MARK 2 - Kalata Ko SƆ̧ DC

Jesu kpasa ŋma kara-wi

¹ Zɛ tikiɗi ɗoŋ mɔ‘i, Jesu pia ɗoŋ saaye Kafarnaum woyo. O bíí zia'e a̧ a̧a̧ kɔ̧́ ŋma tua,

² ɓɛɛ wa mɔi̧ ŋmaa si hi̧i̧ nɛ̀ dɔka-a nyɛmna, kpe fara lɛŋ hɔ nú tua mbɛt, ɓɛɛ a̧ tɔ̧ wen ko Sɔ̧ ha̧ wa.

³ Nɛ́ mɔ'ɔ nɛ̀ o ŋma bíí naar gɔɔ ŋma kara-wi tɛnɛ tɛ a̧.

⁴ Wa kɔ̧ɔ̧ mɛ ba a̧ ye nɛ̀ tua sitɛ Jesu, ɓɛɛ dɔka bíí nyɛmna, wa kpa fara mɛ hɔ tɛ Jesu na. Nɛ́ mɔ'ɔ nɛ̀ wa daŋa zu tua'i, ɓɛɛ wa wɛn kɔ̧̀ ger-a tan nɛ̀ fara nɛ̀ Jesu duk sɛnɛ, ɓɛɛ zir mɔɔ-gɔɔ-wi-zɛɛ nɛ̀ oi kara-wi'i si kɔ̧́ tua.

⁵ Jesu zɔka'e o wi nɔ‘i nɛ́ o wi nɛ̀ kɔ̧ɔ̧ ɗɔaa ha̧ Sɔ̧, ɓɛɛ a̧ tɔ̧ ha̧ kara-wi'i: «Bem kɔ‘m, ɗaŋmɔ kɔ-mɛ bó zu mɛ ɓɔna.»

⁶ O ŋma wi-usi-heembea yaa so hi̧i̧, ɓɛɛ ta mɔ:

⁷ «Wen ge sa wi’ɛ tɔ̧ wen hegɔ ge? A̧ ɗaŋ nɛ́ nin Sɔ̧. Nɛ́ o'o nyɛma mɛ e ɗaŋmɔ ha̧ bíí gan zu Sɔ̧ o?»

⁸ Soɓee, Jesu iŋa taamɔ kɔ-wa, ɓɛɛ tɔ̧ ha̧ wa'e: «Wen ge ɛ́nɛ́ ta mɔ hegɔ ge?

⁹ Wen n’ɛnɛ taa nɛ̀ dúk yɛ́kɛ́ɗɛ́ mɛ tɔ̧ nɛ̀ tɔ̧a̧-a̧ ha̧ kara-wi: ‹Ɗaŋmɔ kɔ-mɛ bó zu mɛ ɓɔna,› náà, kóó nɛ́ tɔ̧a̧-a̧: ‹Mɛ̀ kúr, mɛ̀ bá mɔɔ-gɔ-mɛ, mɛ́ nɛ̀ nɔ̀,› nde?

¹⁰ Ɓɛɛ mi kɔ̧ɔ̧ h’ɛ́nɛ́ mɛ iŋ‘e Bem ko bíí a̧a̧ nɛ̀ ŋgai mɛ e ɗaŋmɔ ha̧ o bíí zaŋnu, wen hegɔ:

¹¹ Mi tɔ̧ ha̧ mɛ, mɛ̀ kúr, mɛ̀ bá mɔ nɛ̀ wa gɔɔ nɛ̀ mɛ‘i, a̧ mɛ̀ sí ɗoŋ tɛ kɔ-mɛ.»

¹² Nɛ́ mɔ'ɔ nɛ̀ kara-wi'i kura, ba mɔ nɛ̀ wa gɔɔ nɛ̀ a̧‘i, ɓɛɛ gbo nɛ̀ yí bíí lɛŋ. Ɗɛɗɛ-wa lɛŋ gɔna, ɓɛɛ wa ya yemsele. Wa gasa Sɔ̧, ɓɛɛ wa tɔ̧: «Ɛ́ɛ́ tɛ zɔk pɛrti mɔ hegɔ nɛti na!»

Jesu saa Levii

¹³ Jesu baa war si ká̧ tɔp woyo. O bíí lɛŋ nɛ̀ɛ̀ tɛ a̧, ɓɛɛ a̧ usi mɔ ha̧ wa.

¹⁴ Tɛ̀ ɓira-a yak, a̧ zɔka Levii, bem ko Alfe, nɛ̀ duk nú fara-ba-garama, ɓɛɛ a̧ tɔ̧ ha̧ a̧: «Mɛ̀ tɛ́ ɗoŋ-am.» Ɓɛɛ Levii kur nɛ́ ɗoŋ Jesu.

