FILIPIƐN 3 - Kalata Ko SƆ̧ DC

Kpasa yuwar deemɔ ti Sɔ̧

¹ Hegɔ, o nya'm, ɛ̀nɛ̀ kpá desee tɛ duka-a k’ɛ́nɛ́ in Gasa Wan. Mi mbɔi tɛ yɔra o kale kpɔk mɔɔ nɔ‘i h’ɛ́nɛ́ na, wen mi zɔka'e mɔ‘i tɛ́ ha̧ nɔɔ-ŋgiɗi h’ɛ́nɛ́.

² Ɛ̀nɛ̀ zɔ́k tɛ‘nɛ́ nɛ̀ de-a nɛ̀ o ndiŋ toyo! Ɛ̀nɛ̀ zɔ́k tɛ‘nɛ́ nɛ̀ o ɗaŋ wi-de-tom! Ɛ̀nɛ̀ zɔ́k tɛ‘nɛ́ nɛ̀ o wi-gɔn-bɔr nɛ̀ bó nɛ̀ yuwar-a na!

³ Wen o wi nɛ̀ gɔna bɔr nɛ́ ɛ́ɛ́, nɛ̀ gasi Sɔ̧ nɛ̀ ɗoŋ Sa̧a̧ Ɔmi ko Sɔ̧; ɛ́ɛ́ zɔn tɛ yɛ nɛ̀ ɗoŋ Jesu Krist, ɓɛɛ bó nɛ́ ɛ́ɛ́ e ta nɛ̀ ɛ́ɛ́ nɛ̀ tɛ-ɛɛ na.

⁴ Hegɔ, mi mbɛt nyɛma so mɛ́ e ta nɛ̀ tɛ‘m. Kà ŋma bíí kpɛk mɛ́ e ta nɛ̀ tɛ-wi, ɓɛɛ nɛ́ wen nɛ̀ tɔ̧, mi gana wi’ɛi.

⁵ Wa koa'm, zɛ mɔɔrɔ-ɗoŋ-taar ɓɛɛ wa gɔn bɔr-am; zuduk kɔ‘m nɛ́ Israɛl, nútua ko Bɛnjamin; mi nɛ́ mgbák be Hebreu; nɛ̀ war ko heembea, mi nɛ́ Fariziɛn.

⁶ Kà bó nɛ́ war ko tom nɛ̀‘i e see-wi sɛnɛ, mi nɛ́ wi nɛ̀ duka so nɛ́ wi-usi-bɔnɛ ha̧ zuduk bíí ko Krist. Ɓɛɛ nɛ̀ ko deemɔ nɛ̀ yuwar-a nɛ̀‘i kpa tɛ kasa heembea, ŋma bíí beka tɔ̧ wen zu'm tɛ́ i̧i̧ kóó tikiɗi na.

⁷ O mɔɔ nɔ‘i lɛŋ duka so nɛ́ mɔ n'am tɛ̀ɛ́ kpa yí-mɔ sɛnɛ, nɛ́ mɔ'ɔ n'am ee tik nù wen zu Krist.

⁸ Nɛ̀ mbetɛ, mi zɔk o mɔ lɛŋ nɛ́ geemɔ; ɓɛɛ mgbák zɔm demɔ nɛ́ iŋa Jesu Krist Gasa Wan kɔ‘m. Wen zu Krist, mɔ kɔ‘m lɛŋ yɔa, hegɔ mɔɔ nɔ‘i lɛŋ duk nɛ́ yɔsɛ yí‘m wen ha̧ Krist mɛ́ duk nɛ́ yí-mɔ kɔ‘m

⁹ in ha̧‘m mɛ́ duk in a̧; bó nɛ́ wen zu deemɔ nɛ̀ yuwar-a n'am de tɛ kasa heembea na, ɓɛɛ nɛ́ deemɔ nɛ̀ yuwar-a nɛ̀‘i kpa tɛ kɔ̧ɔ̧ ɗɔaa ha̧ Krist. Deemɔ nɛ̀ yuwar-a'i tɛ́ nɛ̀ tɛ́ Sɔ̧ wen zu kɔ̧ɔ̧ ɗɔaa ha̧ a̧.

¹⁰ Mɔ ha̧‘m mɛ́ de nɛ́ iŋa a̧, in ŋgai nɛ̀ a̧a̧ tɛ kura ŋgɔn kɔ̧-a̧ tɛ́ fio, in duka-a kpɔk in a̧ tɛ́ bɔnɛ kɔ̧-a̧, in hɔɔ ŋmaa in a̧ tɛ fio kɔ̧-a̧ mbɛt,

¹¹ wen ha̧‘m mɛ́ duk mgbara o bíí nɛ̀ tɛ́ kur ŋgɔn tɛ fio, kà yuwar-a á̧ boa.

