɓir fara'i tɛ sɔr mɔ, ɓɛɛ nyɔŋa er nú.