¹⁵ Jesu duka nyɔŋ nɛ̀ mɔ kɔ̧́ tua ko Levii in o ŋgaiwi kɔ‘i, ɓɛɛ o wi-ba-garama, in o ɗaŋwi nɛ̀ dɔka-a ba fara mɛ nyɔŋ mɔ in a̧ in o ŋgaiwi kɔ̧-a̧, wen o pɛrti wi nɔ‘i ndak so nɛ́ ɗoŋ-aa nyɛmna.

¹⁶ O wi-usi-heembea nɛ̀ yaa so nɛ́ o Fariziɛn zɔka Jesu fara nyɔŋa mɔ kpɔk in o ɗaŋwi ká bá nɛ̀ o wi-ba-garama, ɓɛɛ wa ak o ŋgaiwi kɔ̧-a̧: «Wi’ɛ nyɔŋ mɔ kpɔk in o wi-ba-garama in o ɗaŋwi wen ge?»

¹⁷ Jesu zia wen'i ɓɛɛ tɔ̧ ha̧ wa: «Mɛ̀ nɛ́ o wi-zɛɛ a̧ kíí wan-nyina, nɛ̀ bó nɛ́ o wi nɛ̀ duk nɛ̀ haya-tɛ na; bó nɛ́ mi tɛ̀ɛ̀ mɛ sa nɛ́ o wi-de-mɔ nɛ̀ yuwar-a na, mi tɛ̀ɛ̀ mɛ sa nɛ́ o ɗaŋwi ɛ̧.»

Jesu tɔ̧ɔ̧ wen zu zima-yì

¹⁸ Ŋma wese, o ŋgaiwi ko Jean in ko o Fariziɛn zim nɛ́ yì; ɓɛɛ o bíí tɛ mɛ ak Jesu: «O ŋgaiwi ko Jean in o ŋgaiwi ko o Fariziɛn zim yì zim, ɓɛɛ ŋgaiwi k’ɛ́nɛ́ zim kɔ‘i yì na wen ge?»

¹⁹ Jesu kifa nú ha̧ wa: «O wi nɛ̀ wa saa tɛnɛ wen gbaŋa-báá-kóò nyɛma so mɛ zim yì ŋgimbi nɛ̀ wi-ba-kóò biti in wa nde? Weyaa, ŋgimbi nɛ̀ wi-ba-kóò biti in wa, wa nyɛm mɛ zim yì na.

²⁰ Ŋma wese wa tɛ ba wi-ba-kóò er-wa yaknɛ, ɓɛɛ wa zima yì wese'i.

²¹ «Wí fúr mbe zɔ̧-laa tɛ gba̧‘a̧ laa na, wen mbe zɔ̧-laa'i tɛ zuɗi gba̧‘a̧-a̧‘i ɓɛɛ a̧ka̧ gan kuti-a.

²² Hegɔ mbɛt, wi a nyɔ̧ɔ̧ dɔ̧ɔ̧ kɔ̧́ gba̧‘a̧ kpánà na, wen ká kpánà tɛ́ɛ̀ mbaŋ, ɓɛɛ dɔ̧ɔ̧ tofa a nù, ɓɛɛ dɔ̧ɔ̧ in kpánà‘i mbɛt baa tɛ-wi. Wi a mbe dɔ̧ɔ̧ kɔ̧̀ mbe kpánà ɛ̧.»

Wese-ɔm-tɛ

²³ Ŋma wese-ɔm-tɛ, Jesu ɓira yak nɛ̀ kpɛɛfɔ alkamaari, ɓɛɛ tɛ̀ ɓira-a yak o ŋgaiwi kɔ̧-a̧ hika alkamaari a kɔ̧̀ nú-wa.

²⁴ Ɓɛɛ o Fariziɛn tɔ̧ ha̧ Jesu: «Ɛ̀nɛ̀ zɔ̀k, wa de nɛ́ mɔ nɛ̀ heembea dor bíí tɛ dea-a wese-ɔm-tɛ.»

²⁵ A̧ kifa nú ha̧ wa: «Ɛ́nɛ́ tɔr mɔ nɛ̀ David dee so ŋgimbi nɛ̀ wɔ gbɛɛ nɛ̀ a̧ in o ŋgaiwi kɔ̧-a̧ na nde?

²⁶ Bó nɛ́ bíí lɛŋ a̧ nyɔŋ so brɛt-ɗafi-sɔ̧ na, kànà nɛ́ o wi-ɗafi-sɔ̧ ɓɛɛ. Bó nɛ́ David yee so kɔ̧́ tua ko Sɔ̧ ŋgimbi ko gasa wan-ɗafi-sɔ̧ Abiatar ɓɛɛ ká a̧ nyɔŋ brɛt-ɗafi-sɔ̧, ɓɛɛ ha̧ ŋma ha̧ o ŋgaiwi kɔ̧-a̧ mbɛt na nde?

²⁷ Sɔ̧ ee wese-ɔm-tɛ wen gbaka bíí, bó nɛ́ a̧ ee bíí wen wese-ɔm-tɛ na;

²⁸ hegɔ, nɛ́ Bem ko bíí a̧ duk zu wese-ɔm-tɛ mbɛt.»