Maayì hɔ sɔŋkur-aa

¹² Bó nɛ́ mi tɔ̧a̧‘e mi dee mɔ‘i hɔ gba̧a̧ kaɗi na, kóó mi kifa duk nɛ́ bíí nɛ̀ de mɔ nɛ̀ yuwar-a na mbɛt, ɓɛɛ mi ma nɛ́ yì nɛ̀ ŋgaya-a mɛ́ ba mɔ, wen mi nɛ̀ tɛ‘m, nɛ́ Jesu Krist a̧ baa'm.

¹³ O nya'm, bó nɛ́ mi ta'e mi baa mɔ‘i kaɗi na, ɓɛɛ mɔ kpɔk n'am de nɛ mɔ'ɔ: taamɔ kɔ‘m bó tɛ́ mɔ nɛ̀ a̧a̧ nɛ̀ ɗoŋ na, ɓɛɛ kin-tɛ‘m lɛŋ a̧a̧ siti.

¹⁴ Mi ma nɛ́ yì nɛ̀ ŋgaya-a mɛ́ hɔ sɔŋkur-aa wen ha̧‘m mɛ́ ba mɔ nɛ̀ Sɔ̧ sa ɛ́ɛ́ nɛ̀ ŋgɔn mɛ̀ wen-aa nɛ̀ ɗoŋ Jesu Krist.

¹⁵ Ɛ́ɛ́ lɛŋ nɛ̀ mgbita tɛ mɔ ko Jesu Krist kaɗi, deemɔ k’ɛ́ɛ́ a̧ dúk kànà hegɔ. Ɓɛɛ k’ɛ̀nɛ̀ nɛ́ a̧ra̧ tɛ́ ŋma mɔ, Sɔ̧ tɛ́ usi mgbara mɔ‘i nɛ̀ sa̧a̧-a̧ h’ɛ́nɛ́.

¹⁶ Fara n’ɛ̀ɛ̀ hɔɔ sɛnɛ‘i, ɛ̀ɛ̀ bá kana nɛ́ kpɔk war'i nɛnɛ.

¹⁷ O nya'm, ɛ́nɛ́ lɛŋ, ɛ̀nɛ̀ zɔ́k ɗoŋ deemɔ kɔ‘m, ɓɛɛ ɛ̀nɛ̀ zɔ́k ɗoŋ deemɔ ko o bíí nɛ̀ de mɔ nyɛm nɛ ɗoŋ deemɔ k’ɛ́ɛ́ mbɛt.

¹⁸ Wen dɔ̧ɔ̧-dɔ̧ɔ̧ mi tɔ̧ɔ̧ so h’ɛ́nɛ́‘e deemɔ ko o dɔka bíí usi'e wa nɛ́ o wi-sɛn-te-diŋa ko Krist, ɓɛɛ kinii mi tɔ̧ wen'i h’ɛ́nɛ́ woyo nɛ̀ mi̧i̧kɔ̧a̧ yí‘m mbɛt.

¹⁹ Sɔŋkur mɔ kɔ-wa nɛ́ yɔa-a; sɔ̧ kɔ-wa nɛ́ zaŋ-wa, ɓɛɛ mɔ nɛ̀ tɛ̀ɛ́ pi̧ so foe zu wa'i a̧ wa zɔn tɛ-wa sɛnɛ, e nɛ̀ see-wa tɛ́ mɔɔ-nù ɓɛɛ.

²⁰ War k’ɛ́ɛ́, ye k’ɛ́ɛ́ a̧a̧ yiwese mɛ: ɓɛɛ ɛ́ɛ́ pɛm nɛ́ Wan-kpasi yɛ Gasa Wan Jesu Krist nɛ̀ tɛ́ pii ɗoŋ nɛ̀ hi̧i̧,

²¹ ha̧ a̧ mɛ́ kpai kiitɛ-ɛɛ nɛ̀ ɔ ziɓa mɛ́ duk hee kiitɛ-a nɛ̀ duk nɛ́ gasamɔ ga, tɛ́ ŋgai kɔ̧-a̧ nɛ̀ nyɛma mɛ́ de ha̧ mɔ lɛŋ mɛ́ mbo zu ha̧ a̧.